यसायाह 4 - पबितर बाईबलसमकालीन छत्तीसगढ़ी अनुवाद

¹ ओ दिन सात माईलोगनमन एक पुरूस ला धरके कहिहीं, “रोटी तो हमन अपन खुद के खाबो अऊ ओनहा घलो अपन खुद के पहिरबो; सिरिप तेंह हमन ला अपन नांव देय दे। हमर कलंक ला दूर कर दे!”

यहोवा के डारा

² ओ दिन यहोवा के डंगाली ह सुघर अऊ महिमामय होही, अऊ देस के फर ह इसरायल के बांचे मनखेमन बर घमंड अऊ महिमा के बात होही।

³ जऊन मन सियोन म बांचे रहिहीं, जऊन मन यरूसलेम म रहिहीं, याने कि ओ जम्मो जेमन के नांव यरूसलेम म जीयतमन के बीच म लिखे गे हवय, ओमन पबितर कहे जाहीं।

⁴ परभू ह सियोन के माईलोगनमन के गंदगी ला धो दीही; ओह नियाय के आतमा अऊ आगी के आतमा के दुवारा यरूसलेम ले खून के दागमन ला साफ कर दीही।

⁵ तब यहोवा ह जम्मो सियोन पहाड़ ऊपर अऊ ओ जम्मो जऊन मन उहां जूरहीं, ओमन ऊपर दिन के बेरा धुआं के एक बादर अऊ रथिया के बेरा धधकत आगी के एक अंजोर देखाही; अऊ जम्मो के ऊपर परमेसर के महिमा के एक मंडप छाय रहिही।

⁶ येह दिन के गरमी बर एक आसरय अऊ छइहां, अऊ आंधी अऊ पानी ले बचे बर एक सरन-स्थान अऊ लुकाय के जगह होही।