यसायाह 3 - पबितर बाईबलसमकालीन छत्तीसगढ़ी अनुवाद

यहूदा अऊ यरूसलेम ऊपर दंड

¹ देखव अब, परभू, सर्वसक्तिमान यहोवा ह यरूसलेम सहर अऊ यहूदा प्रदेस बर जरूरी चीज अऊ मदद देवई ला बंद करइया हवय: जम्मो जेवन के चीज अऊ जम्मो पानी के पूरती,

² बीर अऊ योद्धा, नियायधीस अऊ अगमजानी, सकुन-बिचार करइया अऊ अगुवा,

³ पचास सैनिकमन के मुखिया अऊ उच्च पदवाला मनखे, सलाहकार अऊ कुसल कारीगर अऊ चतुर जादूगर, जम्मो के जम्मो ला हटा लीही।

⁴ “मेंह सिरिप जवानमन ला ओमन के अधिकारी बनाहूं; लइकामन ओमन ऊपर सासन करहीं।”

⁵ मनखेमन एक-दूसर के ऊपर अतियाचार करहीं— मनखे के बिरूध मनखे, परोसी के बिरूध परोसी होहीं। जवानमन डोकरामन के बिरूध अऊ तुछ मनखेमन आदरनीय मनखेमन के बिरूध ठाढ़ होहीं।

⁶ ओ समय एक मनखे ह अपन ददा के घर म अपन भाई ला पकड़के कहिही, “तोर करा एक बने ओनहा हवय, तेंह हमर अगुवा बन जा; अऊ ये देस, जऊन ह उजर गे हवय, ओला अपन अधीन कर ले!”

⁷ पर ओ दिन ओह चिचियाके कहिही, “मोर करा येकर कोनो ईलाज नइं ए। मोर घर म न तो जेवन हवय अऊ न ही ओनहा; एकरसेति तुमन मोला मनखेमन के अगुवा झन बनावव।”

⁸ यरूसलेम तो डगमगावथे, अऊ यहूदा गिरत हे; काबरकि ओमन के बचन अऊ काम यहोवा के बिरूध हवंय, ओमन ओकर महिमामय उपस्थिति के परवाह नइं करत हवंय।

⁹ ओमन के चेहरा ओमन के बिरूध गवाही देथे; ओमन सदोमीमन के सहीं अपन पाप ला बताथें; ओमन ओला नइं लुकावंय। ओमन ऊपर हाय! ओमन अपन ऊपर बिपत्ति लाय हवंय।

¹⁰ धरमीमन ला बतावव कि ओमन के भलई होही, काबरकि ओमन अपन काम के फर के आनंद उठाहीं।

¹¹ दुस्टमन ऊपर हाय! ओमन ऊपर घोर बिपत्ति हवय! काबरकि जऊन दुस्ट काम ओमन करे हवंय, ओकर फर ओमन ला मिलही।

¹² जवानमन मोर मनखेमन ऊपर अतियाचार करथें, अऊ माईलोगनमन ओमन ऊपर सासन करथें। हे मोर मनखेमन, तुम्हर रसता बतइयामन तुमन ला भटका देथें; ओमन तुमन ला डहार ले आने कोति ले जाथें।

¹³ यहोवा ह अदालत म अपन जगह बईठथे; ओह मनखेमन के नियाय करे बर ठाढ़ होथे।

¹⁴ यहोवा ह अपन मनखेमन के सियान अऊ अगुवामन के बिरूध नियाय सुरू करथे: “येह तुमन अव, जेमन मोर अंगूर के बारी ला नास कर दे हव; अऊ गरीबमन ले लूटे गय चीजमन तुम्हर घर म हवंय।

¹⁵ मोर मनखेमन ला कुचरे अऊ गरीब मनखेमन के चेहरा ला पीसे के तुम्हर का मतलब अय?” परभू, सर्वसक्तिमान यहोवा ह घोसना करत हे।

¹⁶ यहोवा ह कहिथे, “सियोन के माईलोगनमन घमंडी अंय, ओमन अपन मुड़ उठाके आंखी ले नकली मया देखावत, अपन गोड़ म घुंघरू के अवाज के संग अकड़के एड़ी मटकावत चलथें।

¹⁷ एकरसेति परभू ह सियोन के माईलोगनमन के मुड़ ला फोड़ामन ले भर दीही; यहोवा ह ओमन के मुड़ ला चंदवा कर दीही।”

¹⁸ ओ दिन परभू ह ओमन के दिखावटी बेसभूसा ला छीन लीही: याने कि ओमन के चूड़ी अऊ मुड़ के फीता, आधा चंदा सहीं हार,

¹⁹ कान के फूली अऊ कंगन अऊ ओढ़नी,

²⁰ पगड़ी अऊ पायल अऊ करधनी, इतर के सीसी अऊ बाजूबंद,

²¹ मुहरवाला मुंदरी अऊ नथनी,

²² सुघर ओनहा अऊ बिगर बाहां के बंडी अऊ कुरतामन, बटुवा,

²³ अऊ दरपन, अऊ मलमल के ओनहा अऊ मुकुट अऊ दुसालामन ला छीन लीही।

²⁴ खुसबू के जगह बदबू; करधनी के जगह म रस्सी; सुघर गांथे बाल के जगह म ठेकली मुड़; सुघर ओनहा के जगह म बोरा के ओनहा; अऊ सुन्दरता के जगह म बदसूरती होही।

²⁵ तुम्हर मनखेमन तलवार ले, अऊ तुम्हर योद्धामन लड़ई म मारे जाहीं।

²⁶ सियोन के दुवारमन रोहीं अऊ बिलाप करहीं; गरीबी म, ओह भुइयां म बईठे रहिही।