यसायाह 2 - पबितर बाईबलसमकालीन छत्तीसगढ़ी अनुवाद

यहोवा के पहाड़

¹ आमोस के बेटा यसायाह ह यहूदा अऊ यरूसलेम के बारे म ये दरसन देखिस:

² आखिरी के दिनमन म, यहोवा के मंदिर के पहाड़ ह सबले ऊंच पहाड़ के रूप म स्थापित करे जाही; येला जम्मो पहाड़ीमन ले ऊंचहा करे जाही, अऊ जम्मो जाति के मनखेमन पानी के धारा सहीं येकर करा आहीं।

³ बहुंते मनखेमन आके कहिहीं, “आवव, हमन यहोवा के पहाड़ ऊपर, याकूब के परमेसर के मंदिर म चलन। ओह हमन ला अपन नियम-कानून सिखोही, ताकि हमन ओकर रसता म चलन।” कानून ह सियोन ले, यहोवा के बचन ह यरूसलेम ले निकलही।

⁴ ओह जाति-जाति के नियाय करही, अऊ बहुंते मनखेमन के झगरा के निपटारा करही। ओमन अपन तलवारमन ला पीट-पीटके नांगर के फाल अऊ अपन बरछीमन ला हंसिया बना डारहीं। एक जाति ह आने जाति के बिरूध लड़ई नइं करही, अऊ न ही ओमन फेर लड़ई करे के सिकछा दीहीं।

⁵ हे याकूब के संतानमन, आवव, हमन यहोवा के अंजोर म चलन।

यहोवा के दिन

⁶ हे यहोवा, तेंह अपन मनखे, याकूब के संतानमन ला तियाग दे हवस। ओमन पूरब के मनखेमन सहीं पूरा अंधबिसवास ले भरे हवंय; ओमन पलिस्तीमन सहीं टोनहा करथें अऊ मूरती-पूजकमन के रीति-रिवाज म चलथें।

⁷ ओमन के देस ह सोन अऊ चांदी ले भरे हवय; ओमन के दुवारा जमा करे गय धन के कोनो सीमा नइं ए। ओमन के देस ह घोड़ामन ले भरे हवय; अऊ ओमन करा अनगिनत रथमन हवंय।

⁸ ओमन के देस ह मूरतीमन ले भरे हवय; ओमन अपन हांथ के काम, अपन अंगरी ले बनाय चीजमन ला दंडवत करथें।

⁹ एकरसेति मनखेमन ला झुकाय जाही अऊ हर एक जन नम्र करे जाहीं— ओमन ला छेमा झन कर।

¹⁰ यहोवा के भययुक्त उपस्थिति अऊ ओकर गौरव के सोभा के कारन चट्टान म घुसर जावव अऊ भुइयां म लुका जावव!

¹¹ घमंडी के आंखी ला झुकाय जाही अऊ मनखे के घमंड ला टोरे जाही; ओ दिन सिरिप यहोवा ला ही ऊपर करे जाही।

¹² काबरकि यहोवा ह एक दिन ला ठहिराय हवय जब सबो घमंडी अऊ अहंकारी, अऊ जऊन मन अपनआप ला ऊपर उठाय हवंय, (ओमन के घमंड ला टोरे जाही),

¹³ काबरकि लबानोन के जम्मो ऊंच अऊ बड़े देवदार रूख, अऊ बासान के जम्मो बलूत रूख,

¹⁴ जम्मो ऊंच पहाड़ अऊ जम्मो ऊंच पहाड़ीमन,

¹⁵ हर एक ऊंच मीनार अऊ हर एक किलाबंदीवाला दीवार,

¹⁶ हर एक बेपारी पानी जहाज अऊ हर एक महत्व के चीजमन ला गिराय जाही।

¹⁷ मनखे के घमंड अऊ मनखे के अहंकार ला टोरे जाही; ओ दिन सिरिप यहोवा ला ही ऊपर करे जाही,

¹⁸ अऊ मूरतीमन सब के सब नास हो जाहीं।

¹⁹ जब यहोवा ह धरती ला कंपवाय बर उठही, तब ओकर भययुक्त उपस्थिति अऊ ओकर गौरव के सोभा ले डरके मनखेमन भागहीं अऊ चट्टान के गुफा अऊ भुइयां के बिल म जाके लुका जाहीं।

²⁰ ओ दिन मनखेमन छूछू अऊ चमगीदड़मन के आघू म अपन सोन अऊ चांदी के मूरतीमन ला फेंक दीहीं, जेमन ला ओमन दंडवत करे बर बनाय रिहिन।

²¹ जब यहोवा ह धरती ला कंपवाय बर उठही, त ओकर भययुक्त उपस्थिति अऊ ओकर गौरव के सोभा ले डरके ओमन भागहीं अऊ चट्टानमन के गुफा अऊ चट्टानमन के दरार म लुका जाहीं।

²² मनखेमन ऊपर भरोसा करई छोंड़ दव, जेमन करा सिरिप एक सांस ओमन के नथुना म हवय। ओमन के काबर आदर करे जावय?