LIOLONGANJI 1 - Embimbiliya - Bíblia Sagrada em Umbundu

¹ Kovaso yokufa kua Yehosua, va Isareli va puliliya ku Yehova, vati, Pokati ketu helie o fetikako oku katukila va Kanana ha liyaki lavo?

² Yehova wa kumbulula hati, Yuda eye o katuka. Tala, ofeka yaco nda yeca peka liaye.

³ Yuda wa popia la manjaye Simeone, hati, Kavali ketu tuende vofeka ya nepeluako locela, ha tu yaki la va Kanana. Lame hã ngendavo kumue love vofeka ya ku tepeluako. Oco Simeone wa enda kumue laye.

⁴ Va Yuda va katuka kuenje Yehova wa eca povaka avo va Kanana la va Perisi. Va lundula ekui liolohũlũkai vialume ko Beseke.

⁵ Va sanga Adoni Beseke ko Beseke, yu va yaka laye, kuenje va landula va Kanana la va Perisi.

⁶ Puãi Adoni Beseke wa tila. Vo landula, yu vo kuata, kuenje vo teta ovimuine viomumba kovaka lokolomai.

⁷ Adoni Beseke hati, Akuĩ epanduvali kolosoma, nda a tetele ovimuine viomumba kovaka lokolomai, kuenje via nolaile ovimalañanya via loka loka komesa yange. Ndeci nda linga, haico Suku a fetuluinya. Oco vo nena ko Yerusalãi kuenje haiko a fila.

⁸ Va Yuda va yaka la Yerusalãi, yu va li kuata kuenje va li kundula lomela wosipata. Imbo liaco va limba ondalu.

⁹ Noke va Yuda va loka ha va yaki la va Kanana vana va tunga kolomunda, loko Sul, lovetapi.

¹⁰ Yuda wa katukila va Kanana, vana va tunga komunda Hevrone. Osimbu ale Hevrone ya tukuiwile Kiriyata Ariba. Yu va lundula Sesai la Ahimana la Talimai.

¹¹ Oku tundako va katukila olonungi via Deviri, Osimbu ale Deviri lia tukuiwile Kiriyata Sefere.

¹² Kalembe wa popia hati, U o yula Kiriyata Sefere ha li tambula, ndu wĩha omolange Akisa ha lingi ukãi waye.

¹³ Otiniyele, omõla a Kenasi, manja a Kalembe, eye wa li kuata. Kuenje wa wiha omõlaye Akisa ha lingi ukãi waye.

¹⁴ Eci Akisa eya, wo peya oku pinga epia ku isiaye. Oco Akisa wa kolomõha kocimbulu caye, kuenje Kalembe wa popia laye, hati, O yongola nye?

¹⁵ Eye hati, Nyiheko ombanjaile. Omo wa ñapa vofeka yoko Sul, nyiheko olono viovava. Kuenje Kalembe wa wiha olono viokonano lolono viokombuelo.

¹⁶ Omala va Keni, ndatembo ya Mose, oku tunda kimbo lioviti vieva, va enda kumue la va Yuda kekalasoko lia Yuda, ko Sul ya Arade. Kuenje va enda, yu va tunga pokati komanu.

¹⁷ Yuda wa enda kumue la manjaye Simeone, kuenje va lundula va Kanana vana va tunga ko Cefata. Va li kundula pe. Oco imbo liaco lia tukuiwa Horima.

¹⁸ Yuda wa kuatavo Gasa kumue lovisenge viaco, la Asikelone kumue lovisenge viaco, la Ekirone kumue lovisenge viaco.

¹⁹ Yehova wa kala kumue la Yuda, kuenje Yuda wa tambula ofeka yolomunda. Puãi ka tẽlele oku tundisa ava va tunga vetapi, momo va kala lakãlu utale.

²⁰ Omunda Hevrone ya eciwa ku Kalembe, ndeci ca popele Mose. Wa tundisamo omãla vatatu va Anaki.

²¹ Puãi va Benjamini ka va tundisile va Yevusi vana va tunga vo Yerusalãi. Oco va Yevusi va tunga kumue la va Benjamini vo Yerusalãi, toke etaili lilo.

²² Epata lia Yosefe laliovo lia katukila Betele, kuenje Yehova wa kala kumue lavo.

²³ Epata lia Yosefe lia tuma oku kũlĩhĩsa Betele. Osimbu ale imbo liaco lia tukuiwile Lusi.

²⁴ Olondavululi via mõla ulume umue wa tundilila vimbo, kuenje va popia laye vati, Tu lekise onjila yoku iñila vimbo, letu hã tu ku lingi ohenda.

²⁵ Eye wa va lekisa onjila yoku iñila vimbo, yu va kundula imbo liaco lomẽla wosipata. Puãi ulume waco va weca, eye kumue lepata liaye liosi.

²⁶ Ulume waco wa enda kofeka ya va Hiti. Wa tungako imbo, kuenje wa li luka Lusi. Eyi oyo onduko yalio toke etaili lilo.

²⁷ Manase ka tundisile ava va tunga ko Bete Siane lokovikanjo viaco, ndaño voko Taanake lokovikanjo viaco, pamue ava va tunga ko Dori lokovikanjo viaco, lava va tunga kIvileama lokovikanjo viaco, pamue vali vana va tunga ko Megido lokovikanjo viaco. Puãi va Kanana va lamelela vofeka yaco.

²⁸ Eci va Isareli va kuata ongusu va kapa va Kanana kupange wocikisika, puãi ka va va tundisile pe.

²⁹ Efarimi ka tundisile va Kanana vana va tunga ko Gesere. Puãi va Kanana va tunga pokati kavo ko Gesere.

³⁰ Sevulono ka tundisile ava va tunga ko Kitirone, ndaño vava va tunga ko Nahalole. Puãi va Kanana va tumãla pokati kavo, yu va lingisua vakuopange wocikisika.

³¹ Asiere ka tundisile ava va tunga kAko, lava va tunga ko Sitono, lo kAhilava, lo Akisiva, loko Heliba, lo kAfiki, loko Rehova.

³² Puãi va Asiere va tunga pokati ka va Kanana, vakuafeka. Momo ka va va tundisile.

³³ Nafitali ka tundisile ava va tunga ko Bete Siemese, ndaño ava va tunga ko Betanate. Puãi wa tunga pokati ka va Kanana, vakuafeka. Haimo lumue olonungi via Bete Siemese levi via Betanate va lingisua vakuopange wavo wocikisika.

³⁴ Va Amori va sindila va Dani vofeka yolomunda, kuenje ka va tavele okuti va lokile ketapi.

³⁵ Va Amori va lamelela ko Hari Heresi, lo kAyalone kuenda ko Sialabime. Puãi eka liepata lia Yosefe lia va sipata, kuenje va lingisua vakuopange wocikisika.

³⁶ Ongave ya va Amori yopisa kowulu wAnyenya, ko Sela, toke konano.