सभोपदेसक 1 - पबितर बाईबलसमकालीन छत्तीसगढ़ी अनुवाद

हर चीज ह बेकार ए

¹ दाऊद के बेटा, यरूसलेम म राजा, गुरू के बचन:

² “बेकार! बेकार!” गुरू ह कहिथे। “एकदम बेकार! हर चीज ह बेकार अय।”

³ धरती ऊपर मनखे के दुवारा करे गे ओकर जम्मो मेहनत के का मिलथे?

⁴ पीढ़ी-पीढ़ी ले मनखेमन आथें अऊ ओमन चले जाथें, पर धरती ह सदाकाल बर बने रहिथे।

⁵ सूरज निकलथे अऊ सूरज बुड़थे, अऊ बिगर देरी करे येह फेर अपन निकले के जगह म वापिस चले जाथे।

⁶ हवा ह दक्खिन कोति बहथे अऊ येह उत्तर कोति मुड़थे; गोल-गोल येह घुमथे, अऊ येह अपन घेरा म लहुंट आथे।

⁷ हालाकि जम्मो नदीमन बहके समुंदर म मिल जाथें, तभो ले समुंदर ह कभू पूरा नइं भरय। जऊन जगह ले नदीमन निकलके आथें, ओ जगह ला ओमन फेर लहुंट जाथें।

⁸ जम्मो चीजमन थका देनेवाला अंय, कोनो मनखे येकर बखान नइं कर सकय। आंखी ह देखके कभू संतोस नइं होवय, अऊ न ही कान ह सुनके संतोस होवय।

⁹ जऊन ह हो चुके हे ओहीच ह फेर होही, जेला करे जा चुके हवय, ओला फेर करे जाही; धरती म कुछू घलो नवां नइं ए।

¹⁰ का अइसन कुछू हवय, जेकर बारे म कोनो ये कह सकय, “देखव! येह कुछू नवां ए?” येह इहां पहिले ले रिहिस, बहुंत पहिले ले; येह इहां हमर समय के पहिले ले रिहिस।

¹¹ पहिले के पीढ़ीमन ला कोनो सुरता नइं करय, अऊ त अऊ अवइया पीढ़ीमन ला घलो ओमन के दुवारा सुरता नइं करे जाही जऊन मन ओमन के पाछू आहीं।

बुद्धि ह बेकार ए

¹² में, गुरू ह यरूसलेम म इसरायल के राजा रहेंव।

¹³ धरती म जऊन जम्मो काम करे जाथे, मेंह बुद्धि के दुवारा ओ जम्मो काममन ला जांचंय अऊ परखे बर अपन मन लगांय। येह एक भारी बोझ के काम ए, जेला परमेसर ह मानव-जाति ऊपर डार दे हवय!

¹⁴ मेंह ओ काम ला देखे हवंव, जेमन ला ये धरती म करे जाथे; ये जम्मो के जम्मो बेकार अंय अऊ हवा के पाछू भगई सहीं अय।

¹⁵ जऊन ह टेड़गा हे, ओला सीधा नइं करे जा सकय; जऊन ह हवय ही नइं, ओकर गनती नइं करे जा सकय।

¹⁶ मेंह अपनआप ले कहेंव, “देख, मोर पहिली यरूसलेम म जतेक भी राजा होईन, ओ जम्मो झन ले मेंह जादा बुद्धिमान अंव; मेंह जादा बुद्धि अऊ गियान के अनुभव करे हवंव।”

¹⁷ तब मेंह अपनआप ला बुद्धि के समझ, अऊ पागलपन अऊ मुरूखता ला जाने बर लगांय, पर मेंह समझ गेंव कि येह घलो हवा के पाछू भागे सहीं अय।

¹⁸ काबरकि जादा बुद्धि के संग जादा दुख आथे; जादा गियान बढ़े ले, दुख घलो जादा बढ़थे।