FILÍPHU KHÚBHƐ́NƐ́N 2 - Ebrié New Testament 1996

Lósi Krisi khɔ hɔn mɛ́n nbrɛn bhathé le lósi ńkhɔ ni lephan khó

¹ Wú Krisi mímíbhú ase hɔ́n echɛ́ hɔ́n khɔnman? Wú mɛ́n pɔ́ echɛ́ hɔ́n khɔnmán phɔ? Wú hɔ́n le Nánnánmi Créncré ɔ́nmɔn ɔ́n ni brɛ? Wú ɔ́n pɛ ápɔ́ le áyíbhwátɛ́ ɔ́nmɔn bha hɔ́n bɛn nbrɛn thethé?

² Kasé áli nɛn, ló ɔ́n chɛ́ áphɔ okhwá mɛn lé hɔ́n mɛ́nbrɛlí hrómɛn, ɔ́n pɛ ápɔ́ míbrɛ, ló hɔ́n thɛ́n le hɔ́n hɛ́nphebhú ɔ́nmɔn olí brɛ.

³ Ɔ́n ne bhó áswan nánnánmi tɛ́ yí, saji ɔ́n ne nɛn ńguhá wrɛ́, khɛ́n ɔ́n pɛ nfɛkhu yítɛ́ bhá hɔ́n bɛn nbrɛn thethé, ochɛ́sé lephan brɛ obhú salé mɛ́n jɔ banbrɛn.

⁴ Lephan brɛ ole thɔ́n mɛ́n míbrɛ pán, lókhɛ́n tɛmɛ anthɔ́n néphan nánkhɛ lɔ.

⁵ Hɔ́n thethé, hɔ́n yítɛ́ okhɔ́ Jezwi-Krisi yí yábhɛ atɛ.

⁶ Lée Jezwi-Krisi lókɔn ɔn, lócí-áan ńtɛsa Yankan, khɛ́n mɛ́n yítɛ́ le lie salé ánnɛn antɛ́ khékhremɛn, ló angɛ Yankan ɔ́nmɔn priman.

⁷ Lókhɛ́n mɛ́n yí ńtɛ nɔn ali salé, ńyɔ mɛ́n lephan yábhɛ ńni nkalé ló ńhɔn mɛ́n nbrɛn jrɛn nɛnkhwɛ́nwo. Ńtɛsa néphanmiɔn, ló ńthándi se owui sa lephanmi.

⁸ Ló mɛ́n mɛpɔ́bhá hrómɛn, ńhɔn mɛ́n nbrɛn mathé, ńji bhwe kábrɛ kábrɛ ádi mɛ́n khú cí, ló ńkhu áyábhletre phɔ.

⁹ Lóhɛ́nthé nɔn Yankan hɔn-ɛn jetho, ló nkɛ se ńhɛ́n abanbrɛn ńhɛ́n nánkhɛ khúnbrɛn,

¹⁰ ochɛ́sé néphan khúnbrɛn abha átho, áyítathé tho, le áyítathé jwan mɛn, obhó ájí sé Jezwi hɛ́n, ló wo bhɔ́ ntráhɛ́nlé,

¹¹ ochɛ́sé lephan khúnbrɛn otɔlé, Jezwi-Krisi nɔn ali Hwánthe, Nthe Yankan nguhá hrómɛn.

Tɛmɛ ɔ́n fí sa áyéfí abha théji

¹² Ló mɛn jɔn bhwá, lósi ɔ́n khɔ pɛ ájí, áyɔn salé thénthé ka lókɔn khɛ́n mɛn máne, le lóka mɛn man nɛ́n mɛ́ne lɔ, áyɔn salé hɔ́n jí lókɔn otré lóne. Tɛmɛ ɔ́n tɛ́ khékhremɛn, ló áphɔfa mɛn le ńthɛ́nlí mɛn, ɔ́n ní júmán, hɔ́n bɛn nbrɛn swa hɛ́nthé,

¹³ átɛsalé ákakhúnbrɛn Yankan elí júmán hɔ́n thethé, ochɛ́sé áyí mɛ́n thɛ́n pɔ, ɔ́n dɛn ló ɔ́n tɛ́ lóyí.

¹⁴ Hɔ́n yítɛ́ khúnbrɛn hrómɛn ɔn, ɔ́n ne gbɛ bhwe, saji ɔ́n ne talí bhwe,

¹⁵ ochɛ́sé ɔ́n ne lí pɔn, ló ɔ́n ní néphan bɛn áphɔ chan, ɔ́n ní Yankan miɔn alepɛ áyíléle wo phɔ, khɛ́n abha néphan phromɛn phromɛn ále lí mɛ́nbrɛ thethé. Ló hɔ́n má ɔ́n ma wo thethé, áyɔn sa ɔ́n fí sa áyéfí abha áthéji krɛn,

¹⁶ ló ɔ́n tɔ ńmɛpɔ́bhá bhwe sé wo. Kasé hɔ́n etɛ́ yí yábhɛ lókɔn, Krisi ka ábha sáji bhá, mɛn mán gɛ fúmɛ́n hɔ́n phɔ, ló ábha lie salé mɛn júmán khúnbrɛn lókɔn mɛn ni, le mɛn khekhremɛn khúnbrɛn lókɔn mɛn tɛ, ále ka nwrɛ́.

