भजन-संहिता 20 - पबितर बाईबलसमकालीन छत्तीसगढ़ी अनुवाद

भजन-संहिता 20

संगीत के निरदेसक बर दाऊद के एक भजन।

¹ बिपत्ति के बेरा म यहोवा ह तोर बिनती के जबाब देवय; याकूब के परमेसर के नांव ह तोला बचावय।

² पबितर-स्थान ले ओह तोर बर मदद पठोवय अऊ सियोन ले तोला मदद देवय।

³ ओह तोर जम्मो बलिदान ला सुरता करय; अऊ तोर होम-बलिदान ला स्वीकार करय।

⁴ ओह तोर मन के ईछा ला पूरा करय अऊ तोर जम्मो योजना ला सफल करय।

⁵ हमन तोर जय के कारन आनंद के मारे चिचियावन अऊ अपन परमेसर के नांव के झंडा ला ऊंचा करन। यहोवा ह तोर जम्मो बिनती ला पूरा करय।

⁶ अब ये बात मेंह जानत हंव: यहोवा ह अपन अभिसिक्त जन ला बिजयी बनाथे। ओह ओला अपन स्वरगीय पबितर-स्थान ले अपन जेवनी हांथ के बिजयी सक्ति के संग जबाब देथे।

⁷ कुछू मनखेमन रथ ऊपर अऊ कुछू मनखेमन घोड़ामन ऊपर भरोसा करथें, पर हमन तो यहोवा हमर परमेसर के नांव ऊपर भरोसा करथन।

⁸ ओमन ला ओमन के माड़ी म लाय जाथे अऊ ओमन गिरथें, पर हमन उठके मजबूती से खड़े रहिथन।

⁹ हे यहोवा, राजा ला बिजयी बना! जब हमन पुकारथन, त हमन ला जबाब दे!