भजन-संहिता 41 - पबितर बाईबलसमकालीन छत्तीसगढ़ी अनुवाद

भजन-संहिता 41

संगीत के निरदेसक बर दाऊद के एक भजन।

¹ धइन अंय ओमन, जऊन मन कमजोर मनखे के सुधि लेथें; यहोवा ह संकट के बेरा म ओमन ला बचाथे।

² यहोवा ह ओमन ला बचाथे अऊ ओमन ला संभाले रखथे— देस म ओमन के गनती आसीसित मनखेमन के बीच होथे— ओह ओमन ला ओमन के बईरीमन के ईछा म नइं छोंड़य।

³ जब ओमन बेमार होके बिस्तर म पड़े रहिथें, त यहोवा ह ओमन ला संभालथे अऊ ओमन ला ठीक करके बेमारी के बिस्तर ले ठाढ़ करथे।

⁴ मेंह कहेंव, “हे यहोवा, मोर ऊपर दया कर; मोला चंगा कर, काबरकि मेंह तोर बिरूध पाप करे हंव।”

⁵ मोर बईरीमन मोर बुरई करके कहिथें, “ओह कब मरही अऊ ओकर नांव ह मिटाही?”

⁶ जब ओमन ले कोनो मोला देखे बर आथे, त ओह लबारी बात कहिथे, अऊ अपन मन म बदनामी के बात ला रखथे; तब ओह बाहिर जाथे अऊ ओ बात ला फईलाथे।

⁷ मोर जम्मो बईरीमन एक संग मोर बिरूध म कानाफूसी करथें; ओमन ये कहिके मोर बिरूध खराप कल्पना करथें,

⁸ “ओला एक खराप बेमारी हो गे हवय; ओह ओ जगह ले कभू उठ नइं सकय, जिहां ओह पड़े हवय।”

⁹ अऊ त अऊ मोर खास संगी, जेकर ऊपर मेंह भरोसा करत रहंय, जऊन ह मोर संग खाना खावत रिहिस, ओह मोर बिरूध हो गे हवय।

¹⁰ पर हे यहोवा, तेंह मोर ऊपर दया कर; मोला उठा कि मेंह ओमन ले बदला ले सकंव।

¹¹ मेंह जानत हंव कि तेंह मोर ले खुस हवस, काबरकि मोर बईरीमन मोर ऊपर जय नइं पावथें।

¹² मोर ईमानदारी के कारन तेंह मोला संभाले रखथस अऊ हमेसा बर मोला अपन आघू म रखथस।

¹³ यहोवा, इसरायल के परमेसर के परसंसा आदि ले अनंतकाल तक होवत रहय। आमीन अऊ आमीन।