गनती 34 - पबितर बाईबलसमकालीन छत्तीसगढ़ी अनुवाद

कनान देस के सीमना

¹ यहोवा ह मूसा ला कहिस,

² “इसरायलीमन ला हुकूम देके कह: ‘जब तुमन कनान देस म जावव, त जऊन भुइयां तुमन ला उत्तराधिकार के रूप म दिये जाही, ओकर ये सीमना होवय:

³ “ ‘तुम्हर दक्खिन कोति सीन के सुन्ना जगह के कुछू भाग घलो होही, जऊन ह एदोम के सीमना ए। तुम्हर दक्खिनी सीमना ह पूरब म मिरतू सागर के दक्खिनी छोर ले सुरू होही,

⁴ अऊ अकरबीम चढ़ई के दक्खिन के पार सीन कोति आही अऊ कादेस-बरने नगर के दक्खिन तक जाही। तब येह हाजार-अद्दार तक जाके असमोन तक जाही,

⁵ असमोन ले मुड़के मिसर के नरवा म जुड़ जाही अऊ भूमध्य सागर म खतम होही।

⁶ तुम्हर पछिमी सीमना ह भूमध्य सागर के किनारा होही। येह पछिम म तुम्हर सीमना होही।

⁷ अपन उत्तरी सीमना बर, भूमध्य सागर ले होर पहाड़ तक एक लकीर खींचव

⁸ अऊ होर पहाड़ ले लेबो-हमात सहर तक ये लकीर जाही। तब सीमना ह सेदाद नगर तक जाही,

⁹ अऊ जिपरोन तक बढ़के हसर-एनान करा खतम होही। येह उत्तर म तुम्हर सीमना होही।

¹⁰ अपन पूरब के सीमना बर, हसर-एनान ले सपाम तक एक लकीर खींचव।

¹¹ सीमना ह सपाम ले खाल्हे ऐन के पूरब कोति रिबला तक जाही अऊ ढलान म बढ़त गलील समुंदर के पूरब तक जाही।

¹² तब सीमना ह खाल्हे यरदन के तीरे-तीर जाही अऊ मिरतू सागर करा खतम होही। “ ‘चारों कोति अपन सीमना के संग येह तुम्हर देस होही।’ ”

¹³ मूसा ह इसरायलीमन ला हुकूम दीस: “चिट्ठी डारके ये देस ला बांटव, अऊ ओमन ला उत्तराधिकार के रूप म दे दव। यहोवा के हुकूम अय कि ये देस साढ़े नौ गोत्रमन ला दिये जावय,

¹⁴ काबरकि रूबेन के गोत्र, गाद के गोत्र अऊ मनस्से के आधा गोत्र के परिवारमन अपन उत्तराधिकार पा गे हवंय।

¹⁵ ये ढाई गोत्र के मनखेमन सूरज निकले के दिसा म, यरीहो के ओ पार, यरदन के पूरब म अपन उत्तराधिकार पा गे हवंय।”

¹⁶ फेर यहोवा ह मूसा ला कहिस,

¹⁷ “एलिआजर पुरोहित अऊ नून के बेटा यहोसू ओ मनखेमन के नांव अय, जेमन के ऊपर ये देस ला बांटके तुमन ला उत्तराधिकार म देय के जिम्मेदारी हवय।

¹⁸ अऊ हर एक गोत्र ले एक अगुवा ठहिरा, जेमन ये देस ला बांटे म मदद करहीं।

¹⁹ “ओमन के नांव ये अय: “यहूदा के गोत्र ले, यपुन्ने के बेटा कालेब;

²⁰ सिमोन के गोत्र ले, अमीहूद के बेटा समूएल;

²¹ बिनयामीन के गोत्र ले, किसलोन के बेटा एलीदाद;

²² दान के गोत्र ले, योगली के बेटा बुक्की ह अगुवा रिहिस;

²³ यूसुफ के बेटा मनस्से के गोत्र ले, एपोद के बेटा हन्नीएल ह अगुवा रिहिस;

²⁴ यूसुफ के बेटा एपरैम के गोत्र ले, सिपतान के बेटा कमूएल ह अगुवा रिहिस;

²⁵ जबूलून के गोत्र ले, परनाक के बेटा एलीसापान ह अगुवा रिहिस;

²⁶ इस्साकार के गोत्र ले, अज्जान के बेटा पलतीएल ह अगुवा रिहिस;

²⁷ आसेर के गोत्र ले, सलोमी के बेटा अहीहूद ह अगुवा रिहिस;

²⁸ अऊ नपताली के गोत्र ले, अमीहूद के बेटा पदहेल ह अगुवा रिहिस।”

²⁹ येमन ओ मनखे अंय, जेमन ला यहोवा ह कनान देस म इसरायलीमन ला उत्तराधिकार बांटे के हुकूम दीस।