Mark 9 - New Testament-et Akuzipigestun

¹ Nagneghutkiillu whaten, “Ipa ungipaatamsi, ilasi nekevghallghiit whani tuqunaanghitut kenlanga esghalleghmeggnun Ataneghpagullgha Kiyaghneghem tagikan aghtughyaghqaanghilleghtuumaghmi.”

Jesus‑em Allangughllegha

² Aghvinlek aghneq atughluku, Jesus‑em kelqelluki Peter‑enkut, James‑enkut, John‑enkut, mayuqat uusqalghiimun naayghamun. Ellnginaghhaalghiit tawani Jesus‑em yugusii allangughtekaq esghaamallghitni.

³ Aatkii qelmeghtekat qatetun, qaatghataghaghluteng kitum alngunak nunami qateghsaghaqegkanganeng.

⁴ Taagken maligsaaghtet esghapakagket Elijah‑nkuk Moses‑enkuk aliighlutek aleghquqangak Jesus.

^5-6 Enkaam maligsaaghtet alingruughuteghllakat repall sameng pipagningitkat. Taagken Peter‑em pikaa Jesus, “Apeghtughista, itagnapigtuq whaanlenguukut! Pingayut azigutat nekefnaqaput, elpenunllu Moses‑munllu Elijah‑munllu.”

⁷ Taagken qilawaaq aliighluni saapegkii. Qilawaaghmeng mem pikii, “Unanguuq piniqepigtekegka Ighneqa; nagataqiteggu!”

⁸ Taagken yugsughaaghaghsalghiimeng Moses‑enkuk Elijah‑nkuk aviituk, Jesus‑nginaghhaq tawanteftuq.

⁹ Ukigutkelluku naayghameng Jesus‑em ungipaqesnanighwaaqaa esghaatellghat kenlanga Ighnegha Yugem tuqulleghmeng unguvaghtekan.

¹⁰ Enkaam ineghsisteng qaatkegkaat, iwernga ellnginaaghhneghmeggni piiqelghiit, “Samengtuq pisiiwa ‘Tuqulleghmeng unguvaghtelleq?’”

¹¹ Taagken aaptekaat Jesus, “Sangan apeghtughikayuget Liilightuusaneng piiqatgu Elijah sivukluni tagipestaaghyaghqaaniluku?”

¹² Kiimsiqii, “Ipanguuq Elijah sivukluni tagipestaaghyaghqaaguq yataaghqennaluku sangwaa tamaghhaan. Aaptaghllamsi, naqam sangan Akuzitet Igaqegkat pikaqatgu, Ighnegha Yugem ikfiqeghllagyaghqaaniluku, sasiinghilngughestunllu kiyaghusaghqaaniluku?

¹³ Iwernga ungipaannaqamsi Elijah tagikaaguq, yuget piyukelleghmegestun pikaqaat katam tawaten Akuzitet Igaqegkat pinaqnillghistun.”

Jesus‑em Naallghuskanga Mekelghiiq Ilumikun Tughneghalek

¹⁴ Takuyaqmegteki ilangi maligsaaghtet, yulghuteghllak tawantuteftuq. Ilangita apeghtughikayuget Liilightuusaneng aaghtiiraaghaqeftiit maligsaaghtet.

¹⁵ Legan yuget esghaghluku Jesus saghiighayugllagluteng paayghaghlluku quyakegkaat.

¹⁶ Jesus‑em maligsaaghteni aaptekii, “Sameng aaghtiiraaghaqesteki apeghtughikayuget Liilightuusaneng?”

¹⁷ Yulghuteghllaget akulngitneng yugem kiimsiqaa, “Apeghtughista, ighneqa tagisaghaqa elpenun, qayughllak ilumikun tughneghalguuq. Taam tughneghaam akuzisigataa.

¹⁸ Kaatepiggneghminigu iqustaqaa, qaanghallu nuvaglliighqestaqaa, gguutngi terqitaagtaghtestaqii, teveghqwaastaqaallu. Maligsaaghtegpenun kayagutaghsaghaqa tughneghaq aanestesqelluku iwernga pipagningitaat.”

¹⁹ Jesus‑em maligsaaghteni pikii, “Elpesi yugni ugpeqillghitusi! Naten tagkaan elpesininnaqsinga ugpeqesqellunga? Mekelghiiq whavek tagiteggu!”

²⁰ Enkaam tagitkaat. Legan tughneghaam esghaghluku Jesus, mekelghiiq iqusluku sayugpagtaghtestekaa. Tamaani temngi ullghitaperewaaghtestekaa, qaanghallu nuvaglliightestekaa.

²¹ Jesus‑em aaptekaa atanga, “Qavngaghhaaneng tawateta?” Kiimsiqaa, “Mekestaghhaatmineng ima.

²² Uglaghngaan kenghegnunllu meghmunllu iqustaqsaghaa tuqusqelluku. Piyaghqaakuvek nangllegyagullutung kayusiitaghtikung!”

²³ Jesus‑em pikaa, “Sangavek tawaten pizin, ‘Piyaghqaakuvek’? Kiyaghneghem sangwaa alngunak piyaghqaqaa yugmun ugpelghiimun.”

²⁴ Tawaninginaq mekelghiighem atanga iglagtuluni pikaq, “Ugpeghtunga, iwernga ugpelleghtughtaghaqaghnga!”

²⁵ Jesus‑em esghaghluki wata yuget tagilaghaallghiit qevuulluku aghyuuqaa tughneghaq, “Uyuq tughneghaq tuuslaghtestilghiillu akuzistingigalnguqlu qelghamken aani mekelghiighmeng, allamengllu itefqaavek ellnganun pilghaaten.”

