2 TESALONÍKHI KHÚBHƐ́NƐ́N, 2 - Ebrié New Testament 1996

Lephan ali Bhúrɛwo

¹ Lo éla hɔ́n, lo hɔnsɛ́nhɔn, ábhwe khɛ́n ali lo Hwánthe Jezwi-Krisi mɛ́n sá ánman sáji má, le lo khúnbrɛn si lo bhá khɔ́ bhurɛhɛ́n mɛ́n phɔ, lóbhwe abháne ógɛ tɔ nɔn ali salé:

² néphan bhwe ábha tɔlé lo Hwánthe cí si, kasé lephan bɛn étɔ lóbhwe sé hɔ́n yé, khɔ yankanla hromɛn o, khɔ Yankan bhwetɔ́ hrómɛn o, khɔ wo bhá kranmán hɔ́n lée, ábhwe lókɔn wo étɔ, lo lrɛ ha hrɔ́ bɛn hromɛn o, ńthɛ́n olé jan hɔ́n, ló ɔ́n ne sókhú.

³ Olépɛ lephan brɛ okhrɛ hɔ́n. Chán ɔɔ ásé lócí lókɔn, néphan bha yɔ́ wo mímíbhú ká ábha liá, ló lóka lókɔn, lephan óche abhúrɛwo bha thándi, abhúrɛwo khɛ́n ali lephan alia.

⁴ Mɛ́n nɔn ńni mɛsawo ebhá pháchré Yankan khúnbrɛn lo éla tho, áyí khɛ́n wo bhó tɛ́ ála yí, ánman nɔ lókhúnbrɛn phú, ánman ká Yankan-khúthé, ánman chéthé lóne, ló ánman kranmán néphan khúnbrɛn salé, mɛ́n nɔn mɛ́n ni Yankan.

⁵ Wú ále di hɔ́n mwanhɛ́n salé ábhwe lókɔn, lóka mɛn ma hɔ́n phɔ, mɛn phrɛ tɔ se hɔ́n ye?

⁶ Lókhɛ́n áyí khúnbrɛn lókɔn, ápɛ áyíbɛn echɛ́ lóbhwe le gɛ thándi, ló lóyí lókɔn khɛ́n wo étɔ lóbhwe, ɔ́n yɛn lóyí. Lóhɛ́nthé nɔn lephan ali Abhúrɛwo, mɛ́n ka ánman má, áli áka bɛn wo phrɛ tɔ lóbhwe tre.

⁷ Ló ńsɛ́npɛ́ lókɔn ahrɔman tre khɛ́n ali Abhúrɛ sɛ́npɛ́, thénthé áfe elí júmán. Lókhɛ́n lóyí khúnbrɛn lókɔn, lephan ahɔn pɛ, lóka ánman niá, lónɔn lóyí khúnbrɛn lókɔn bha tɛ́.

⁸ Lókhɛ́n lóka lo Hwánthe Jezwi bha sáji bhá, ánman fi mɛ́n míthé guphrɛ há Abhúrɛwo phɔ, ánman wɛ́n nkɛ, ló mɛ́n yéfí abha mɛ́n phɔ, ábha chɛ́ Abhúrɛwo liá.

⁹ Lóka Abhúrɛwo bha bhá, mɛ́n le Abhɔsɛ́mɔ́n sɛ́npɛ́ ɔ́nmɔn nɔn wo bhá bhá, ló ánman tɛ́ hɛ́nmɛntányí le áphɔgóyí ali nkpakprá yí,

¹⁰ ánman mó áyíléle yábhɛ yábhɛ khúnbrɛn khrɛ néphan, ló wo bhá liá. Wo bhá liá, lósi akhɔ tɛ ɔn, wo le dɛn do ábhwe mímí, wo le pɔ ábhwe mímí ali áyí ágɛ swa wo.

¹¹ Lóhɛ́nthé nɔn Yankan bha bhó nkpakprá nánnánmi sé wo, ló ábha chɛ́sé áyí ali nkpakprá yí, wo bhá bhú mímí.

¹² Lóhɛ́nthé, néphan khɛ́n abha lé dɛn do ábhwe mímí, lókhɛ́n wo thɛ́n bha sa tré áyíléle tho, Yankan bha bhɔ́ wo kwa.

Wo san hɔ́n tre salé Yankan oswa hɔ́n

¹³ Hɔnsɛ́nhɔn, ákakhúnbrɛn hɔ́n hɛ́nthé, áyɔn salé lo lá Yankan nansi, hɔ́n lókɔn khɛ́n ɔ́n ni néphan lo Hwánthe pɔ. Átɛsalé Yankan san hɔ́n salé ábhɔ́hɛ́n cí-áan ɔ́n ní néphan bɛn Nánnánmi swa, ló ńchɛ hɔ́n ni Yankan néphan, hɔ́n mímíbhú ɔ́n mo tre ábhwe mímí tho hɛ́nthé.

¹⁴ Lóhɛ́nthé nɔn Yankan che hɔ́n, ló ńmo Ábhwe Bhwábhwá lókɔn khɛ́n lo tɔ se hɔ́n ye swa hɔ́n. Ló ńche hɔ́n ma salé anmó lo Hwánthe Jezwi-Krisi nguhá sé hɔ́n.

¹⁵ Lóhɛ́nthé mɛn hɔnsɛ́nhɔn, tɛmɛ ɔ́n gɛlé ya, ló áyí khɛ́n lo lie hɔ́n míthé mɛn, le ló khɛ́n lo bho tɛ hrɔ́ thu hɔ́n, ɔ́n yé lóyílie khúnbrɛn lókɔn mwámwá.

¹⁶ Tɛmɛ lo Hwánthe Jezwi-Krisi mɛ́n bɛn nbrɛn, le Yankan ali lo The apɔ lo, khɛ́n akhɔ mɛ́n phɔlíman hromɛn se lo áphɔkhɔ́nman atre álephú, achɛ lo bho lo mwasrui tre mɛ́n tho,

¹⁷ mɛ́n bɛn nbrɛn anchɛ́ hɔ́n thɛ́n ogɛlé, ló ansé hɔ́n áphɔkhɔ́nman ló ɔ́n gɛ tɛ́ áyí khúnbrɛn ayɔn, hɔ́n júmánlí le hɔ́n bhwetɔ́ ɔ́nmɔn hrómɛn.