2 Iwhe e meru l'oge ndu eze 29 - BAYỊBURU Ẹzaa

Nteke Hezekáya bụ eze ndu Juda

¹ Hezekáya bẹ watarụ ọbu eze nteke ọ gbarụ ụkporo awha l'awha ise. Iwhe ọ chịru bụ ụkporo awha l'awha tete lẹ Jerúsalẹmu. Ẹwha ne iya bụ Abáyija nwa nwanyị Zakaráya.

² Hezekáya bẹ meru iwhe kfụru nhamụnha l'ẹnya Onye-Nwe-Ọha, ẹgube ochee-oroke iya, bụ Dévidi meru.

Hezekáya l'emecha eze-ụlo Onye-Nwe-Ọha

³ L'ọnwa mbụ l'awha mbụ, Hezekáya watarụ ọbu eze b'ọ gụhashiru mgbo ụlo Onye-Nwe-Ọha ghebe, mekwakota iya emekwa.

⁴ Ọ nabata ndu l'agbajẹ ẹja nụ Chileke mẹe ndu Lívayi, kua whẹ ndzuko l'ọkpoku-ndzuko, dụ l'ụzo ẹnyanwu-awata ụlo Onye-Nwe-Ọha,

⁵ bya asụ whẹ: “Unubẹ ndu Lívayi, unu ngabẹru mu nchị! Unu mee onwunu t'unu dụ nsọ ntaa, unu emee t'ụlo Onye-Nwe-Ọha, bụ Chileke nke nna unu whẹ dụ nsọ; unu agwọshia ukutuku, dụgbabe l'ẹka ono, dụ nsọ ono.

⁶ Lẹ ndụ-ichee anyi whẹ ta abụdu ndu e gude ire whẹ ẹka. Whẹ meru ejo-iwhe l'ẹnya Onye-Nwe-Ọha, bụ Chileke anyi. Whẹ harụ iya, bya etuwhaa iwhu l'ẹka ono Onye-Nwe-Ọha bu, bya agbakụta iya azụ.

⁷ O nokwawho gẹ whẹ gụ-chishiru mgbo nwụlo ono, dụ gbakfuru l'ọnu ụlo Onye-Nwe-Ọha agụ-chishi, menyishia oryọku, dụ l'ụlo ono, whẹ kpọ-buhu ụ̀nwù isẹnsu ọku, bya agbabuhuru Chileke nke Ízurẹlu ẹja ọkpokota-iwhe-ọku l'ẹka ono, dụ nsọ.

⁸ Ọ bụru iya meru iwhe oke ẹhu-eghughu Onye-Nwe-Ọha bya atukoru ndu Juda mẹe ndu Jerúsalẹmu l'ẹhu. Ọ kpụru whẹ kpẹe n-yemegvu mẹe iwhe l'anwụ ishi kpaa, bya emee, whẹ bụru ndu l'aanmarụ ọtsa, ẹgube unu gude ẹnya unu awhụ iya.

⁹ O meru nke ọwhu ogu-ịgba tarụ ishi nna anyi whẹ. Ọ bụru iwhe ono meru iwhe ụnwu anyi unwoke, mẹe ndu nke nwanyị, mẹe unyomu anyi whẹ nọkota l'ẹka a kpụru whẹ lẹ ndzụ laa.

¹⁰ “Iwhe dụ mu l'obu ntaa bẹ bụ tẹ mu lẹ Onye-Nwe-Ọha gbaa ndzụ, mbụ Chileke nke Ízurẹlu, nke ọwhu ọta-chịchichi ẹhu-eghughu iya ono l'a-lụfu anyi l'ẹhu.

¹¹ Ụnwu mu, unu ba apakwa ozhi unu ẹka lanụ ntaa, o noo nkele Onye-Nwe-Ọha bẹ họtaru unu t'unu kfụru iya l'iwhu, ejeru iya ozhi, mbụ t'unu bụru iya ndu ozhi mẹe ndu l'akpọru iya ụ̀nwù isẹnsu ọku.”

¹² Tọ dụ iya bụ, ndu Lívayi ono bya ajịkobe tẹ whẹ jee ozhi ono. Ẹpa Kohatu, tso iya nụ bẹ bụ Mahatu nwa Amasayi yẹle Jowelu nwa Azaríya. Ẹpa Merari, tso iya nụ bẹ bụ Kishu nwa Abudi yẹle Azaríya nwa Jehalelelu. Ẹpa Gẹshonu, tso iya nụ bẹ bụ Jowa nwa Zima yẹle Idẹnu nwa Jowa.

¹³ Ẹpa Elízafanu, tso iya nụ bẹ bụ Shimiri yẹle Jeyẹlu. Ẹpa Asafu, tso iya nụ bẹ bụ Zakaráya yẹle Mataniya.