²⁶ Tughneghaam mekelghiiq araghaataghtesteghllagluku, sayugpagtaghtesteghllagluku, aanegkaq. Legan mekelghiiq esghaqaaluni tuqukaq repall esghapalghiit pikat, “Tuqumaaq!”

²⁷ Iwernga Jesus‑em iiggakun tuguluku kayusiitkaa nekevesqelluku enkaam nekevegkaq.

²⁸ Jesus mangteghamun iteghyan ellnginaghhaaghsameng maligsaaghtengita aaptekaat, “Sangan whangkuta aanesneghmeng aghtughesteggu tughneghaq?”

²⁹ Jesus‑em kiimsiqii, “Tawatelnguq tughneghaq yughaghhiinaam aanesaghqaqaa, saam alla pinaanghitaa.”

Jesus‑em Akuzitkellaataqanga Tuqulleghqani

³⁰ Taagken nemeng aghulaqluteng nagneqat Galilee‑kun. Jesus‑em kitumun alngunak liisimakesugumangitkaa naantuleni,

³¹ qayughllak apeghtuungukangi maligsaaghteni tuqulleghqamineng. Pikii, “Ighnegha Yugem tuguluku tuunelleqaat yugnun tuqutesqelluku, naqamenraq pingayut aghneghet atughluki unguvaghllequq.”

³² Iwernga liigikumangilkangat apeghtuusaa sameng pisiitanga, enkaam aapsugumangilkangat tetugluteng.

Kina Angelleghpigaawa?

³³ Capernaum‑emun kaalluteng, iteghaasameng Jesus‑em aaptekii, “Igleghutkelluku sangwaa aaghtiiraaghutkaqesteggu?”

³⁴ Kiimsighyugumangilkangat, qayughllak igleghutkelluku aaghtiiraaghutkat nalighteng angelleghpigaayaghqaatanga.

³⁵ Jesus‑em aqumluni, qula maalghuk siipneqluku maligsaaghteni tuqlughluki pikii, “Kina alngunak sivuliighsukumi nekeglli kinguliiluni, qepghaghtengulillu tamaghhaanun.”

³⁶ Taagken taghnughhaq tuguluku nekevestekaa qukiitgun. Qelluku pikii,

³⁷ “Kitum alngunak tugukliqumigu taghnughhaghhaq uutun ayuqelghii whanga apalluqlunga, tuguklighaqaanga whanga. Kitum alngunak tugukliquminga, tuguklighlleqaa Ataka kayagtikaq whangamneng.”

Whangkunneng Kipullginaanghilnguq Whangkutestun Ayuquq

³⁸ Mulugpenateng John‑em pikaa, “Apeghtughista, yuuk esghaamaaghput ateghpegun aanesqulghii tughneghaghneng. Ineghsimaaghput qayughllak whangkunnun ilatnganghilnguq.”

³⁹ Jesus‑em pikii, “Ineghtegpenaan! Qayughllak kina alngunak atemkun allaaghlluwhaghtingukumi seghletun akuzitkelghaghtughnaanghitaanga.

⁴⁰ Kitum alngunak kipullegmun pinghilkanginkut, qepghalgutkaghput.

⁴¹ Ipa ungipaatamsi, kitum alngunak meghsikangisi whanga pikutemneng, ipapestaaq akileghtuusangyaghqaaguq.”

Seghleghqestilleq

⁴² “Ataasiq taghnughhaq ugpeqingalghii whangamneng, yugem seghleghqestekagu, pinighataghaghnayaghtuq taana yuuk meghmun ateghsaqumi uyaqghwakun qaamqaghfikluku uyghagllagmeng.

⁴³ Iiggegpek seghleghqestekangaten kepnaketen. Pinighataghaghnayaghtuten yugusighpek nalighnegha iflakuvgu unguvalleghpek iflalleghqaaneng quunperugllak. Taana pinighataghaghtuq inglugtun iiggelighluten hell‑mun aglalleghqaghpeneng. Tawani kumaghughngalghii keneq qaamyaghqaanghituq.

⁴⁴ Tawani ‘kinguget neghegkayuget yugmeng tuquyaghqaanghitut, kumaghughngalghiillu keneq qaamyaghqaanghituq’.

⁴⁵ Itegaghpek seghleghqestekangaten, iiknaketen! Pinighataghaghnayaghtuten yugusighpek nalighnegha iflakuvgu unguvalleghpek iflalleghqaaneng quunperugllak. Taana pinighataghaghtuq inglugtun itegalighluten hell‑mun miluutelleghqaghpeneng.

⁴⁶ Tawani ‘kinguget neghegkayuget yugmeng tuquyaghqaanghitut, kumaghughngalghiillu keneq qaamyaghqaanghituq’.

⁴⁷ Iyegpek seghleghqestekangaten, ipugnaken! Pinighataghaghnayaghtuten Ataneghpagullghanun Kiyaghneghem iitquvek inglupigaghmeng iiskelluten, inglugtun iyelguluten hell‑mun miluutelleghqaghpeneng.

⁴⁸ Tawani ‘kinguget neghegkayuget yugmeng tuquyaghqaanghitut, kumaghughngalghiillu keneq qaamyaghqaanghituq’.

⁴⁹ Tamaghhaghmi taghyulighllequq keneghmeng.

⁵⁰ “Taghyuq pinightuq iwernga taghyughningiiskan, naten elpesi taghyughnighllaataghnayaghesteggu? Taghyughningiitegpenasi, nekeggmetullusillu.”