भजन-संहिता 141 - पबितर बाईबलसमकालीन छत्तीसगढ़ी अनुवाद

भजन-संहिता 141

दाऊद के एक भजन।

¹ हे यहोवा, मेंह तोला पुकारत हंव, मोर करा जल्दी आ; जब मेंह तोला पुकारंव, त मोर बात ला सुन।

² मोर पराथना ह तोर आघू म खुसबूदार धूप के सहीं होवय; मोर हांथ के ऊपर उठई सांझ के बलिदान सहीं होवय।

³ हे यहोवा, मोर मुहूं म एक पहरेदार बईठा दे; मोर ओंठ रूपी दुवार के रखवारी कर।

⁴ मोर मन ला दुस्टमन कोति झन लगा ताकि मेंह ओ दुस्ट काम करइयामन संग ओमन के दुस्ट काम म भाग झन लेवंव; मोला ओमन के सुवादवाले जेवन ला झन खावन दे।

⁵ धरमी जन ह मोला मारय—मोर ऊपर येह एक दया के बात होही; ओह मोला डांटय—येह मोर मुड़ म तेल चुपरे सहीं होही। मोर मुड़ ह येला इनकार नइं करही, काबरकि मोर पराथना ह तब भी दुस्ट काम करइयामन के बिरूध होही।

⁶ ओमन के सासन करइयामन ला खड़े चट्टान म ले फटिक दिये जाही, अऊ दुस्ट मनखेमन जान जाहीं कि मोर बातमन सही अंय।

⁷ ओमन कहिहीं, “जइसे नांगर जोते के बाद माटी ह टूटके बिखर जाथे, वइसे ही हमर हाड़ामन ला कबर के मुहूं म बगरा दिये गे हवय।”

⁸ पर हे परमपरधान यहोवा, मोर आंखी ह तोर ऊपर लगे हवय; तोर करा मेंह सरन लेथंव—मोला मिरतू के हांथ म झन दे।

⁹ मोला दुस्टमन के लगाय गय फांदा ले बचा, ओ फांदा जेला ओमन मोर बर लगाय हवंय।

¹⁰ दुस्टमन अपन लगाय गय जाल म खुद फंसंय, अऊ मेंह सही-सलामत बचके निकल जावंव।