¹⁴ Ẹpa Hemanu, tso iya nụ bẹ bụ Jehiyẹlu yẹle Shimeyi. Ẹpa Jedutunu, tso iya nụ bẹ bụ Shemaya yẹle Úziyẹlu.

¹⁵ Whẹ gbadzua ụnwunna whẹ, bya emee onwowhe, whẹ dụ nsọ; ọo ya bụ, whẹ bahụ je emechaa ụlo Onye-Nwe-Ọha emecha, ẹgube ono, eze tụru whẹ iya, mbụ lẹge okfu Onye-Nwe-Ọha kfuru iya.

¹⁶ Ndu l'agbajẹ ẹja nụ Chileke bahụ l'ime ime ụlo Onye-Nwe-Ọha ono je emechaa ya emecha. Iwhe lile, whẹ whụru mmerwu l'eze-ụlo Onye-Nwe-Ọha ono bẹ whẹ chịfutakotaru l'ọma ogboduwhu ụlo ono. Ndu Lívayi ye iya ẹka vuta vufu je awụshia lẹ nsụda Kidirọnu.

¹⁷ Eze-ụlo ono bẹ whẹ watarụ emecha l'abalị mbụ l'ọnwa mbụ. O be l'abalị ẹsato l'ọnwa ono whẹ metabe iya rwua lẹ nwụlo ono, dụ gbakfuru eze-ụlo Onye-Nwe-Ọha ono. Ọ bya ewoo whẹ abalị ẹsato ọdo tẹ whẹ mechaa eze-ụlo Onye-Nwe-Ọha ono l'onwiya. Ọ bụru l'abalị iri l'ishii l'ọnwa mbụ ono bẹ whẹ megeru.

Eeyewhu ụlo Chileke azụ l'ẹka Chileke

¹⁸ Tọ dụ iya bụ, whẹ bakfu eze bụ Hezekáya je asụ iya: “Anyi mechaakwaru ụlo Onye-Nwe-Ọha l'owhu, mechawaa ẹnya-mgbẹja, mẹe arya, l'adụje iya nụ, mẹe teburu ono, l'eedobeje buredi, dụ nsọ yẹle arya, l'adụje iya nụ.

¹⁹ Iwhe bụ arya ono, eze Éhazu woshiru l'eze-ụlo ono nteke ọ bụ eze, mbụ nteke ono, l'ete egudee ire iya ẹka ono b'e dobewhuwaru azụ, anyi mechakwaa ya emecha. Iwhe ono dụkotawaa l'iwhu ẹnya-mgbẹja Onye-Nwe-Ọha.”

²⁰ Eze Hezekáya gbalihu l'ọnmewa ụtsu je ekukota ndu ishi mkpụkpu ono, whẹ jeshia l'ụlo Onye-Nwe-Ọha ono.

²¹ Whẹ jede kpụru oke-eswi ẹsaa, mẹe ebyila, ẹsaa, mẹe ụnwu atụru ẹsaa, mẹe mkpi ẹsaa, whẹ l'e-gude gbaa ẹja iwhe-dụ-ẹji l'iswi alị-eze ono, mẹe l'iswi ụlo-nsọ ono, mẹe l'iswi ndu Juda. Eze sụ ndu l'agbajẹ ẹja nụ Chileke, bụ ẹpa Érọnu tẹ whẹ gbaa ẹja ono l'ẹnya-mgbẹja Onye-Nwe-Ọha.

²² Ọo ya bụ, whẹ gbua oke-eswi ono; ndu ono, l'agbajẹ ẹja nụ Chileke nata mmee ya whee l'ẹnya-mgbẹja ono. E gbua ebyila ono, whee mmee ya l'ẹnya-mgbẹja ono. E gbua ụnwu atụru ono, whee mmee ya l'ẹnya-mgbẹja ono.

²³ Mkpi ono, e gude agba ẹja iwhe-dụ-ẹji ono b'a kpụtakotaru je anụ eze yẹle edzudzu-ọha ono, whẹ byibegbaa whẹ ẹka.

²⁴ Ndu ono, l'agbajẹ ẹja nụ Chileke gbushia mkpi ono, bya eworu mmee ya gbaa ẹja iwhe-dụ-ẹji l'ẹnya-mgbẹja gude kfụa ụgwo iwhe-dụ-ẹji, ndu Ízurẹlu l'owhu mekotaru, nkele eze bẹ tụru iwu sụ t'a gbaa ẹja ọkpokota-iwhe-ọku, mẹe ẹja iwhe-dụ-ẹji ono l'iswi Ízurẹlu l'owhu.

²⁵ Ọ chịru ndu Lívayi ye l'ụlo Onye-Nwe-Ọha ono, nụ whẹ ogele, mẹe une, mẹe ogumogu, ẹgube ono, whẹ tụru l'iwu, mbụ Dévidi yẹle Gadu, bụ onye l'awhụru eze awhụ mẹe Nétanu, bụ onye nkfuchiru Chileke. Iwu ono bẹ bụ iwu, Onye-Nwe-Ọha shi l'ẹka ndu nkfuchiru iya tụa.

