भजन-संहिता 137 - पबितर बाईबलसमकालीन छत्तीसगढ़ी अनुवाद

भजन-संहिता 137

¹ बेबिलोन देस के नदीमन के तीर म हमन बईठेंन अऊ सियोन ला सुरता करके रोए लगेंन।

² उहां चिनार रूखमन म हमन अपन बीना ला टांग देंन,

³ काबरकि जऊन मन हमन ला बंधुवा बनाके ले गे रिहिन, ओमन उहां हमन ला गीत गाय बर कहिन, हमन ला सतानेवालामन हमन ला आनंद के गीत गाय बर कहिन; ओमन कहिन, “हमर बर सियोन के एक गीत गावव!”

⁴ एक आने देस म हमन यहोवा के गीत कइसे गा सकत हन?

⁵ हे यरूसलेम, यदि मेंह तोला भूल जावंव, त मोर जेवनी हांथ अपन योग्यता ला भूल जावय।

⁶ यदि मेंह तोला सुरता नइं करंव, यदि मेंह यरूसलेम ला अपन सबले बड़े आनंद नइं मानंव, त मोर जीभ ह मोर तालू ले चपक जावय।

⁷ हे यहोवा, सुरता कर कि ओ दिन एदोमीमन का करिन, जब यरूसलेम ला गिराय गीस। ओमन चिचियाके कहिन, “येला फोरके गिरा दव, येला येकर नीव ले गिरा दव!”

⁸ हे बेटी बेबिलोन, तोर बिनास होवय, ओ मनखे ह खुस रहय, जऊन ह ओ अतियाचार के मुताबिक तोर ले बदला लेथे, जेला तेंह हमर ऊपर करे हस।

⁹ ओ मनखे ह खुस रहय, जऊन ह तोर लइकामन ला पकड़के चट्टान ऊपर पटक देथे।