FILÍPHU KHÚBHƐ́NƐ́N 1 - Ebrié New Testament 1996

Phɔ́lu ébhi néphan

¹ Lo khɛ́n lo tɛ áhrɔ́ lókɔn, lónɔn lo li Phɔ́lu le Thimote ɔ́nmɔn khɛ́n ali Jezwi-Krisi nɛnkhwɛ́nmán. Lo tɛ áhrɔ́ lókɔn se Yankan-gbemán khúnbrɛn khɛ́n abha Filíphu khúbhɛ́, khɛ́n abhu Jezwi-Krisi mímí, lo tɛ áhrɔ́ lókɔn se néphan éyalí Yankan-gbemán le mɔ́ndɔ́nmanmán khɛ́n elí júmán dɔnmán Yankan-khúthénɛ́n mɔ́n:

² Tɛmɛ lo The Yankan le Hwánthe Jezwi-Krisi ɔ́nmɔn osé hɔ́n áphɔlíman le ńthɛ́nkhwálé.

Phɔ́lu Yankan ala se krethiɛnmán abha Filíphu khúbhɛ́

³ Lóka khúnbrɛn khɛ́n hɔ́n bhwe di mɛn mwanhɛ́n, mɛn ná Yankan nansi.

⁴ Lóka khúnbrɛn khɛ́n mɛɛ́n na Yankan sé hɔ́n, mɛɛ́n na áphɔhá mɛn,

⁵ hɔ́n si ɔ́n khɔ dɔnman mɛn mɔ́n mɛɛ́n tɔ Ábhwe Bhwábhwá hɛ́nthé, achan lóka ɔ́n mɔ júmán lókɔn hɛ́n kábrɛ kábrɛ ádi ncɛ́n.

⁶ Ábhwe mɛn yɛn nɔn ali salé: Yankan abhɔhɛ́n li júmán bhwá yábhɛ lókɔn hɔ́n thethé, ánman hɔ́n lójúmán pɛ ní ɔ́nmɔn no, kábrɛ kábrɛ ábha di Jezwi-Krisi cí ábha sáji bhá.

⁷ Áyɔn sa mɛn pɛ hɛ́nphebhú yábhɛ lókɔn sé hɔ́n khúnbrɛn. Mɛn pɔ hɔ́n mɛn thɛ́n khúnbrɛn hrómɛn, átɛsa hɔ́n lɔ ɔ́n gɛ Yankan phɔlíman ase mɛn, thénthé ka lókɔn khɛ́n mɛn ma khúthéká gɔn, le lóka mɛn ka mɛɛ́n brɛn lé mɛɛ́n tɔ bhwe do Ábhwe Bhwábhwá lókɔn ká, le lóka mɛɛ́n gɛ chɛ́ Ábhwe Bhwábhwá lókɔn ogɛlé.

⁸ Lóka mɛɛ́n tɔlé mɛn pɔ hɔ́n khúnbrɛn kpɛ́ɛ́n Jezwi-Krisi pɔ́ khóo hrómɛn ɔn, Yankan yɛn salé ábhwe mímí nɔn mɛɛ́n tɔ.

⁹ Mɛn Yankan mɛɛ́n na sé hɔ́n nɔn ali salé: hɔ́n pɔ́ othúbhɔ háne ɔ́nmɔn lo, opɛ ábhweyɛ́n mímí lóhrómɛn, ochɛ́ ɔ́n yé ábhwethé mwámwá,

¹⁰ ló ɔ́n yɛ́n áyíbhwá. Lónɔn ábha chɛ́ ɔ́n ní néphan áphɔ chan, ló Krisi ka ábha sáji bhá, olépɛ ábhwe bhrií hɔ́n phɔ.

¹¹ Hɔ́n mɛpɔ́bhá hrómɛn, ɔ́n ma tɛ́ áyí apriman khɛ́n Jezwi-Krisi chɛ́ lephan tɛ́, ali áyí áha Yankan ngu, le áyí álri Yankan hwa.

Krisi nɔn ali ńmɛpɔ́bhá

¹² Hɔnsɛ́nhɔn, mɛɛ́n nɛn mɛn chɛ́ hɔ́n yɛ́n salé mímí nbrɛn, ákhúthéká gɔn lókɔn mɛn ma ɔn, ló-ɛ nɔn achɛ Ábhwe Bhwábhwá énɛnsi ló hɛ́nmɛn.

¹³ Lóhɛ́nthé, ngbumán khúnbrɛn khɛ́n ébo athe bháthó, le néphan nankhɛ khúnbrɛn lɔ yɛn salé, Krisi thá mɛɛ́n gɛ hɛ́nthé nɔn achɛ wo ka mɛn khúthé.

¹⁴ Mɛn khúthé wo ka mɛn hɛ́nthé nɔn achɛ hɔnsɛ́nhɔn búdúbúdú khɛ́n ebhú Hwánthe mímí, cu bhɔtho. Ló ákakhúnbrɛn wo étɔ Yankan bhwe, wo le sókhú.

¹⁵ Mímí, fe abha wo hromɛn ekú mɛn kré, lóhɛ́nthé nɔn achɛ wo étɔ Krisi bhwe ágbo mɛn; lókhɛ́n fe lɔ étɔ Krisi bhwe ńthɛ́nbhwá mɛn.

