एस्तर 8 - पबितर बाईबलसमकालीन छत्तीसगढ़ी अनुवाद

यहूदीमन बर राजा के हुकूम

¹ ओहीच दिन राजा छयर्स ह यहूदीमन के बईरी, हामान के घर-बार अऊ जमीन-बारी एस्तर रानी ला दे दीस। अऊ मोरदकै ह राजा के आघू म आईस, काबरकि एस्तर ह मोरदकै के संग अपन रिस्तेदारी के बारे म राजा ला बता दे रिहिस।

² तब राजा ह अपन ओ राज मुहरवाला मुंदरी ला निकालिस, जऊन ला ओह हामान ले लेय ले रिहिस, अऊ ओ मुंदरी ला मोरदकै ला दे दीस। अऊ एस्तर ह मोरदकै ला हामान के घर-बार अऊ जमीन-बारी के अधिकारी ठहिराईस।

³ एस्तर ह राजा के गोड़ खाल्हे गिरके अऊ रोवत ओकर ले फेर बिनती करिस। ओह बिनती करके कहिस कि अगागी हामान ह यहूदीमन के बिरूध म जऊन हानि करे के योजना बनाय रिहिस, ओला खतम कर दिये जावय।

⁴ तब राजा ह एस्तर कोति सोन के राजदंड ला बढ़ाईस अऊ एस्तर ह उठिस अऊ राजा के आघू म ठाढ़ हो गीस।

⁵ ओह फेर बिनती करके कहिस, “यदि ये बात राजा ला बने लगथे, अऊ यदि ओकर दया-दिरिस्टी मोर ऊपर हवय अऊ ओह सोचथे कि अइसने करई ह सही अय, अऊ यदि ओह मोर ले खुस हवय, त जऊन आदेस हम्मदाता अगागी के बेटा हामान ह राजा के राज के जम्मो इलाका म यहूदीमन ला नास करे के खातिर लिखके पठोय रिहिस, ओ आदेस ला खारिज कर दिये जावय।

⁶ काबरकि मोर मनखेमन ऊपर बिपत्ति आवय, येला मेंह देख नइं सकंव। मेंह अपन परिवार के बिनास ला कइसे देख सकत हंव?”

⁷ तब राजा छयर्स ह एस्तर रानी ला अऊ यहूदी मोरदकै ला कहिस, “काबरकि हामान ह यहूदीमन ऊपर हमला करिस, एकरसेति मेंह ओकर घर-बार अऊ जमीन-बारी एस्तर ला देय दे हंव, अऊ ओला ओकर गड़वाय खंभा म टांग दिये गे हवय।

⁸ अब जइसने तुमन ला बने लगे, वइसने तुमन राजा के नांव म यहूदीमन बर लिखव, अऊ ओमा राजा के मुंदरी के मुहर घलो लगावव—काबरकि जऊन कागजात ह राजा के नांव म लिखे जावय अऊ ओमा राजा के मुंदरी के मुहर लगय, ओला कोनो खारिज नइं कर सकय।”

⁹ त ओहीच बेरा याने कि सीवान नांव के तीसरा महिना के तेईसवां दिन, राजा के सचिवमन ला बलाय गीस अऊ ओमन मोरदकै के दिये जम्मो हुकूम ला यहूदीमन ला, अऊ भारत ले लेके कूस तक के 127 राज के बड़े हाकिममन, राजपालमन अऊ परभावसाली मनखेमन ला लिखिन। ये हुकूममन ला हर राज के लिपि अऊ हर जाति के मनखेमन के भासा म लिखे गीस। ये जम्मो हुकूम ला यहूदीमन ला ओमन के लिपि अऊ भासा म घलो लिखे गीस।

¹⁰ मोरदकै ह राजा छयर्स के नांव म लिखिस अऊ ओ कागजात म राजा के मुंदरी के मुहर लगाईस, अऊ ओ कागजातमन ला ओ घुड़सवारी करइया दूतमन के हांथ म पठो दीस, जऊन मन बिसेस करके राजा बर तेज घुड़सवारी करंय।

¹¹ राजा के साही हुकूम ले हर सहर म यहूदीमन ला अधिकार मिलिस कि ओमन जूरंय अऊ अपनआप के बचाव करंय; कोनो भी जाति या राज के हथियारबंद मनखेमन ओमन अऊ ओमन के माईलोगनमन अऊ लइकामन ऊपर हमला करंय, त ओमन ओ हथियारबंद मनखेमन ला नास कर देवंय, मार डारंय अऊ ओमन के नामोनिसान मिटा देवंय, अऊ अपन बईरीमन के संपत्ति ला लूट लेवंय।

¹² राजा छयर्स के जम्मो राज म, ये काम ला करे बर यहूदीमन खातिर एक दिन ठहिराय गीस, अऊ ओ दिन ह अदार नांव के बारहवां महिना के तेरहवां दिन रिहिस।

¹³ ये साही हुकूम के एक-एक नकल कानून के रूप म जम्मो राज म पठोय गीस अऊ हर एक जाति के मनखेमन ला बताय गीस, ताकि यहूदीमन ओ दिन अपन बईरीमन ले बदला लेय बर तियार रहंय।

¹⁴ राजा के हुकूम ले दूतमन साही घोड़ामन म सवार होके निकलिन अऊ आघू बढ़िन, अऊ साही हुकूम ह सूसनगढ़ के किला म ले दिये गीस।

यहूदीमन के बिजय

¹⁵ जब मोरदकै ह राजा करा ले निकलके गीस, त ओह नीला अऊ सफेद रंग के राजकीय कपड़ा पहिरे रिहिस अऊ ओकर मुड़ म सोन के मुकुट रहय अऊ ओह सुघर मलमल के बने बैंगनी रंग के बागा पहिरे रिहिस। अऊ सूसनगढ़ सहर के मनखेमन आनंद के मारे जय-जयकार करिन।

¹⁶ यहूदीमन बर, येह खुसी, आनंद अऊ आदरमान के बेरा रिहिस।

¹⁷ ओ हर राज अऊ सहर, जिहां भी राजा के साही हुकूम आईस, उहां यहूदीमन आनंद अऊ खुसी ले भर गीन, अऊ ओमन जेवनार करके उत्सव मनाईन। अऊ आने जाति के बहुंते मनखेमन यहूदी बन गीन, काबरकि ओमन के मन म यहूदीमन के डर हमा गे रिहिस।