भजन-संहिता 29 - पबितर बाईबलसमकालीन छत्तीसगढ़ी अनुवाद

भजन-संहिता 29

दाऊद के एक भजन।

¹ हे स्वरगीय जीवमन, यहोवा के बखान करव, यहोवा के महिमा अऊ बल के बखान करव।

² यहोवा के नांव के मुताबिक ओकर बखान करव; यहोवा के पबितरता के सोभा म ओकर अराधना करव।

³ यहोवा के अवाज समुंदर के ऊपर म हवय; महिमा के परमेसर ह गरजथे, यहोवा ह समुंदर के भयंकर लहरामन ऊपर गरजथे।

⁴ यहोवा के अवाज ह सक्तिसाली अय; यहोवा के अवाज ह सानदार हवय।

⁵ यहोवा के अवाज ह देवदार के रूख ला टोर देथे; यहोवा ह लबानोन के देवदार रूखमन ला कुटा-कुटा कर देथे।

⁶ ओह लबानोन ला एक बछरू के सहीं अऊ सिरयोन ला जंगली बईला के सहीं उछालथे।

⁷ यहोवा के अवाज ह बिजली के चमक के संग चोट करथे।

⁸ यहोवा के अवाज ह बीरान भुइयां ला हला देथे; यहोवा ह कादेस के बीरान भुइयां ला घलो हला देथे।

⁹ यहोवा के अवाज ह बांज के रूख ला मुरकेट देथे अऊ जंगल म पतझड़ हो जाथे। अऊ ओकर मंदिर म जम्मो झन चिचियाके कहिथें, “परमेसर के महिमा होवय!”

¹⁰ यहोवा ह बाढ़ के पानी ऊपर बिराजमान होथे; यहोवा ह सदाकाल बर राजा के रूप म बिराजमान होथे।

¹¹ यहोवा ह अपन मनखेमन ला ताकत देथे; यहोवा ह अपन मनखेमन ला सांति के आसीस देथे।