¹⁶ Wo lókɔn ɔn, wo etɛ́ yí ápɔ́ hrómɛn, lósi akhɔ tɛ ɔn, wo yɛn salé Yankan bho Ábhwe Bhwábhwá ha mɛn mɔ́n mɛn mɛɛ́n bo.

¹⁷ Fe lɔ, léli ńthɛ́nbhwá mɛn nɔn wo khɔ wo étɔ Krisi bhwe, khɛ́n ákré mɛn nɔn wo khɔ wo étɔ, ochɛ́sé mɛn khúthéká gɔn lókɔn mɛn ma ɔn, mɛn yíkhúphɔ obhɔ́tho.

¹⁸ Khɔ ńthɛ́nbhwá mɛn o, khɔ ńthɛ́nle mɛn wo khɔ wo étɔ o, ló ékɛ le pɛ bhwe. Khɛ́n Krisi phɔ bhwe pán mɛɛ́n tɔ sé néphan yé, áchɛ áphɔ ehá mɛn, ló mɛn mán ní phɔhá ɔ́nmɔn no ákakhúnbrɛn.

¹⁹ Mɛn yɛn salé hɔ́n Yankan hɔ́n éla sé mɛn, le Jezwi-Krisi Nánnánmi mɔ́n édɔnmán mɛn hɛ́nthé, lóyí khúnbrɛn lókɔn bha swa mɛn.

²⁰ Mímí mɛɛ́n bo, ló mɛn mú salé álepɛ yí brɛ khɛ́n ábha chɛ́ hɛ́ndɛ ká mɛn mɛ. Lóhɛ́nthé mɛn gɛlé chre kpɛ́ɛ́n. Thénthé lɔ, le ácí khúnbrɛn lɔ, mɛn mán khɔ́ mɛn lephan yábhɛ mɛn ni phɔ chɛ́ oyɛ́n Krisi lephan khó ali, kasé mɛn ma mɛpɔ́, kasé mɛn khú lɔ, ále tɛ́ yíɛkɛ.

²¹ Mɛn ékɛ mɛn yɛn nɔn ali salé Krisi li ńmɛpɔ́bhá, ló ákhú li mɛn yí mɛn gɛ.

²² Khɛ́n mɛn mɛpɔ́bhá hrómɛn, kasé mɛɛ́n gɛ tɛ́ yíbhwá bɛn sé mɛn júmán lókɔn mɛn ní, ló-ɛ mɛn nɛ́n gɛ yɛ́n lóyí ayɔn khɛ́n mɛn sán.

²³ Mɛn ya nta mɔn: ló ákhú khɛ́n okhú lo gɛ Krisi ɔ́nmɔn chré, ló-ɛ nɔn ayɔn banban.

²⁴ Lókhɛ́n hɔ́n hɛ́nthé, áyɔn salé mɛn cu má mɛpɔ́, ló mɛn gɛ hɔ́n ɔ́nmɔn chré.

²⁵ Mɛn yɛn lóyábhɛ nɛn, mɛn yɛn salé man máne, mán gɛ hɔ́n khúnbrɛn ɔ́nmɔn chré, mán dɔnmán hɔ́n mɔ́n hɔ́n mímíbhú oló hɛ́nmɛn, ló áphɔ ohá hɔ́n mímíbhú hrómɛn.

²⁶ Lónɔn ábha chɛ́sé lóka mɛn mán sáji man gɛ hɔ́n, hɔ́n nguhá khɛ́n ɔ́n ma gɛ mɛn hɛ́nthé Jezwi-Krisi hɛ́n hrómɛn, ábha bhɔ́tho.

²⁷ Khɛ́n tɛmɛ hɔ́n yítɛ́ khúnbrɛn okhɔ́ Krisi Bhwe Bhwábhwá sitó, lónɔn kasé mɛn man wu hɔ́n lɔ, kasé mɛn nɛn ma lɔ, mɛn bhwe mɛn yé hɔ́n phɔ nɔn olí salé ɔ́n gɛlé chré kpɛ́ɛ́n, ɔ́n pɛ hɛ́nphebhú brɛ, ló hɔ́n ekútha ńmɛ́nbrɛlí hrómɛn sé mímíbhú khɛ́n Ábhwe Bhwábhwá sé lephan.

²⁸ Ɔ́n ne chɛ́sé hɔ́n mɛsamán ogɛ mɔ́nsi há hɔ́n khwíthá hrómɛn: lónɔn ábha lie salé wo lia, lókhɛ́n hɔ́n-ɛ, wo swa hɔ́n. Ló ábhwe lókɔn, Yankan yé nɔn achan.

²⁹ Átɛsa Yankan phɔlíman hromɛn nɔn ɔ́n khɔ hɔ́n ékhwɛn Krisi hɛ́nmɛn nɛn, áleli salé ɔ́n mui mímí pán, lókhɛ́n mɛ́n hɛ́nthé, tɛmɛ ɔ́n nígbre lɔ.

³⁰ Thénthé tɛmɛ ɔ́n gɛ mɛn ɔ́nmɔn kútha brɛ. Átha brɛ khɛ́n lócí mɛn phrɛ ku ɔ́n wu ɔn, lóbrɛ nɔn mɛn cu mɛn kú.