गनती 17 - पबितर बाईबलसमकालीन छत्तीसगढ़ी अनुवाद

हारून के लउठी म अंकुर निकलई

¹ फेर यहोवा ह मूसा ला कहिस,

² “इसरायलीमन ले गोठिया अऊ ओमन ले बारह ठन लउठी ले, ओमन के पुरखा के गोत्र के हर अगुवा ले एक ठन लउठी। हर एक अगुवा के नांव ओकर लउठी म लिख।

³ लेवी के लउठी म हारून के नांव लिख, काबरकि हर गोत्र के मुखिया के नांव म एक लउठी होना चाही।

⁴ ओ लउठीमन ला मिलापवाला तम्बू म करार कानून के सन्दूक के आघू म रख, जिहां मेंह तुम्हर ले मिलथंव।

⁵ तब ओ मनखे जेला मेंह चुनहूं, ओकर लउठी म पीका निकलही, अऊ इसरायलीमन तोर बिरूध म जऊन लगातार बड़बड़ावत हें, ओकर ले मेंह अपनआप ला अलग कर लूहूं।”

⁶ त मूसा ह इसरायलीमन ले बात करिस, अऊ ओमन के अगुवामन ओला बारह ठन लउठी दीन, ओमन के पुरखा के गोत्र के हर अगुवा बर एक ठन लउठी, अऊ हारून के लउठी घलो ओमा रिहिस।

⁷ मूसा ह लउठीमन ला करार कानून के तम्बू म यहोवा के आघू म रखिस।

⁸ ओकर दूसर दिन मूसा ह तम्बू के भीतर गीस, त ओह देखिस कि लेवी गोत्र के हारून के लउठी म सिरिप पीका ही नइं निकले रिहिस, पर ओमा कली निकलके, फूल फूटके ओमा बादाम फर भी लगे रिहिस।

⁹ तब मूसा ह जम्मो लउठी ला यहोवा के आघू ले निकालके इसरायलीमन करा ले आईस। ओमन लउठीमन ला देखिन, अऊ हर एक अगुवा ह अपन-अपन लउठी ला ले लीस।

¹⁰ तब यहोवा ह मूसा ला कहिस, “हारून के लउठी ला करार कानून के सन्दूक के आघू म वापिस रख दे, ताकि येह बिदरोहीमन बर एक चिनहां के रूप म रहय। येह मोर बिरूध ओमन के बड़बड़ई ला खतम कर दीही, अऊ ओमन नइं मरहीं।”

¹¹ मूसा ह वइसे ही करिस, जइसे यहोवा ह ओला हुकूम दे रिहिस।

¹² इसरायलीमन मूसा ले कहिन, “हमन मर जाबो! हमन भटक गे हन, हमन जम्मो झन भटक गे हन!

¹³ जऊन ह यहोवा के पबितर-तम्बू के लकठा म भी आही, ओह मर जाही। का हमन जम्मो के जम्मो मर जाबो?”