2 Iwhe e meru l'oge ndu eze 33 - BAYỊBURU Ẹzaa

Nteke Manáse bụ eze ndu Juda

¹ Manáse bẹ gbarụ awha iri l'ẹbo nteke ọ watarụ ọbu eze. Iwhe ọ chịru bụ ụkporo awha ugbo labọ l'awha iri l'ise lẹ Jerúsalẹmu.

² O meru ejo-iwhe l'ẹnya Onye-Nwe-Ọha, mbụ l'o meru akpamara g'ọo ndu mba ono, Onye-Nwe-Ọha chịfuru l'iwhu ndu Ízurẹlu.

³ Ẹka ono, l'aagwajẹ iwhe ono, nna iya Hezekáya mebyishiru b'ọ tụ-whukotaru azụ, mowhashia ẹnya-mgbẹja Bálu, kpọbe-gee itso Ashera, bya ewhozelahaaru kpokponde, nọ-gee l'igweli ishi l'alị, l'abarụ iya ẹja.

⁴ Ọ tụshia ẹnya-mgbẹja l'ụlo Onye-Nwe-Ọha, dụ lẹ Jerúsalẹmu, bụ iya bụ ẹka ono Onye-Nwe-Ọha sụru: “Jerúsalẹmu bẹ ẹwha mu l'a-dụ jeye lẹ tututu-mịmimi.”

⁵ L'ọma ogboduwhu labọ, dụ l'ụlo Onye-Nwe-Ọha ono b'ọ tụru ẹnya-mgbẹja nụ kpokponde, nọ-gee l'igweli.

⁶ O woru ụnwu iya unwoke je akpọo ọku gude whẹ gbaa ẹja lẹ nsụda nwa Hịnomu. O jeru l'ẹja, gwọo ọgvu, daa lẹ mgbashị, l'oojeje njịta l'ẹka ndu l'awhụ awhụ mẹe l'ẹka ndu l'eme amamanshi. Ejo-iwhe, o meru bẹ parụ ẹka l'ẹnya Onye-Nwe-Ọha, shi nno kpatsua ya ẹhu-eghughu.

⁷ Ọ pyịru ntẹkpe dobe l'ụlo Chileke, mbụ ẹka ono, Chileke sụru Dévidi yẹle nwa iya, bụ Sólomọnu sụ: “Ọo l'ụlo-ọ yẹle Jerúsalẹmu ono, bụ obodo, mu họtaru l'ikfu ndu Ízurẹlu l'owhu bẹ ẹwha mu l'a-dụ jeye lẹ tututu-mịmimi.

⁸ Mu te emehedu tẹ ndu Ízurẹlu shi l'alị ono, mu tụru ẹka nụ nna whẹ ono lụfu alụfu ọdo, m'ọ -bụru-a lẹ whẹ l'e-do ẹnya ndo emekota iwhe mu tụru whẹ l'iwu, bya edobekota iwu ono, mu shi l'ẹka Mósisu nụ whẹ, dobe iwhe ono, mu tọru ọkpa iya, mẹe nsọ nkemu.”

⁹ Manáse lọru ndu Juda mẹe ndu bu lẹ Jerúsalẹmu ẹka ye l'ome ejo-iwhe. Ejo-iwhe, whẹ meru ka ọwhu ndu mba ono, Onye-Nwe-Ọha larụ l'iyi l'iwhu ndu Ízurẹlu megbaberu.

Nzhimanụ l'alwa Manáse azụ

¹⁰ Onye-Nwe-Ọha kfukota yeru Manáse yẹle ndu nkiya, ọ bụru kịtikiti kpọngu.

¹¹ Ọo ya bụ, Onye-Nwe-Ọha chịta ndu ishi ndu ojọgu eze ndu Asiriya bya eweeru whẹ. Whẹ gude ukoloba kota Manáse, tụa ya ẹgbirigba, e meru l'ope kpụru jeshia Bábyilọnu.

¹² Iwhe ono tsụnukadele iya whọ l'anụ, ọ chọlahaa gẹ l'oo-shi tụba Onye-Nwe-Ọha, bụ Chileke iya l'ẹnya; ọ bya akwata wozeta onwiya alị l'iwhu Chileke nke nna iya whẹ.

¹³ O kfuru nụ Chileke; Chileke nata ekfukfu ono, o kfuru nụ iya, bya anụa iwhe ono ọ sụru t'o meeru iya, o duwhu iya azụ lẹ Jerúsalẹmu. Ọ bya anọdu-whu azụ l'alị-eze iya. Nteke ono, Manáse bya amarụ l'ọo Onye-Nwe-Ọha bụ Chileke l'ezhi.

