2 Iwhe e meru l'oge ndu eze 35 - BAYỊBURU Ẹzaa

Ori oge O-je-ghata

¹ Josáya bya eriaru Onye-Nwe-Ọha oge O-je-ghata lẹ Jerúsalẹmu. E gbua nwatụru O-je-ghata ono g'ọnwa mbụ dụ l'abalị iri l'ẹno.

² O dobe ndu l'agbajẹ ẹja nụ Chileke l'ozhi, gbarụ whẹ nụ, bya ekfuru okfu mgbamume nụ whẹ sụ whẹ tẹ whẹ leta ẹnya l'ozhi, dụ l'ụlo Onye-Nwe-Ọha ono.

³ Ọ bya ekfuru yeru ndu Lívayi, bụ ndu l'ezhi ndu Ízurẹlu l'owhu iwhe, bụru ndu dụ nsọ l'ẹka Onye-Nwe-Ọha nọ sụ whẹ agha: “Unu woru igbe ono, dụ nsọ dobe l'ụlo ono, Sólomọnu nwa Dévidi, bụ eze ndu Ízurẹlu tụru. Unu ba apawhehekwa iya apawhe ọdo l'ukuvu. Unu ejelahaaru Onye-Nwe-Ọha, bụ Chileke unu ozhi ntaa, unu ejekwaruwho ndibe iya, bụ ndu Ízurẹlu ozhi.

⁴ Unu kwakọbe onwunu l'ẹnya-uwhu l'ẹnya-uwhu lẹ g'unu dụ l'ọgbo l'ọgbo, bụ iya bụ ẹgube ono Dévidi, onye ono shi bụru eze ndu Ízurẹlu yẹle nwa iya Sólomọnu tụru iya ẹka iya, bya edee ya edede doberu unu.

⁵ “Unu kfụru l'ẹka ono, dụ nsọ; unu kfụa l'ọgbo l'ọgbo ẹgube ọ dụ l'ẹnya-uwhu ndu Ízurẹlu mmaka, unu atụngaa ndu Lívayi l'ọgbo nọnu.

⁶ Unu egbua nwatụru O-je-ghata, mee onwunu t'unu dụ nsọ, bya akwakọbe nwatụru ono, nke ọwhu ụnwunna unu whẹ ono l'e-me iya gẹ Onye-Nwe-Ọha shi l'ẹka Mósisu tụa ya l'iwu.”

⁷ Ndu Ízurẹlu mmaka, bụ ndu nọ l'ẹka ono bẹ Josáya nụru ụnwu-atụru mẹe eghu, rwuru ụkporo ụnu ugbo ẹto l'ụnu iri l'ise tẹ whẹ gude gbaa ẹja oge O-je-ghata ono. Ọ nụkwa whẹ whọ eswi, dụ ụnu ugbo ẹsaa l'ụkporo iri. Anụ ono bẹ shikota l'elwu, eze nweru.

⁸ O nokwawho gẹ ndu ishi-ozhi Josáya woru iwhe zụru whẹ nkwe l'obu nụ ndu Ízurẹlu ono, mẹe ndu l'agbajẹ ẹja nụ Chileke, mẹe ndu Lívayi. Hilikaya, mẹe Zakaráya, mẹe Jehiyẹlu, bụ ndu ishi ụlo Chileke bya eworu ụnu nwatụru ugbo ishii l'ụkporo iri mẹe ụkporo eswi ugbo iri l'ise nụ ndu l'agbajẹ ẹja nụ Chileke tẹ whẹ gude gbaa ẹja O-je-ghata ono.

⁹ Konaniya, ọwaa Shemaya, ọwaa Netanẹlu, bụ ụnwunna iya; mẹe Hashabyiya, mẹe Jeyẹlu, mẹe Jozabadu; ndu ono bụ ndu ishi ndu Lívayi; whẹbedua bẹ nụru ndu Lívayi ụnwu-atụru yẹle eghu, dụ ụnu ugbo iri l'ẹbo l'ụkporo iri, nụkwa whẹ whọ ụnu eswi l'ụkporo ugbo ise, tẹ whẹ gude gbaa ẹja O-je-ghata ono.

¹⁰ Nteke a kwakọ-geeru nkwakọ O-je-ghata ono, ndu l'agbajẹ ẹja nụ Chileke je akfụru l'ọnodu whẹ, ndu Lívayi nọdu l'ọgbo l'ọgbo whẹ, ẹgube eze sụru tẹ whẹ mee ya.

¹¹ Whẹ gbushia ụnwu-atụru O-je-ghata ono. Ndu l'agbajẹ ẹja nụ Chileke nata mmee ya whee, ọwhube ndu Lívayi swashịa anụ ono akpọ.

¹² Whẹ woru anụ, e gude agba ẹja ọkpokota-iwhe-ọku dobe iche, nke ọwhu whẹ l'e-keshiru iya ndu Ízurẹlu l'ẹnya-uwhu l'ẹnya-uwhu, tẹ whẹ gude ẹka whẹ gbaarụ iya Onye-Nwe-Ọha, ẹgube ono, e deru iya l'ẹkwo Mósisu. Whẹ mekwaa ya whọ nno l'eswi whọ.

¹³ Ụnwu-atụru O-je-ghata ono bẹ whẹ hụru ahụhu, ẹgube nsọ iya dụ. Whẹ gude ite-ọku, mẹe nwite-nshịi, mẹe ite-owhe shia anụ ngwo-ẹja ọdo, dụ nsọ; whẹ mekebe ẹgwegwa pajeru iya ndu Ízurẹlu mmaka ono l'owhu.

