LIOLONGANJI 13 - Embimbiliya - Bíblia Sagrada em Umbundu

¹ Va Isareli va linga vali eci cĩvi kovaso a Yehova. Kuenje Yehova wa va eca peka lia va Filisiti, akuĩ akuãla kanyamo.

² Kua kala ulume umue u Sora, ukuepata lia Dani, onduko yaye Manoa. Ukãi waye wa kala osiũle, kuenje ka citile.

³ Ungelo wa Yehova wa tukulukila ukãi, kuenje wa popia laye hati, Tala, ove wusiũle, haive kua la cita. Puãi o mina, o cita omõla ulume.

⁴ Oco lunguka, ku ka nyue ovinyu ndaño cimue ci koluisa, pamue oku lia eci ca vĩha.

⁵ Momo tala, o mina, o cita omõla ulume. Omoko yomuto ka yi piti vutue waye, momo omolaco o linga u Nasiri wa Suku tunde vimo lia inaye. Haeye o fetika oku popela va Isareli peka lia va Filisiti.

⁶ Ukãi wa ka sapuilile veyaye hati, Omunu umue wa Suku weya kokuange. Ocipala caye ca mõleha ndocipala cungelo wa Suku, ci lingisa usumba. Sio pulile oko a tunda, leye ka sapuilile onduko yaye.

⁷ Puãi wa popia lame hati, Tala, o mina, o cita omõla ulume. Oco ku ka nyue ovinyu pamue vievi vi koluisa, ndaño oku lia eci ca vĩha. Momo omõlaco o linga u Nasiri wa Suku tunde vimo lia inaye toke keteke liokufa kuaye.

⁸ Manoa wa livondela ku Yehova, hati, A Yehova, hu pinga, omunu wa Suku una wa tumĩle, eye vali kokuetu, ha tu longisa eci tu linga lomõla o laika oku citiwa.

⁹ Suku wa yeva kondaka ya Manoa, kuenje ungelo wa Suku weya vali kukãi, osimbu a tumãla vepia. Puãi veyaye Manoa ka kailepo.

¹⁰ Ukãi wa yayulako, yu wa lupuka, kuenje wa sapuila veyaye hati, Ota, omunu una weyile kokuange eteke lina, wa nukulukila vali.

¹¹ Manoa wa katuka, wa kuama ukãi waye. Weya komunu waco, kuenje wo pula hati, Ove wumunu una wa vanguile lukãi u? Eye hati, Ame.

¹² Manoa wa popia hati, Kaliye eci olondaka viove vi telisiwa, omõlaco o kala ndati? Lupange waye we?

¹³ Ungelo wa Yehova wa popia la Manoa hati, Ukãi a lisuluvike kuevi viosi ndo tukuila.

¹⁴ Ka ka mahe cimue ci tunda kuyuva, ndaño oku nyua ovinyu pamue vievi vi koluisa, pamue oku lia cimue ca vĩha. Cosi ndo handeleka, a ci linge.

¹⁵ Manoa wa popia lungelo wa Yehova, hati, Tu ku pinga, tava oku talamela handi, ha tu ku angiliyila okahombo.

¹⁶ Ungelo wa Yehova wa popia la Manoa, hati, Ndaño o nalamisa, haimo si li kokulia kuove. Puãi nda wangiliya ocilumba coku pia elisi, oco ci lumbila Yehova. Manoa ka kũlĩhile okuti eye ungelo wa Yehova.

¹⁷ Manoa wa popia lungelo wa Yehova, hati, Onduko yove, ove elie, ha tu ku sambiliya eci olondaka viove vi telisiwa?

¹⁸ Ungelo wa Yehova wa popia laye hati, O pulila nye onduko yange? Oyo yi komohisa.

¹⁹ Oco Manoa wa nyañula okahombo kumue locilumba colomema. Wa ci lumbila Yehova, kilu liewe. Kuenje osimbu Manoa lukãi waye va kala loku tala, kua pita ocikomo cimue.

²⁰ Eci ulienge wokutala wa liakokaila vilu, oco ungelo wa Yehova wa londa lulienge. Manoa lukãi waye va kala loku tala. Yu va tuvika ovipala viavo posi.

²¹ Ungelo wa Yehova ka tukulukilile vali Manoa lukãi waye. Oco Manoa wa limbuka okuti eye ungelo wa Yehova.

²² Manoa wa popia lukãi waye, hati, Ocili tu fa, momo tua mõla Suku.

²³ Ukãi waye wa popia laye hati, Nda Yehova wa yonguile oku tu ipa, nda ka tambuile povaka etu ocilumba coku pia elisi leci colomema, kuenda nda ka tu lekisile ovina evi viosi, ndaño oku tu sapuila kaliye ovina vinene ndevi.

²⁴ Ukãi wa cita omõla wo luka Samisone. Omõlaco wa kula, kuenje Yehova wo sumũluisa.

²⁵ Espiritu lia Yehova lia fetika oku u tuñunya ko Mahanendani, pokati ka Sora la Esitaole.