भजन-संहिता 13 - पबितर बाईबलसमकालीन छत्तीसगढ़ी अनुवाद

भजन-संहिता 13

संगीत के निरदेसक बर दाऊद के एक भजन।

¹ हे यहोवा, कब तक? का तेंह मोला हमेसा बर भुला जाबे? कब तक तेंह अपन चेहरा ला मोर ले छुपाय रहिबे?

² कब तक मेंह अपन बिचार म फंसे रहिहूं अऊ हर दिन अपन मन म दुखी होवत रहिहूं? कब तक मोर बईरी ह मोर ऊपर जय पावत रहिही?

³ हे यहोवा मोर परमेसर, मोर कोति देख अऊ जबाब दे, मोर आंखी ला देखे के सक्ति दे, नइं तो मेंह मिरतू के नींद म सो जाहूं,

⁴ नइं तो मोर बईरी ह कहिही, “मेंह ओला जीत डारे हंव,” अऊ मोर बईरीमन आनंद मनाहीं, जब में गिर जाहूं।

⁵ पर मेंह तोर अब्बड़ मया ऊपर भरोसा रखथंव; मोर हिरदय ह तोर उद्धार म आनंद मनाथे।

⁶ मेंह यहोवा के गीत गाहूं, काबरकि ओह मोर भलई करे हवय।