भजन-संहिता 148 - पबितर बाईबलसमकालीन छत्तीसगढ़ी अनुवाद

भजन-संहिता 148

¹ यहोवा के परसंसा करव। स्वरग ले यहोवा के परसंसा करव; ऊपर ऊंचहा जगह म ओकर परसंसा करव।

² हे ओकर जम्मो स्वरगदूतमन ओकर परसंसा करव; हे ओकर जम्मो स्वरगीय सेनामन, ओकर परसंसा करव।

³ हे सूरज अऊ चंदा, ओकर परसंसा करव; हे जम्मो चमकत तारामन, ओकर परसंसा करव।

⁴ हे सबले ऊंच अकास, अऊ हे अकास के ऊपर के पानी, तुमन ओकर परसंसा करव।

⁵ ओमन यहोवा के नांव के परसंसा करंय, काबरकि ओकर हुकूम ले ओमन बनाय गीन,

⁶ अऊ ओह ओमन ला सदाकाल बर इस्थिर करिस— ओह एक आदेस निकालिस, जऊन ह कभू खतम नइं होवय।

⁷ धरती ले यहोवा के परसंसा करव, हे समुंदर के बड़े-बड़े जीव-जन्तुमन अऊ जम्मो समुंदर के गहरई,

⁸ हे बिजली अऊ करा, बरफ अऊ बादरमन, हे ओकर हुकूम मनइया गरेर,

⁹ हे पहाड़ अऊ जम्मो पहाड़ीमन, हे फरवाले रूख अऊ जम्मो देवदार रूखमन,

¹⁰ हे जंगली पसु अऊ जम्मो घरेलू-पसुमन, हे पेट के बल रेंगइया जीव अऊ उड़इया चिरईमन,

¹¹ हे धरती के राजामन अऊ जाति-जाति के जम्मो मनखेमन, हे हाकिम अऊ धरती ऊपर जम्मो सासन करइया मनखेमन,

¹² हे जवान मनखे अऊ माईलोगनमन, हे सियान मनखे अऊ लइकामन।

¹³ तुमन जम्मो यहोवा के नांव के परसंसा करव, काबरकि सिरिप ओकर नांव ही ऊपर करे जाथे; ओकर सोभा ह धरती अऊ अकास के ऊपर हवय।

¹⁴ अऊ ओह अपन मनखेमन बर एक सींग खड़े करे हवय, जऊन ह कि ओकर जम्मो बिसवासयोग्य सेवकमन के, इसरायल के अऊ ओकर दिल के करीब के मनखेमन के परसंसा के बिसय ए। यहोवा के परसंसा करव।