¹⁴ E megee, o tụkwa-zhia mgbodo mkpụkpu Dévidi ọwhu dụ lẹ nfụta, mbụ l'ụzo ẹnyanwu-arịba ẹka mini Gihọnu l'eshije asọ lẹ nsụda. Ẹka ọ watarụ iya atụtu bẹ bụ lẹ nsụda; ọ tụa ya jeye lẹ Ọnoguzo Ẹma, ọ tụ-whewa iya rọ ugvu Ofẹlu mgburumgburu. Mgbodo ono b'ọ tụkwaruwho, ọ ha l'eli shii. O dowhashia ndu ishi ndu ojọgu l'iwhe bụ mkpụkpu, a tụkotaru o shihu ike l'alị ndu Juda.

¹⁵ Ọ wofukota ọgvu, e jetaru ejeta, wofu ntẹkpe ono, dụ l'ụlo Onye-Nwe-Ọha, bya emebyishia ẹnya-mgbẹja ono, e mowhashiru l'ugvu ẹka ụlo Onye-Nwe-Ọha dụ mẹe lẹ Jerúsalẹmu; o vuta whẹ je etuwhaa l'azụ mkpụkpu.

¹⁶ Ọ bya edozhia ẹnya-mgbẹja Onye-Nwe-Ọha, gbaa ẹja ẹhu-guu mẹe ẹja ekele l'eli iya. Ọ sụ ndu Juda tẹ whẹ bajẹru Onye-Nwe-Ọha, bụ Chileke nke Ízurẹlu ẹja.

¹⁷ Ọle ndu Juda ta ahadụ ọogba ẹja l'ẹka ono, l'aagwajẹ iwhe. Ọ bụru Onye-Nwe-Ọha, bụ Chileke whẹ bẹ whẹ l'anọje agba yẹbe ẹja anụ.

Anwụhu Manáse

¹⁸ Iwhe ọdo, nwụru nụ l'oge nke Manáse, mẹe ekfukfu, o kfuru nụ Chileke, mẹe iwhe ndu l'awhụ awhụ gude ẹwha Onye-Nwe-Ọha, bụ Chileke nke Ízurẹlu kfuru nụ iya; iwhe lile ono b'e dekotaru l'ẹkwo-akọ ndu eze ndu Ízurẹlu.

¹⁹ Ekfukfu, o kfuru nụ Chileke, mẹe gẹ Chileke shi nabata iwhe ọ sụru t'o meeru iya, mẹwaro iwhe-dụ-ẹji o megbaberu, je akpaa lẹ ndzụ ghẹle-ghẹle-ghẹle, dụ iya l'ẹhu, mẹe ẹka ono, l'aagwajẹ iwhe ono, ọ tụru, mẹe itso Ashera yẹle ntẹkpe, o dobegeeru; iwhe ono g'ọ ha b'e dekotaru l'ẹkwo-akọ onye l'awhụ awhụ, bụ Hozayi.

²⁰ Ọo ya bụ, Manáse nwụhu lakfu nna iya whẹ lẹ maa. Whẹ lia ya l'ụlo iya. Amọnu, bụ nwa iya nwoke bya abụru eze l'ọzori iya.

Nteke Amọnu bụ eze ndu Juda

²¹ Amọnu bẹ gbarụ ụkporo awha l'awha labọ nteke ọ watarụ ọbu eze. Iwhe ọ chịru bụ awha labọ lẹ Jerúsalẹmu.

²² O meru ejo-iwhe l'ẹnya Onye-Nwe-Ọha g'ọo nna iya Manáse. Iwhe bụ ntẹkpe Manáse, bụ nna Amọnu doberu b'ọ gbarụ ẹja nụ, baarụ iya ẹja.

²³ O to wozetadu onwiya alị l'iwhu Onye-Nwe-Ọha lẹ gẹ nna iya, bụ Manáse wozetaru onwiya. Amọnu bụlewho ikpe b'o mekoru kpua onwiya.

²⁴ Ndu ozhi iya bya agbaarụ iya ejo-ikumu, gbua ya l'ibe iya.

²⁵ Ọle ndu Juda bẹ gbukotaru ndu ono, tso gbaarụ Amọnu ejo-ikumu ono. Ndu Juda woru Josáya, bụ nwa iya nwoke mee eze l'ọzori iya.