FILÍPHU KHÚBHƐ́NƐ́N 4 - Ebrié New Testament 1996

Áha bhwe Phɔ́lu étɔ

¹ Lóhɛ́nthé mɛn hɔnsɛ́nhɔn khɛ́n mɛn pɔ kpɛ́ɛ́n, hɔ́n khɛ́n ɔ́n ni néphan mɛɛ́n nɛn mɛn cu wú, hɔ́n khɛ́n ɔ́n ni néphan echɛ́ áphɔ há mɛn, hɔ́n khɛ́n mɛɛ́n gɛ mó hɔ́n pɛ fúmɛ́n; mɛn jɔn, hɔ́n mɛpɔ́bhá hrómɛn, tɛmɛ ɔ́n gɛlé ya Hwánthe phɔ.

² Evodi le Sɛnthisi ɔ́nmɔn, mɛɛ́n na hɔ́n, átɛ́ nfɛkhu, tɛmɛ ɔ́n nrwɛn, sa néphan ali hɔnmiáhɔn Hwánthe hɛ́n hrómɛn.

³ Ńthé hɛ lókɔn khɛ́n ɛli mɛn jɔ agɛlé ya mɛn phɔ júmán brɛ lókɔn hromɛn ɔn, mɛɛ́n mi hɛ sa ɛdɔnmán wo mɔ́n. Mɛn le Kleman, le mɛn phɔ júmánmán nánkhɛ khúnbrɛn ɔ́nmɔn nɔn okutha brɛ, ochɛ́sé Ábhwe Bhwábhwá opí si khúnbrɛn, wo lókɔn khɛ́n wo li néphan wo hɛ́n bha ńmɛpɔ́bhá hrɔ́ hrómɛn.

⁴ Ácí khúnbrɛn tɛmɛ ɔ́n ní phɔhá, hɔ́n le Hwánthe ɔ́nmɔn brɛ ɔ́n ni hɛ́nthé. Mɛn cu mɛɛ́n tɔ: Tɛmɛ ɔ́n ní phɔhá.

⁵ Tɛmɛ ɔ́n pɛ áyíbhwátɛ́ sé néphan khúnbrɛn. Ákhakpɛɛ́ Hwánthe bha bhá.

⁶ Ɔ́n ne tɛ́ dandan áyí khúnbrɛn hrómɛn, khɛ́n áka yábhɛ yábhɛ khúnbrɛn, ɔ́n khɔ́ yankanla hromɛn sá áyí emián hɔ́n Yankan yé, tɛmɛ ɔ́n sa yí ńthɛ́n pɛ́tɛ mɛn.

⁷ Ló Yankan thɛ́nkhwálé asrɛn ábhweyɛ́n khúnbrɛn bha khɔ́ Jezwi-Krisi hɛ́n hrómɛn bo hɔ́n thɛ́n le hɔ́n hɛ́nphebhú ɔ́nmɔn.

⁸ Ńthé hɔnsɛ́nhɔn, áyí ayɔn sa ɔ́n mó hɔ́n thɛ́n tré lótho nɔn olí: áyí ali mímí, áyí khúnbrɛn khɛ́n ógɛ bhó ájí se, áyí apriman, áyí lóphɔ chan, áyí ógɛ pɔ́, áyí ógɛ do, áyí ali áyí bhwábhwá le áyí khɛ́n ógɛ lri hwa ɔ́nmɔn.

⁹ Áyí mɛn nie hɔ́n, áyí mɛn mo se hɔ́n, le ábhwe khúnbrɛn khɛ́n mɛn tɔ se hɔ́n ye, le áyí khɛ́n mɛn tɛ se hɔ́n wu ɔn, hɔ́n lɔ tɛmɛ ɔ́n tɛ́ lóyí. Ló Yankan khɛ́n asé lephan thɛ́nkhwálé bha gɛ hɔ́n ɔ́nmɔn chré.

Phɔ́lu elá Filíphu khúbhɛ́nɛ́n nánsi, ńmɔ́ndɔ́nman yí nkɔn tɛ se hɛ́nthé

¹⁰ Mɛn ní phɔhá Hwánthe hɛ́n hrómɛn: ńthé khɛ́n ɔ́n cu hɔ́n etɛ́ yí lie mɛn salé ɔ́n pɔ mɛn. Mɛn bhwe bha hɔ́n mwanhɛ́n ákakhúnbrɛn tɛɛ, khɛ́n ńmɔ́nsi ɔ́n ne ka gɛ, lónɔn achɛse hɔ́n mɔ́ndɔ́nman yí le ka di mɛn ntakhú.

