EFƐ́ZI KHÚBHƐ́NƐ́N 2 - Ebrié New Testament 1996

Ochan ákhú hrómɛn bha mɛpɔ́

¹ Lócí, nánnánmi hromɛn ɔn, ɔ́n tɛsa néphan akhu, hɔ́n yí phromɛn phromɛtɛ́ le hɔ́n neyítɛ́ hɛ́nthé.

² Ɔ́n tɛ́ áthéjinɛ́n khúnbrɛn yí átɛ́; ɔ́n ji nánnánmi phromɛn phromɛnhɔn bhrɔ́khó abha áphɛ́phrɛ hromɛn, nánnánmi lókɔn nɔn, thénthé abha néphan ále ji Yankan hromɛn elí júmán.

³ Lo khúnbrɛn lɔ lo tɛsa wo a, ló lo néphan nánmí lo le ɔn, lóyí énɛn lée lo tɛ́, lónɔn lo tɛ́, lo tɛ́ lo nánmí lo le, le nánnánmi ɔ́nmɔn yí énɛn. Lo néphan yábhɛ lókɔn lo li hɛ́nthé, Yankan bho mɛ́n thɛ́nyan tre lo tho, sa ńmo tre wo nankhɛ lɔ tho a.

⁴ Khɛ́n Yankan yíbhwátɛ́ ban, ló mɛ́n pɔ́ ńpɔ lo lɔ thubhɔ kábrɛ.

⁵ Lóhɛ́nthé nɔn, lóka lo tɛsa néphan akhu khwa nánnánmi mɛn, lo yíyányantɛ́ hrómɛn, ńchɛ lo cu gɛ Krisi ɔ́nmɔn bha mɛpɔ́. Yankan phɔlíman hromɛn nɔn okhɔ do hɔ́n ka.

⁶ Lo le Krisi ɔ́nmɔn brɛ lo li hɛ́nthé, Yankan chɛ lo khúnbrɛn lo gɛ nkɛ ɔ́nmɔn chan khúnɔn mɛn fe, ló ńchɛ lo gɛ nkɛ ɔ́nmɔn chre átho lóne.

⁷ Ńkhɔ Jezwi-Krisi phɔ tɛ lo mwá, sa anmó mɛ́n phɔlíman thú athubhɔ nie néphan abha ácí ebhá hrómɛn.

⁸ Átɛsa Yankan phɔlíman hromɛn nɔn okhɔ do hɔ́n ka, mímíbhú hɛ́nthé. Léli hɔ́n nbrɛn nɔn ɔ́n do hɔ́n nbrɛn ka, Yankan nɔn ado hɔ́n ka,

⁹ léli hɔ́n nbrɛn khékhremɛn bɛn ɔ́n tɛ hɛ́nthé, khɛ́n ágɛ chɛ́ lephan fúmɛ́n lóphɔ.

¹⁰ Átɛsalé Yankan nɔn atɛ lo, lo le Jezwi-Krisi ɔ́nmɔn brɛ lo li hɛ́nthé, ochɛ́sé lo mɛpɔ́bhá hrómɛn, lo tɛ́ yíbhwá othúbhɔ. Ńphrɛ tɛ lóyí tre, ló ochɛ́sé lo lɔ, lo tɛ́ lóyábhɛ brɛ.

Jezwi-Krisi ɔ́nmɔn brɛ oli

¹¹ Hɔ́n khɛ́n ɔ́n ne li Jwifunɛ́n líhɛ, – Jwifunɛ́n hɛ́n ase hɔ́n nɔn ali; néphan ole jan khɛn, khɛ́n éche wo nbrɛn-ɛ, néphan ojan khɛn (wo ebhó wo nbrɛn thwelí néphan trɛ́ atrɛ wo nbrɛn tre nánmí mɛn) – khɛ́n hɔ́n néphan yábhɛ lócí ɔ́n ni, tɛmɛ lóbhwe odi hɔ́n mwanhɛ́n:

¹² Lócí ɔn ne bha Krisi phɔ, ńthekhunɛ́n le hɔ́n, aféchwe Yankan san, ɔ́n ne bha wo hromɛn; akprɔbha Yankan le mɛ́n hwannɛ́n ɔ́nmɔn si tre khɛ́n ńkhɔ lóphɔ tɔ bhwe tre wo lé ɔn, ɔ́n ne bha lóhrómɛn. Ɔ́n ma áthéji-ɛ, khɛ́n ɔ́n ne pɛ mwasrui, Yankan le bha hɔ́n phɔ.