¹⁷ Mɛn nká, lóthé nɔn ali salé mɛn mɛpɔ́bhá, gɛ tɛ́sa ńphaha khɛ́n obho ka hɔ́n mímíbhú yí ebhó ha npha sé Yankan hromɛn. Kasé áli lóyábhɛ nɛn, áphɔ khwa mɛn lé, ló mán chɛ́ mɛn le hɔ́n khúnbrɛn ɔ́nmɔn óbha lí phɔhá.

¹⁸ Lóyábhɛ brɛ, áyɔn salé hɔ́n lɔ áphɔ okhwá hɔ́n lé, ló ɔ́n chɛ́ mɛn gɛ hɔ́n ɔ́nmɔn ní phɔhá.

Thimote le Ephafrodite ɔ́nmɔn

¹⁹ Mɛn mú salé kasé Hwánthe Jezwi dɛn, abha le mɔ́n lɔ khɛ́n, mán chɛ́ Thimote bhá hɔ́n yé, ló hɔ́n phɔ bhwe ánman mó man sé mɛn ɔn, ábha khɔnmán mɛn phɔ.

²⁰ Thimote lókɔn, mɛ́n míbrɛ nɔn ńni lephan mɛn le mɛ́n ɔ́nmɔn opɛ hɛ́nphebhú brɛ, saji mɛ́n míbrɛ nɔn ńni lephan hɔ́n bhwe lí nkɛ thɛ́n.

²¹ Khɛ́n wo nankhɛ khúnbrɛn lókɔn, wo ethɔ́n wo bɛn nbrɛn, áchɛ Jezwi-Krisi bhwe le tɛ́ wo yíɛkɛ.

²² Hɔ́n nbrɛn ɔ́n wu lósi Thimote khɔ chɛ mɛn yɛn salé mɛ́n gɛlé ya, le lósi ńkhɔ gɛ mɛn ɔ́nmɔn ni júmán Ábhwe Bhwábhwá hɛ́nthé, sa yípɔ bhri le mɛ́n the ɔ́nmɔn si ákhɔ́ lí júmán.

²³ Mɛn mú salé lóka mɛn mán tré mɛɛ́n nbrɛn lé phú, mɛn mán chɛ anman gɛ hɔ́n,

²⁴ ló Hwánthe Jezwi hɛ́n hrómɛn, mɛɛ́n nbrɛn lɔ, mɛn mú salé abha le mɔ́n lɔ khɛ́n, mɛn mán man wú hɔ́n.

²⁵ Ephafrodite ali mɛn hɔnsɛ́n, áyɔn salé mɛn chɛ́ ansáji man gɛ hɔ́n. Mɛ́n nɔn ńma mɛn phɔ lo elí júmán, ló lo ekútha brɛ, ló mɛn yí emián mɛn, mɛ́n nɔn ɔ́n chɛ salé anman dɔnmán mɛn mɔ́n.

²⁶ Ánnɛn antɛ́ khékhremɛn man wú hɔ́n khúnbrɛn, ló mɛ́n lɔ́ lókɔn ehɔ́n-ɛn khɛ́n ɔn ye lóbhwe ɔn, etɛ́ gbrelí se kpɛ́ɛ́n.

²⁷ Mímí nbrɛn álɔ́ hɔ́n-ɛn, ákhakpɛɛ́ ankhú, khɛ́n Yankan wui nfɛkhu. Áleli mɛ́n míbrɛ pán Yankan wui nfɛkhu, khɛ́n mɛn lɔ Yankan wu mɛn nfɛkhu, átɛsalé Yankan le pɔ sa mɛn phɔgbɔ́n ocu bhɔ́tho háne.

²⁸ Mɛn tɛ́ gbraa, mɛn chɛ́ anman gɛ hɔ́n, ochɛ́sé lóka ɔ́n wui, ɔ́n cu lí phɔhá, ló mɛn lɔ mɛn phɔgbɔ́n ophú.

²⁹ Hwánthe hɛ́n hrómɛn, tɛmɛ ɔ́n dó nkɛ áphɔhá mɛn, sa lephan ali hɔ́n hɔnsɛ́n. Ló néphan yábhɛ khúnbrɛn lókɔn atɛsa mɛ́n, tɛmɛ ɔ́n pɛ ájí sé wo.

³⁰ Krisi júmán hɛ́nthé, ákhakpɛɛ́ ankhú. Hɔ́n mɔ́ndɔ́nman yí khɛ́n hɔ́n bɛn nbrɛn ɔ́n ne gɛ bhó bha sé mɛn, khɛ́n mɛ́n-ɛ ńmo anmá, mɛ́n bhá hrómɛn ńkha ankhú.