Mark 2 - New Testament-et Akuzipigestun

Jesus‑em Naallghuskanga Uniiqaq Yuuk

¹ Mulugpenani Jesus uteghniqaq Capernaum‑emun, enkaam ungipaqegkaat nayuqaqegkemininniluku mangteghami.

² Yuuk tagilaghaasalghiimi ellnganun kangsuutkat repall manughamun qakmavek. Jesus ungipaqimaluku Kiyaghneghem akuzitanganeng,

³ estamat yuget kevegtughluku uniiqaq yuuk tagitkaat ellnganun.

⁴ Kaatulluku itghunneghmeng aghtuqaat, qayughllak yuuk kangsuuteghllagulghii. Enkaam mangtegham qaayngan tile‑ngi ikughluki reghighulluku, yuuk allighaakun ukigtekaat Jesus‑em nallangakun.

⁵ Jesus‑em liisimakegkangi ugpeqilleghtulngit, enkaam uniiqaq yuuk pikaa, “Ighnemni, seghleghqelleghten seghevutellengut.”

⁶ Tawani apeghtughikayuget Liilightuusaneng aqumgallghiit sumeghtaghaqat,

⁷ “Sangami yuuk una tawaten akuzii? Akuzillgha seghleghuuq, qayughllak Kiyaghneghunilghii! Kiyaghneghhiinaaguq seghleghqelleghneng seghevutiyaghqaq!”

⁸ Tawaninginaq Jesus‑em sumeghtaghallghit liisimakegkii enkaam pikii, “Sangan tawaten sumeghtaghaghetsi?

⁹ Nalikek piyaqniitaghaghlleqak uniiqaq yuuk piyaqumkun, ‘Seghleghqelleghten seghevutellengut’ nalighmeng, ‘Makelluten, allighan tuguluku piyugi?’

¹⁰ Iwernga liisimakesugaqa Ighnegha Yugem seghevutiyaqleguuq seghleghqelleghneng nunami whani.” Enkaam uniiqaq yuuk pikaa,

¹¹ “Ungipaatamken, maketen, allighan tuguluku, elpesinun aglaa!”

¹² Yuget esghapakaat yuuk tawaninginaq nekevluni, allighani tuguluku aanelghii. Enkaam qamagtengngwaaghluteng tawanlenguut saghiighayukat, usuqegkaatlu Kiyaghneq, “Whatelngughmeng esghaasigasaghtukut!”

Jesus Maligtesqelghii Levi‑mun

¹³ Taagken Jesus, esnenganun Naayvam Galilee‑m pinqigtekaq. Yulghuteghllaget takulaghaasatni apeghtuqii.

¹⁴ Igleghutkelluku esghaqaa tax‑neng qerngughtista, aatgha Levi, ighnegha Alphaeus‑em. Aqumgaftuq qepghaghvigmini. Jesus‑em pikaa, “Maligtinga.” Levi‑em nekevluni maligtekaa.

¹⁵ Tawani ighivgaghmi, Jesus‑enkut maligsaaghtekullghiit Levi‑enkunun neghyaghtuqat. Neghelgusiqiit tax‑neng qerngughtistelghutetlu tamaakutlu qaatkusigalnguut Jews‑et Liilightuusiitnun. (Tawatelnguutlu yuget maligsaaghukangat Jesus.)

¹⁶ Ilangi apeghtughistengit Liilightuusat Pharisees‑ngulghiit, esghaghyamegteggu Jesus neghelgusighilghii, aaptekiit maligsaaghtengi, “Sangami Jesus neghaqa tax‑em qerngughtistengitnillu seghleghqestenillu?”

¹⁷ Jesus‑em nagalluki pikii, “Aghallegtaq qinuyulghiinun pinguuq, yugunqegtanun pingunghituq. Tawateghpigaq ungipaasaghtuuganka seghleghqestet avuteghqesqelluki, nakaan tamaakut seghleghqiganniluteng pilghiit.”

Jesus‑em Apeghtuusaqegkanga Fast‑elleq

¹⁸ Ataasimi aghneghmi, John‑em Paaptaayestem maligsaaghtengillu Pharisees‑etlu fast‑engulghiit. Ilangita yuget takuluku Jesus aaptekaat, “Sangameng John‑em Paaptaayestem maligsaaghtengillu Pharisees‑etlu maligsaaghtengit fast‑aaqat, naqam elpek maligsaaghteten pigpenateng?”

¹⁹ Jesus‑em kiimsiqii, “Nulightughnaqelghiim aqelqii fast‑elleqaat neqenghaghqellghani? Yeghlegillu! Nulightughnaqelghii paninang tawanlluku tawaten pinaanghitut.

²⁰ Nulightughnaqelghiistun ayuqunga, maligsaaghtenka nulightughnaqelghiim aqelqiistun ayuqut. Aghulaqestekanganga elngaatall tawani aghneghmi maligsaaghtenka fast‑ellequt.

²¹ “Kitum alngunak nutaghaq qiipaghaq qellughsimangilnguq ilaaghusiqnaanghitaa qaaslilugegnun. Ilaaghusiqegkumigu piigutaaghaghllequq, enkaam piilleq sullevataghllequq.

²² Enkaamllu kitum alngunak awataghpaluk imighnaanghitaa wine‑eghraghaghmeng. Imiqumigu awataghpaluk quupaghllequq enkaam wine‑a sakusiiqellequq, awataghpaluklu naavellequq. Tamaaken apalluqluku wine‑eghraghaq awataghpagraghaghmun kuuvyaghqaaguq!”

Aapqughaalleq Sabbath‑meng

²³ Ataasimi Sabbath‑mi, Jesus igleghtekaq wheat‑et piitfigitgun. Maligsaaghtengita igleghalgusiitkelluku wheat‑et piitutangitneng ikutaghtaqukat neghnaluteng.

²⁴ Taagken Pharisees‑et aaptekaat Jesus, “Esghaqaghqiqun! Sangameng maligsaaghteten saghnaat wheat‑et piitutangitneng? Tawaten pilleghmegteggun qepghaghtut Sabbath‑mi, enkaam qaatkunneghitnguut Liilightuusamnnun.”

²⁵ Jesus‑em pikii, “Atightiigasteggu David‑em pillgha qavngarugllak? Yukullghiit iyatiqaqngameng,

²⁶ David iteghluni Kiyaghneghem Mangteghaanun neghegkaaguq neqekrangllameng Kiyaghneghmun tuunegkameng. Tawaten pikaaguq Abiathar, High Priest‑nguluku. Liilightuusamta pillghani priest‑nginaghhaat neghyaghqaayaghtut tamaaken neqekrangllameng, iwernga David neghluni yunillu tuunegkaqii.”

²⁷ Taagken Jesus‑em pikii, “Sabbath‑a nakmikegkaaguq meghnaliviguluni yugem pinighqelleghqaanun. Sabbath‑a nakmikegkaanghituq yugmun ikfiqliighutkesqelluku.

²⁸ Enkaangam whanga, Ighneghani Yugem, Atanghuunga talwa Sabbath‑mun.”