RUM 2 - IJA KA TOGIJAWITA MANA

Ugatameja Boko Petai

¹ Okai kouja aki mana tagu, ei, me ki, aki meime kipe maija, aki me ewidoge-tai me; aki me ino ewidogijake aki akaato peu awii; aki me ewidoge-tai kidi okai kou kodo kei te-tai kouja.

² Kei agijoudo kei te-tai bagee kede Ugatameja enanauto kidi peu eewii inii epi.

³ Ei, kei agijoudo kei te-tai bagee ewidoge-tai me ki, aki na kei te-tai kodeja, aki ki Ugatameja boko petai maida make petii taitage gaage, mee?

⁴ Juwa, okaija ugo uweuwe ipa dimi ka kojáá katijake kegepa animakai kou ko aki daba ejaikai, mee? Aki ewo, mee? Ugatameja ipa dimi kodaa tedemaida kodaa kamejawiine tijake.

⁵ Akija maawajawijake kegepa kodaa te tedemimake ko emoge dimi akaato maida kotopijaweete, emoge putu naagouda kodaa, Ugatameja boko petajake me peu eewiitagiida.

⁶ Me gakita kei tita kei tita epeepeidaiga abu japaitagi kouja.

⁷ Enaa agijo kei te-wo tijake ajiipi ma, ibo jaikai ma, peu te kija ijee ma bopi kepai bageepa ajii ti-menii imo kidi to togoo;

⁸ kodeja akaije tijake maakodo bokouto kodo te juwe bagee kede, okei peu agijo eepe-tai bagee kede emoge dimi kumi dimi dokeenii.

⁹ Didi gaduwai ma, weda ma, me jokaija ka peu kei te-tai bagee me gakita gakita maida, Jahudi bagee tiga, daana Gerika bagee maija.

¹⁰ Kodeja ajiipi bokouto ma, ibo ejaikai ma, muka-muka ma, enaa agijo kei te-tai bagee me gakita gakita maida, Jahudi bagee tiga, daana Gerika bagee maija.

¹¹ Ugatame kidi me ebepeka ewitokai beu kouja.

Musaja Dijo Douja Mana Beuda Bagee Kede

¹² Musaja dijo douja mana beuda peu kei tita bagee kede dijo douja mana beuda peu kai; daana dijo douja mana maida ka peu kei tita bagee kede dijo douja mana kodaa boko japetajawii.

¹³ Dijo douja mana kodo juwe-tai bagee kede Ugatame pekaida enaa ko beu, kodeja dijo douja mana kodo kei te-tai bagee kede maa eewii.

¹⁴ Musaja dijo douja mana beuda ka ojaa bagee kede okei ijeidaiga mana kodo dijo dopai ko, akaato dijo douja mana makeete, okei dijo douja mana beuda kodeja.

¹⁵ Dijo douja mana kodo okeija kegepa duba ebijata kodo okei ewaida awii, okeija dimi kodaa jawegajawijake; tijake okeija ka kii dimi kou dimi kodaa kegei-kegei etai juwa, enaa eewii juwa,

¹⁶ me ka gabo dimi kou ko Ugatameja boko petaitagi naagouda, Keristus Jesus kidi maidaiga, anija ajii mana kodo epeepeidaiga.

Jahudi Bagee Kede Musaja Dijo Douja Mana Maida

¹⁷ Kodeja aki Jahudi eka kaabati-toojogo ko, daana Musaja dijo douja mana maida dimi kotopijawii, daana Ugatame maida make kobidoke tai,

¹⁸ okaija dimi kodo gajake enaa agijo juma dege-dege, dijo douja mana kodaa katopijake;

¹⁹ aki ki peka wane bagee migougu jamake-tai me kidi gape ko, daana bunita duba ka bagee awe kadee etijawii,

²⁰ dimi beu bagee kede epeepi etai; jokaido etope-tai; epi ketago ma, maakodo bokouto ma dijo douja manaidaiga boko kaduwajawijake;

²¹ aki me etope-tai kidi, aki akaato topii beu, mee? Oma dá mana kodo wegajake ko, aki ki oma, mee?

²² Aki ki mogai dá wega-tai me kidi, aki mogai, mee? Aki ki utoopa migaakobe ete-tai agijo nokii egata me kidi, aki migaakobe ete-tai owaa moonaa tai, mee?

²³ Aki ki Musaja dijo douja mana kodo kobidoke tai me kidi, aki dijo douja mana kodo dijo beebu tijawijake Ugatame daba ejaikai, mee?

²⁴ Ojaa bagee jupi Ugatameja Eka ko ewidogita, ikii maida make, kapogeije ebijamakita kodo danite.

Ebaidaiga Beu Kodeja Mana Puki

²⁵ Iniitodo duwai ko epaago, Musaja dijo douja mana kodo dijo do-toojogo ko; kodeja Musaja dijo douja mana kodo dijo beebu ti-toojogo ko, akija ka iniitodo duwai kou ko te duwai jaikai.

²⁶ Kojoka iniitodo duwai beu tita me kidi Musaja dijo douja mana kodo dijo domakipi ko, okaija ka duwai beu tita kodo duwata danite egai beu, mee?

²⁷ Tijake iniitodo duwai beu kodeja dijo douja mana kodo dijo do-tai bagee kede aki ki peu kaawii, aki dijo douja mana kodo dijo beebu tita me kidi, ugata mana jago kodeja, daana iniitodo kaduwata.

²⁸ Ebaidaiga Jahudi kidi Jahudi puki ki beu kouja, daana maakodo ka iniitodo duwai kou ko ebaidaiga ma maida ka ko beu.

²⁹ Kodeja Jahudi puki kidi kegepa duba ka Jahudi, daana maakodo ka iniitodo duwai kou ko kegepa duba ka mana kodo, roh jatouga ko, ebaidaiga ko beu. Muta etuwaja kou ko me ka ko beu, kodeja Ugatame kidaa.