ฟีลิปปี INTRO1 - ลีเทส่อพ๊าอาเซ เร๊อ เห่ขุทวาลู๊เตเฮ๊เบ่ เหร่อ เด๊อ เง ลีพีลิปปี เออต๊าบ่า หม่า คูเปาโล รา เบ๊อะอา จว๊าเม โอ่ทวาแถ่ เหร่อเล๊อ เฮ๊อ เพรหยื่อเอ่ตู๊หมู่ตอกล๊อ ตู๊หมู่ เด๊อ อา โอ่ เด๊อ ยุโรป เก่ดุกู, โรมัน เก่โหมะ อา เตเป๊ออาเล, มาซิโดเนีย เก่พู๊กู. ลี เออเนอ อา รา เบ๊อะอู ด๊อโน ลู เด๊อ ทอกู อาเค. แกแย เม จอแปแหร่ อา เตเอ่เตแร เด๊อ อาโร เต๊เห่ เฮ๊โตโมเต๊เก่ เป๊อเจ่ออิแช๊ ลู, โทเร๊อ แกแย โอ่ เบ๊อะ วีฟีลิปปี เพรหยื่อเอ่เต ตู๊หมู่ตอกล๊อกู เต๊เห่เห่เนอ, อา อิซว๊าอี๊แส่ ซื๊อ อู อา โอ่ เต๊เห่, เบ๊อะเนอเค อา รา จว๊า เป่ เหย่ซี ลีเออต๊าบ่า. หม่าแน๊เรอ เด๊อ คูเปาโล อา เตหยื่อชอ เหย่ซู่ อาขว่าอาคยา, อา เด๊อะโอ่โลแถ่ ซิครือซิลอ เร๊อ เตเหล่หยื่อเอ่หนิ ลี เออต๊าบ่า. เบ๊อะคูเปาโล โหล่รือ อาเค ฟีลิปปี ครี๊พู๊ เต๊เห่ ซูแฮ เป่ ลู เตเมจว่า เต๊เห่ อาขว่าอาคยา, อา ซิหยื่อ รา เฮ๊บุ๊ยเฮ๊เตอเรอ จว๊าเป่ เหย่ซี แพ๊. คูเปาโล เร๊อ ล๋อ ฟีลิปปี ครี๊พู๊ เต๊เห่ ข่าเบ่ เตเมจาเมจือ. ฮู๊เนอเร๊อ เหย่ซี ซิปล่อ คือฮาแถ่, เหย่ซี หยื่อเอ่ แฮเง ลา โป่, เร๊อ คูเปาโล แม๊เถอะเฮ๊อ ตาโต ตาเบ่ แร๊เฮ๊อ เออ อาขว่าอาคยา, อา เด๊อะฉว่าเด๊อะชอ แฮ โป่ เหย่ซี ซิปล่อ. อา กุยซิยอ เหย่ซี เนอ, อา เก่ แด่แล แลแค อาซิปล่อ แซ่เน๊อ ครี๊เนอ, โทเร๊อ อา เก่ แม๊ปู่กู๊หว่ากู๊เวเอ่ เกอเร๊อ ตือดื่อ เง แต่เหม่, อา เก่ พย๊าดุ พย๊าแถ่โล แต่ แลแค อาเหน่ แต่เหม่. อา เด๊อะ ซิเหน่แถ่เบ่ คยาแซ๊ เหย่ซี เนอ เหย่ซี เตโอ่เซอเพร เด๊อ อา ทวาแถ่ เฮ๊อ เตเพรเพร่ว จือ เร๊อ ครี๊ ฮู๊เออเนอหม่า หม่าเฮ๊อ เด๊อ เหย่ซี หยื่อเอ่ ครี๊ ขว่าคยา, เร๊อ เหย่ซี พย๊าหนิเฮ๊อ จอแปแหร่ อาบุ๊ยดุอาเตอเรอทู อาเชหยู่ เออเต๊อเจ่อ เฮ๊อ, เด๊อ เหย่ซี จูเอ่ ครวาเม เกอ แกแยยิวพู๊ อา เตซว๊าเตแส่ เต๊เห่ อาคยาเนอ หม่าโต่, เร๊อ อา รา เน๊อ แกแย เด๊อ อา ทวาแถ่ เฮ๊อ เตเพร่วจือ เร๊อ ครี๊ เต๊เห่เนอ, จอแปแหร่ เด๊อ เฮ๊อ เหย่ซี เตซิครือซิลอ เร๊อ เตเตอเจ๊อตู๊จู่ เฮ๊อ. เด๋อ ครี๊พู๊ เต๊เห่ อา เตหยื่อเตแหน่ เต๊เห่ เร๊อ อา เตโอ่เซอเพร เต๊เห่ อากูเนอ, อา โอ่ แลแค เร๊อ เตซิครือซิลอ, เตหยื่อเอ่แล เกอเร๊อ เหน่, เตปล๊อเตจือ เร๊อ เตเมแอ่เมแค เต๊เห่. ลีเออต๊าบ่า ซิหยื่อ รา ดุเล๊อ หม่า เออเต๊เห่ เฮ๊อ. โท๊โต่ อา เด๊อะโล เร๊อ คูเปาโล โมเร๊อ แหน่เจ๊อ ฟีลิปปี เพรหยื่อเอ่เต ตู๊หมู่ตอกล๊อพู๊ เออเนอเต๊เห่ เจ๊อ. เตเฮ๊เบ่ โต๊โต่ เน๊อ โต๊โต่ เตเฮ๊เบ่ เหร่อ เด๊อ เง ๑:๑-๑๑ คูเปาโล แม๊เถอะ ชิเต่อเบ่ เต เต๊เห่ ๑:๑๒-๒๖ เตโอ่เซอเพร เด๊อ ครี๊ อากู ๑:๒๗-๒:๑๘ เตเตเนหนื่ออื่อ เป่ คูทิโมธี เร๊อ คูเอปาโฟรดิทัส ๒:๑๙-๓๐ เตเด๊อะรอเด๊อะเรหนื่ออื่อ เพร เด๊อ อา ซิเถ่ ครี๊พู๊ เต๊เห่ เน๊อ เตต๊อหร่อเซ๊ ชิอิเช เต๊เห่ ๓:๑-๔:๙ คูเปาโล เร๊อ อาโค วี ฟีลิปปีพู๊ เต๊เห่ ๔:๑๐-๒๐ เตเฮ๊เบ่ ตื๊อดื่อ เด๊อ คยา ๔:๒๑-๒๓ |
Wycliffe USA
The Seed Company