भजन-संहिता 17 - पबितर बाईबलसमकालीन छत्तीसगढ़ी अनुवाद

भजन-संहिता 17

दाऊद के एक पराथना।

¹ हे यहोवा, मोर सच्चई के बिनती ला सुन; मोर गोहार ला सुन। मोर पराथना ला सुन— येह कपटरहित बात बोलइया मुहूं ले निकले हवय।

² मोर नियाय तोरेच करा ले आथे; तोर आंखी ह सही बात ला देखय।

³ हालाकि तेंह मोर मन ला जांचथस, हालाकि रथिया तेंह मोला परखथस अऊ मोला जांचथस, तभो ले तेंह पाबे कि मेंह कोनो दुस्टता के योजना नइं बनाय हंव; मोर मुहूं ह कोनो पाप नइं करे हवय।

⁴ हालाकि मनखेमन मोला घूस देय के कोसिस करिन, पर तोर दिये गय हुकूम के जरिये मेंह अपनआप ला गलत काम ले दूरिहा रखे हंव।

⁵ मोर पांव ह तोर रसता ला धरे हवय; मोर गोड़ ह नइं लड़खड़ाय हवय।

⁶ हे परमेसर, मेंह तोला पुकारत हंव, काबरकि तेंह मोला जबाब देबे; अपन कान ला मोर कोति लगा अऊ मोर पराथना ला सुन।

⁷ अपन बड़े मया के अद्भूत काममन ला मोला देखा, तें जऊन ह अपन जेवनी हांथ के दुवारा ओमन ला बचाथस, जऊन मन अपन बईरीमन ले तोर करा सरन लेथें।

⁸ मोला अपन आंखी के पुतली सहीं रख; मोला अपन डेना के छइहां म छुपा ले

⁹ ओ दुस्ट मनखेमन ले, जेमन मोला नास करे बर निकले हवंय, ओ मोर मरनहार बईरीमन ले, जेमन मोला घेर ले हवंय।

¹⁰ ओमन अपन कठोर हिरदय ला बंद कर लेथें, अऊ ओमन के मुहूं ले घमंड के बात निकलथे।

¹¹ ओमन मोर पता लगा ले हवंय, अऊ अब ओमन मोला घेरत हवंय, मोला भुइयां म पटके बर ओमन के आंखीमन सचेत हवंय।

¹² ओमन सिकार के भूखा एक सिंह सहीं अंय, ओ भयंकर सिंह, जऊन ह ओधा लेके घात म बईठे रहिथे।

¹³ हे यहोवा, उठ, ओमन के सामना कर, ओमन ला पटक दे; अपन तलवार के दुवारा मोला दुस्ट ले बचा।

¹⁴ हे यहोवा, अपन हांथ के दुवारा मोला अइसन मनखेमन ले बचा, ये संसार के ओ मनखेमन ले, जेमन के ईनाम इही जिनगी म हवय। ओमन के पेट ओमा ले भरय, जेला तेंह दुस्टमन बर रखे हस; ओमन के लइकामन ओमा ले पेट भरके खावंय, अऊ ओमा ले ओमन के छोटे लइकामन बर घलो बच जावय।

¹⁵ जहां तक मोर बात ए, मेंह बचाय जाहूं अऊ तोर चेहरा ला देखहूं; जब मेंह जागहूं, त तोर सरूप ला देखके संतोस करहूं।