²⁶ Ndu Lívayi kfụru gudegee ngwa-egvu Dévidi ono; ndu l'agbajẹ ẹja gudegee opyi-ọku whẹ.

²⁷ Tọ dụ iya bụ, Hezekáya tụa iwu sụ t'a gbaa ẹja ọkpokota-iwhe-ọku l'ẹnya-mgbẹja ono. A watalẹwho ọgba ngwo-ẹja ono, a gụlahaa egvu nụ Onye-Nwe-Ọha, whẹ l'egbu opyi-ọku eye iya; whẹ l'akụ ngwa-egvu ọdo, bụ nke Dévidi ono, bụ eze ndu Ízurẹlu.

²⁸ Edzudzu-ọha ono l'owhu baarụ Onye-Nwe-Ọha ẹja, ndu egvu l'agụ egvu, ndu opyi-ọku l'egbu opyi-ọku. E mezhia ya whọ nno jeye a gbakọta-gezhia ẹja ọkpokota-iwhe-ọku ono.

²⁹ Nteke a gbageeru ẹja ono, eze mẹe ndu whẹ l'iya nọ l'ẹka ono tụko gẹ whẹ ha whuzeta iwhu l'alị baarụ Onye-Nwe-Ọha ẹja.

³⁰ Eze, bụ Hezekáya yẹle ndu ishi iya bya ekfuru ndu Lívayi tẹ whẹ gụa egvu ajaja nụ Onye-Nwe-Ọha, mbụ tẹ whẹ gụa ya l'ụzo ono, Dévidi yẹle Asafu, bụ onye l'awhụ awhụ gụru iya. Ọo ya bụ, whẹ gude ẹswa gụa egvu ajaja ono, bya ewhuzeta ishi l'alị baarụ Onye-Nwe-Ọha ẹja.

³¹ Tọ dụ iya bụ, Hezekáya sụ: “Ntaa unu meru onwunu, unu dụ nsọ l'ẹka Onye-Nwe-Ọha nọ, unu gudewaro ngwo-ẹja mẹe ngwo-ẹja ekele bya l'ụlo Onye-Nwe-Ọha.” Ọo ya bụ, edzudzu-ọha ono bya ewota ngwo-ẹja mẹe ngwo-ẹja ekele ono. Iwhe bụ ndu ọ zụru nkwe l'obu wota anụ, l'ee-gude gbaa ẹja ọkpokota-iwhe-ọku.

³² Anụ, edzudzu-ọha ono nụru t'e gude gbaa ẹja ọkpokota-iwhe-ọku ono bẹ dụkota oke-eswi ụkporo ugbo ẹto l'oke-eswi iri, mẹe ebyila ụkporo ugbo ise, mẹe ụkporo ụnwu atụru ugbo iri. Anụ ono g'ọ ha bẹ l'ee-gude gbaarụ Onye-Nwe-Ọha ẹja ọkpokota-iwhe-ọku.

³³ Anụ, e doberu nsọ t'e gude gbaa ẹja ono bẹ dụkota ụnu oke-eswi l'ụkporo iri mẹe ụnu atụru ugbo ẹsaa l'ụkporo iri.

³⁴ Ọle ndu ono, l'agbajẹ ẹja nụ Chileke bẹ hanụka nwanshị, nke ọwhu bụ lẹ whẹ ta adụdu ike swashịkota akpọ l'anụ ono, e gude gbaa ẹja ọkpokota-iwhe-ọku ono. Ọ bụru ụnwunna whẹ, bụ ndu Lívayi bẹ yeru whẹ ẹka, t'e gude eme tẹ ndu ọdo, bụ ndu l'agbajẹ ẹja nụ Chileke mefua onwowhe tẹ whẹ dụ nsọ; whẹ yeru whẹ ẹka ono jeye ozhi, dụ iya nụ gvụ. Nkele ndu Lívayi bẹ l'ọo-kajẹ orwu l'ẹhu tẹ whẹ mee onwowhe tẹ whẹ dụ nsọ amamẹ ndu l'agbajẹ ẹja nụ Chileke.

³⁵ Anụ, e gude agba ẹja ọkpokota-iwhe-ọku ono bẹ ha l'igwe, a gụfu iya ono, b'e nweru ẹba anụ, e gude agba ẹja ẹhu-guu, nweru ngwo-ẹja mmẹe, tso l'ẹja ọkpokota-iwhe-ọku ono. O noo ya, ozhi, l'eeje l'ụlo Onye-Nwe-Ọha bya alwawhu azụ l'ọnodu iya.

³⁶ Hezekáya yẹle ndu nkiya gẹ whẹ ha tegbakota ẹswa iwhe Onye-Nwe-Ọha meru ndu nkiya, nkele iwhe ono b'e mekotaru ẹgwegwa ẹgwegwa.