भजन-संहिता 27 - पबितर बाईबलसमकालीन छत्तीसगढ़ी अनुवाद

भजन-संहिता 27

दाऊद के भजन।

¹ यहोवा ह मोर अंजोर अऊ मोर उद्धार अय— त मेंह काकर ले डरहूं? यहोवा ह मोर जिनगी के मजबूत किला अय— त काकर ले मेंह भय खाहूं?

² जब दुस्ट मनखेमन मोला नास करे बर मोर बिरूध आघू बढ़थें, त ये मोर बईरी अऊ बिरोधीमन ही ठोकर खाहीं अऊ गिरहीं।

³ यदि एक सेना घलो मोला घेर ले, तभो ले मेंह नइं डरंव; यदि मोर बिरोध म लड़ई घलो सुरू हो जावय, तभो ले मोला भरोसा रहिही।

⁴ एक ठन चीज मेंह यहोवा ले मांगथंव, सिरिप ये बात मेंह चाहथंव: कि अपन जिनगी भर मेंह यहोवा के घर म रहंव, ताकि यहोवा के सुघरता ला देखंव अऊ ओकर मंदिर म ओकर धियान करंव।

⁵ काबरकि बिपत्ति के दिन म ओह मोला अपन निवास म सुरकछित रखही; ओह अपन पबितर तम्बू के खाल्हे म मोला छिपा लीही अऊ एक चट्टान के ऊपर ऊंचहा जगह म रखही।

⁶ तब मोर मुड़ ह ओ बईरीमन के आघू म ऊपर हो जाही जऊन मन मोला चारों कोति ले घेरथें; ओकर पबितर तम्बू म मेंह आनंद के मारे चिचियावत बलिदान चघाहूं; मेंह यहोवा बर गीत गाहूं अऊ बाजा बजाहूं।

⁷ हे यहोवा, जब मेंह गोहारंव, त मोर अवाज ला सुन; मोर ऊपर दया करके मोला जबाब दे।

⁸ मोर हिरदय ह तोर बारे कहिथे, “ओकर चेहरा के खोज म रह!” हे यहोवा, मेंह तोरेच दरसन के खोज म रहिहूं।

⁹ तेंह मोर ले अपन चेहरा झन छिपा, गुस्सा होके अपन सेवक ला दूरिहा झन कर दे; तेंह मोर मदद करइया रहे हस। हे परमेसर मोर उद्धारकर्ता, मोला अस्वीकार झन कर या मोला झन तियाग।

¹⁰ भले ही मोर दाई-ददा मोला तियाग देवंय, पर यहोवा ह मोला गरहन करही।

¹¹ हे यहोवा, मोला अपन रसता के बात सिखा; मोर ऊपर अतियाचार करइयामन के कारन मोला सीधा रसता म ले चल।

¹² मोर बईरीमन के ईछा ऊपर मोला झन छोंड़ दे, काबरकि लबरा गवाहमन मोर बिरूध ठाढ़ होथें, अऊ जलन से भरके मोर ऊपर दोस लगाथें।

¹³ मोला ये बात के भरोसा हवय: कि जीयत परानीमन के देस म मेंह यहोवा के भलई ला देखहूं।

¹⁴ यहोवा के बाट जोहत रहव; मजबूत बनव अऊ हिम्मत रखव अऊ यहोवा के बाट जोहत रहव।