भजन-संहिता 149 - पबितर बाईबलसमकालीन छत्तीसगढ़ी अनुवाद

भजन-संहिता 149

¹ यहोवा के परसंसा करव। यहोवा बर एक नवां गीत गावव, ओकर बिसवासयोग्य मनखेमन के सभा म ओकर परसंसा करव।

² इसरायल ह अपन सिरिस्टीकर्ता म आनंदित होवय; सियोन के मनखेमन अपन राजा म खुस होवंय।

³ ओमन नाचत ओकर नांव के परसंसा करंय अऊ ओकर बर खंजरी अऊ बीना बजावंय।

⁴ काबरकि यहोवा ह अपन मनखेमन ले खुस रहिथे; ओह नम्र मनखेमन ला जीत के मुकुट पहिराथे।

⁵ ओकर बिसवासयोग्य मनखेमन ये आदर पाके आनंद मनावंय अऊ अपन दसना म आनंद के गीत गावंय।

⁶ ओमन के मुहूं ले परमेसर के परसंसा होवय अऊ ओमन के हांथ म दूधारी तलवार रहय,

⁷ ताकि जाति-जाति के मनखेमन ले ओमन बदला लेवंय अऊ मनखेमन ला दंड देवंय,

⁸ अऊ ओमन के राजामन ला बेड़ी म, अऊ ओमन के परभावसाली मनखेमन ला लोहा के संकली म बांधंय,

⁹ अऊ ओमन के बिरूध दंड के हुकूम ले जावंय— येह ओकर जम्मो बिसवासयोग्य मनखेमन के महिमा ए। यहोवा के परसंसा करव।