भजन-संहिता 7 - पबितर बाईबलसमकालीन छत्तीसगढ़ी अनुवाद

भजन-संहिता 7

दाऊद के सिग्गायोन नांव के एक भजन, जेला ओह बिनयामीनी कूस के संबंध म यहोवा के आघू म गाईस।

¹ हे यहोवा मोर परमेसर, मेंह तोर सरन लेथंव; मोला ओ जम्मो झन ले बचा अऊ छुड़ा, जेमन मोर पीछा करत हें,

² नइं तो ओमन सिंह के सहीं मोला चीरके कुटा-कुटा कर दीहीं अऊ मोला बचानेवाला कोनो नइं होहीं।

³ हे यहोवा मोर परमेसर, कहूं मेंह ये काम करे हंव अऊ मोर हांथमन दोसी अंय—

⁴ यदि मेंह मोर संग मेल रखइयामन के संग भलई के बदले बुरई करे हंव या बिगर कारन के मेंह अपन बईरी ला लूटे हंव—

⁵ त फेर मोर बईरी ह मोर पीछा करके मोला धर लेवय; ओह मोला भुइयां म कुचरके मार डारय अऊ मोला माटी म मिला देवय।

⁶ हे यहोवा, अपन कोरोध म उठ; मोर बईरीमन के कोरोध के बिरूध म उठ। हे मोर परमेसर, जाग अऊ नियाय कर।

⁷ मनखेमन के भीड़ तोर चारों कोति जूरय, अऊ तें ओमन ऊपर ऊंच जगह म बिराजमान हो जा।

⁸ यहोवा ह मनखेमन के नियाय करय। हे यहोवा, हे सर्वोच्च परमेसर, मोर धरमीपन के मुताबिक, मोर ईमानदारी के मुताबिक मोर नियाय कर।

⁹ हे धरमी परमेसर, तें जऊन ह मन अऊ हिरदय ला जांचथस; दुस्टमन के बुरई ला खतम कर दे अऊ धरमीमन ला सुरकछित रख।

¹⁰ सर्वोच्च परमेसर ह मोर ढाल ए, जऊन ह सीधवा मनखेमन ला बचाथे।

¹¹ परमेसर ह धरमी नियायधीस अय, अइसन परमेसर, जऊन ह हर दिन कोप करथे।

¹² यदि मनखे ह पछताप नइं करही, त परमेसर ह अपन तलवार ला धार करही; ओह धनुस ला साधके ओमा तीर चघाही।

¹³ ओह मिरतू के हथियार तियार करे हवय; ओह अपन आगी बरत तीरमन ला तियार रखथे।

¹⁴ जऊन ह दुस्टता के बात सोचथे, ओह समस्या खड़े करथे अऊ बईरता ला पईदा करथे।

¹⁵ जऊन ह माटी निकालके खंचवा कोड़थे, ओह अपन कोड़े खंचवा म खुद गिरथे।

¹⁶ जऊन समस्या ओह खड़े करथे, ओह लहुंटके ओकरे ऊपर आ जाथे; ओकर हिंसा के काम ओकरेच मुड़ ऊपर आ जाथे।

¹⁷ मेंह यहोवा ला ओकर धरमीपन बर धनबाद दूहूं; मेंह यहोवा सर्वोच्च परमेसर के नांव म परसंसा के गीत गाहूं।