¹³ Thénthé, hɔ́n khɛ́n lócí ɔ́n ni néphan abha thwethwemɛn ɔn, wo khɔ Jezwi-Krisi khú hrómɛn chɛ hɔ́n tigbali, hɔ́n le Jezwi-Krisi ɔ́nmɔn brɛ ɔ́n tɛ hɛ́nthé.

¹⁴ Átɛsalé Krisi bɛn nbrɛn nɔn atɛ thɛ́nkhwálé ka lo thethé, mɛ́n chɛ́ ńchɛ Jwifunɛ́n le néphan aleli Jwifunɛ́n ɔ́nmɔn jrɛn aféchwe brɛ hɛ́nthé. Ńkhu, ló ńkhú phɛ́n abhuri wo ndɔn mɔn, khɛ́n achɛ wo sa wo bɛn nbrɛn mɛ, ńca lónkhú phɛ́n lókɔn khwalé.

¹⁵ Ńca Jwifunɛ́n bidí le lóyí ji chɛ́-nchɛ́ ɔ́nmɔn, ló ńchɛ aféchwe ndɔn mɔ́nmɔn lókɔn jrɛn aféchwe pɔ́pɔ́ brɛ, mɛ́n le nkɔn ɔ́nmɔn wo li brɛ, ló ńtɛ thɛ́nkhwálé ka nkɔn thethé.

¹⁶ Krisi khɔ mɛ́n khú ńkhu áyábhletre phɔ tranman ńmɛsa yɛn. Ńkhɔ áyábhletre phɔ chɛ wo khúbhɛ́nɛ́n ndɔn mɔn lókɔn bhɔha sibrɛ, ló ńchɛ nkɔn gɛ Yankan ɔ́nmɔn nrwɛn.

¹⁷ Lósi yábhɛ khɛ́n Krisi khɔ bha tɔ Ábhwe Bhwábhwá ali ńthɛ́nkhwálé bhwe se hɔ́n khɛ́n ɔ́n ne li Jwifunɛ́n, khɛ́n lócí ɔ́n ne bha Yankan phɔ, le Jwifunɛ́n lócí abha mɛ́n phɔ nɔn ali lókɔn.

¹⁸ Mímí nbrɛn Krisi phɔ nɔn lo khúnbrɛn, Jwifunɛ́n lo li o, Jwifunɛ́n lo le li o, lo gɛ thandi Yankan hɛ́nmɛn, Nánnánmi mɔ́ndɔ́nman hromɛn.

¹⁹ Lóhɛ́nthé, hɔ́n khɛ́n ɔ́n ni néphan aleli Jwifunɛ́n, ɔ́n ne cu li ńthekhunɛ́n npɔhɔ́n, ɔ́n ne li néphan achan si nankhɛ bha. Khɛ́n ɔ́n ni ákhúbhɛ́ brɛ hromɛn miɔ́ bha Yankan-gbemán hrómɛn, ɔ́n ni Yankan mándo hromɛn néphan.

²⁰ Ńkhú khɛ́n Krisi-mranchɛ́mán le bhwetɔ́trémán ɔ́nmɔn dilé, hɔ́n lɔ, ɔ́n ni ńmú wo khwɛn tre lótho wo ethán. Jezwi-Krisi bɛn nbrɛn nɔn ali lóngrɛmɛ́n bhú.

²¹ Mɛ́n nɔn anchɛ́ ńkhú khúnbrɛn lókɔn gɛlé, anchɛ́ ában, ló ájrɛn Yankan-nkhú atɛ créncré tre Hwánthe hromɛn.

²² Hɔ́n le mɛ́n ɔ́nmɔn brɛ ɔ́n ni hɛ́nthé, áchɛ hɔ́n lɔ, ɔ́n ni nkhú lókɔn wo ethán lóphɛ́nta hromɛn néphan, ochɛ́sé hɔ́n le néphan nankhɛ khúnbrɛn ɔ́nmɔn, ɔ́n jrɛn nkhú bɛn khɛ́n Yankan khɔ Nánnánmi hromɛn chre lóhrómɛn.