¹⁴ Whẹ megee ono bya akwakọbe nkewhe mẹe nke ndu l'agbajẹ ẹja nụ Chileke, o noo nkele ndu l'agbajẹ ẹja nụ Chileke, bụ ẹpa Érọnu bẹ whuberu iwhu agba ẹja ọkpokota-iwhe-ọku yẹle ẹba anụ ono jeye ọochi bya. Nke ọwhu bụ l'ọo ndu Lívayi bẹ kwakọberu anụ ọwhu whẹbedua mẹe ndu l'agbajẹ ẹja nụ Chileke, bụ ẹpa Érọnu riru.

¹⁵ Ndu ọgbo-egvu, mbụ ẹpa Asafu nọdu l'ọnodu whẹ, bụ iya bụ ọnodu ono Dévidi, mẹe Asafu, mẹe Hemanu, mẹe Jedutunu, bụ onye l'awhụru eze awhụ doberu whẹ. Ndu nche nọduana l'ọnuzo nọnu. Ọ tọ dụdu onye hatarụ ọkpa lụfu l'oge ozhi nkiya, o noo nkele ụnwunna whẹ, bụ ndu Lívayi bẹ shiru babẹru whẹ.

¹⁶ Tọ dụ iya bụ, e jekota ozhi lile, l'eejeru Onye-Nwe-Ọha mbọku ono gude ria O-je-ghata ono, gbakọta ẹja ọkpokota-iwhe-ọku ono l'ẹnya-mgbẹja Onye-Nwe-Ọha, ẹgube eze bụ Josáya sụru t'e mee ya.

¹⁷ Ndu Ízurẹlu, bụ ndu ọwhu nọ anọno l'ẹka ono ria O-je-ghata ono nteke ono, bya eria oge ono, l'aatajẹ buredi, l'ete eyee iwhe l'ekoje buredi abalị ẹsaa.

¹⁸ Ụdu O-je-ghata ono bẹ akọ ẹtu iya tẹke adụbudua l'alị Ízurẹlu wata l'oge nke onye nkfuchiru Chileke, bụ Sámuwẹlu. Ọ tọ dụdu onye eze ndu Ízurẹlu mejeru oori oge O-je-ghata ọwhu dụjeru g'ọo ọwhu Josáya meru. Ndu whẹ l'iya meru iya bẹ bụ ndu l'agbajẹ ẹja nụ Chileke, mẹe ndu Lívayi, mẹe ndu Juda l'owhu, mẹe ndu Ízurẹlu, bụ ndu nọ anọno l'ẹka ono, mẹe ndu bu lẹ Jerúsalẹmu.

¹⁹ O-je-ghata ono b'e riru l'awha kwe Josáya awha iri l'ẹsato, ọ bụ eze.

Anwụhu Josáya

²⁰ G'e megeeru iwhe ono, ọ gvụ, Josáya bya edozhigee ụlo Onye-Nwe-Ọha ọ kfụru; ọo ya bụ, Neko, bụ eze ndu Íjiputu gbalihu chịta ndu ojọgu iya whẹ jeshia ọgu lẹ Kakemishi, dụ lẹ mgboro ẹnyimu Yufurétisu; Josáya chịta ndu ojọgu nkiya jeshia tẹ ya wọta iya ọgu.

²¹ Ọle Neko bẹ yeru ndu ozhi tẹ whẹ je ezhia Josáya sụ iya: “?Ọo gụnu bẹ l'adarụ mu lẹ ghu, gụbe eze Juda? Ọ tọ kwa ghu bẹ mu byakfutaru ọgu ntanụ, ndu mu byakfutaru bẹ kwa ndu ono l'ọodahawaru mu lẹ whẹ. Chileke bẹ zhiru mu tẹ mu mekebe ẹgwegwa. Ba akfụ-chikwa Chileke ụzo l'ọ tụkwaru ike yeru mu, ọdua bẹ l'ọo-lakwa ghu l'iyi.”

²² Josáya te ekwe haa ya, bya aghaa onwiya ụghara, t'a ba ahụbe iya ama, nke ọwhu yẹle iya l'a-lwụ ọgu ono. Ọ jịka lẹ ya ta angadụ nchị l'okfu Neko, bụ iya bụ okfu ono, shi l'ọnu Chileke; ọ tụgbuleru-a jekfushia ya ọgu lẹ whorokoto alị Megido.

²³ Ndu l'agba akfụ gbaa eze bụ Josáya akfụ, ọ sụ ndu ozhi iya tẹ whẹ pafụ iya l'e merwuru iya ọkpobe ẹhu.

²⁴ Ọo ya bụ, whẹ pata iya pafụ l'ụgbo-ịnya iya, parụ iya ye l'ụgbo-ịnya iya nke ẹbo palahụ Jerúsalẹmu. Ọ nwụhu, e lia ya l'ẹka e liru nna iya whẹ. Ndu Juda l'owhu mẹe ndu Jerúsalẹmu ryaa ẹkwa iya.

²⁵ Jeremáya bya agụa egvu-aawhụ ẹhu Josáya. Unwoke l'ụnwanyi, l'agụ egvu l'akpọjeru iya ye l'egvu mẹ whẹ l'agụ egvu-áwhụ Josáya; ọ dụ nno byeye ntanụ. Iwhe ono bya abụru nsọ, dụ l'alị Ízurẹlu; e dee ya edede l'ẹkwo egvu-áwhụ.

²⁶ Iwhe ọdo, megbaberu nụ nteke Josáya bụ eze mẹe lẹ g'o shi mee iwhe-ọma l'ụzo, ọ dụ l'iwu Onye-Nwe-Ọha,

²⁷ mẹwaro iwhe o megbaberu, wata l'ishi jeye lẹ ngvụcha b'e dekotaru l'ẹkwo ndu eze ndu Ízurẹlu mẹe nke ndu Juda.