आमोस 2 - पबितर बाईबलसमकालीन छत्तीसगढ़ी अनुवाद

¹ यहोवा ह ये कहत हे: “मोआब के तीन पाप बल्कि चार पापमन के कारन मेंह ओला सजा देय बिगर नइं छोड़ंव। काबरकि ओह एदोम के राजा के हाड़ामन ला जलाके राख कर दीस,

² मेंह मोआब म आगी लगाहूं जऊन ह करियोत सहर के किलामन ला जलाके भसम कर दीही। मोआब ह बड़े हुल्लड़ म लड़ई के ललकार अऊ तुरही के अवाज के बीच नास हो जाही।

³ मेंह मोआब के सासन करइया ला अऊ ओकर संग जम्मो अधिकारीमन ला मार डारहूं,” यहोवा ह कहत हे।

⁴ यहोवा ह ये कहत हे: “यहूदा के तीन पाप, बल्कि चार पापमन के कारन, मेंह ओला सजा देय बिगर नइं छोड़ंव। काबरकि ओमन यहोवा के कानून ला नइं मानिन अऊ ओकर नियममन के पालन नइं करिन, काबरकि ओमन लबरा देवतामन के पाछू चल दीन, ओ देवता, जऊन मन के पाछू म ओमन के पुरखामन रेंगंय,

⁵ एकरसेति मेंह यहूदा म आगी लगाहूं जऊन ह यरूसलेम के किलामन ला भसम कर दीही।”

इसरायल के ऊपर नियाय

⁶ यहोवा ह ये कहत हे: “इसरायल के तीन पाप, बल्कि चार पापमन के कारन, मेंह ओला सजा देय बिगर नइं छोड़ंव। ओमन निरदोस ला चांदी बर अऊ गरीबमन ला एक जोड़ी जूता खातिर बेच देथें।

⁷ ओमन गरीबमन के मुड़ ला अइसन कुचरथें जइसन भुइयां के धुर्रा अऊ दुखी मनखे के नियाय ला बिगाड़थें। ददा अऊ बेटा दूनों एके छोकरी ले संबंध बनाथें अऊ मोर पबितर नांव ला अपबितर करथें।

⁸ ओमन हर बेदी के बाजू म गिरवी म रखे ओनहा ऊपर लेटथें। ओमन अपन देवता के घर म जुरबाना म लिये गय अंगूर के मंद ला पीथें।

⁹ “तभो ले मेंह अमोरीमन ला ओमन के आघू ले नास करेंव, हालाकि ओमन देवदार रूख सहीं ऊंचहा अऊ बलूत रूख सहीं मजबूत रिहिन। मेंह ऊपर ले ओमन के फर अऊ खाल्हे ओमन के जरी ला नास कर देंव।

¹⁰ मेंह तुमन ला मिसर देस ले निकाल लानेंव अऊ चालीस बछर ले सुनसान जगह म तुम्हर अगुवई करेंव ताकि तुमन ला अमोरीमन के देस ला दे दंव।

¹¹ “मेंह तुम्हर लइकामन के बीच ले अगमजानीमन ला अऊ तुम्हर जवानमन के बीच ले नाजीरमन ला घलो चुनेंव। हे इसरायल के मनखेमन, का येह सच नो हय?” यहोवा ह घोसना करत हे।

¹² “पर तुमन नाजीरमन ला अंगूर के मंद पीयाएव अऊ अगमजानीमन ला हुकूम देव कि ओमन अगमबानी झन करंय।

¹³ “त अब, मेंह तुमन ला अइसन कुचरहूं जइसन करपा ले भराय गाड़ी ले दाना ह कुचरे जाथे।

¹⁴ तेजी ले भगोइया घलो नइं बांच पाही, अऊ बलवान के ताकत ह कोनो काम नइं आही, अऊ सूरबीर ह अपन जिनगी ला नइं बचाय सकही।

¹⁵ धनुसधारी ह मैदान म ठाढ़ नइं हो सकही, तेजी ले दऊड़इया सैनिक ह भाग नइं सकही, अऊ घुड़सवार ह अपन जिनगी ला नइं बचाय सकही।

¹⁶ इहां तक कि सबले ताकतवर सूरबीरमन घलो ओ दिन नंगरा भागहीं,” यहोवा ह घोसना करत हे।