¹¹ Áleli salé áyíbɛn emián mɛn hɛ́nthé nɔn achɛ mɛɛ́n tɔ bhwe yábhɛ lókɔn a, khɛ́n mɛn-ɛ, mɛn yɛn salé kasé áyí tɛɛ aka mɛn mɔ́n mɛn, lópán mɛɛ́n sruimwa.

¹² Ágbre mɛn ni o, áyí búdúbúdú mɛn pɛ o, mɛn yɛn lósi mɛn khɔ́ tɛ́. Ákakhúnbrɛn le ási khúnbrɛn, kasé áko ehɔ́n mɛn lɔ, kasé áko le hɔ́n mɛn lɔ, kasé mɛn pɛ yí thúbhɔ, kasé mɛn pɛ yí kpɛɛ́ lɔ, mɛn yɛn lósi mɛn khɔ́ tɛ́.

¹³ Átɛsalé Krisi sɛ́npɛ́ khɛ́n ékhɔnmán mɛn phɔ hɛ́nthé nɔn achɛ mɛn gɛlé kpɛ́ɛ́n chre lóyí khúnbrɛn lókɔn hromɛn.

¹⁴ Lótɛ khɛ́n hɔ́n mɔ́n ɔ́n dɔnmán mɛn ɔn, áli áyíbhwá.

¹⁵ Filíphu khúbhɛ́nɛ́n, lóka mɛn mɔhɛ́n mɛɛ́n tɔ Ábhwe Bhwábhwá, khɛ́n mɛn chan Masedwánɛn no, hɔ́n nbrɛn lɔ ɔ́n yɛn salé lóka yábhɛ lókɔn ɔn, hɔ́n míbrɛ nɔn ɔ́n ni Yankan-nkhú adɔnman mɛn mɔ́n, mɛn pɛnsɔ́n hrómɛn le mɛn yíkhúphɔ hromɛn.

¹⁶ Lóka mɛn ma Tesaloníkhi khúbhɛ́, ále mɔn lɔ khɛ́n, ńdɔn búdúbúdú ɔ́n thu mɛn áyí emián mɛn.

¹⁷ Léli salé ńmɔ́ndɔ́nman yí pán mɛɛ́n nɛn a; khɛ́n mɛɛ́n nɛn salé hɔ́n yí khúnbrɛn lókɔn ɔ́n tɛ, hɔ́n lɔ ɔ́n gɛ ápɔ́ yíbɛn lóhrómɛn.

¹⁸ Hɔ́n yí tɛɛ ɔ́n thu mɛn, mɛn gɛ lókhúnbrɛn, áthúbhɔ kábrɛ. Ephafrodite cí tɛɛ abho hɔ́n mɔ́ndɔ́nman yí bha se mɛn, álepɛ yíɛkɛ égbɔ mɛn npɔhɔ́n. Hɔ́n pɔ́ yí lókɔn tɛsa ńphaha yíbɛn esɔ́n yɔ́n, áli áyíbɛn Yankan dɛn do ló élimɛn.

¹⁹ Mɛn Nthe Yankan jayí apɛ, khɛ́n ali mɛ́n nguhá yí, áyí tɛɛ emián hɔ́n, ánman khɔ́ Jezwi-Krisi hɛ́n hrómɛn sé hɔ́n lókhúnbrɛn.

²⁰ Tɛmɛ ńguhá ogɛ lo The Yankan ácí khúnbrɛn. Amɛn.

Phɔ́lu néphan ébhi aphuji

²¹ Jezwi-Krisi hɛ́n hrómɛn, mɛɛ́n mi Yankan-gbemán khúnbrɛn. Hɔnsɛ́nhɔn abha mɛn phɔ lɔ ébhi hɔ́n.

²² Yankan-gbemán khúnbrɛn abha krɛn ébhi hɔ́n. Khɛ́n wo a, wo bha athe khó bháthó, wo nɔn wo ébhi hɔ́n thúbhɔ.

²³ Ló tɛmɛ lo Hwánthe Jezwi-Krisi phɔlíman obhá hɔ́n khúnbrɛn phɔ.