MARKUS 3 - IJA KA TOGIJAWITA MANA

Enakaato Gane Bokata Me Beu Jaawii

¹ Jesus sembahjang owaa duba wadoujo kijake enakaato gane bokata me idaana toojogo.

² Me ka edoutou, Sabbat naago kodo me kidi beu jaawiipagi, mee? ijeije etaine tijake.

³ Tijake enakaato gane bokata me kidiipa Jesus eteete mana, „Me jupi kiija joonidoke tai,” etii.

⁴ Tijake Jesus meido kodoopa eteete mana, „Sabbat naago enaa agijo kei tai pijo, mee? peu agijo kei tai pijo. Ija eewii, mee? wagimakai,” etii. Tijake okei utoma gabo tou.

⁵ Jesus emoge ma meido edoumigijake, okeija kegepa bida kouja gaagaa tijake, me kidiipa eteete mana, „Akija gane mapido ti.” Etijake me kidi gane mapido atijake bida kidoke tai.

⁶ Parisi bagee podomijake Herodes eepe-tai bagee ma mana wegai; kawe danite wagimakija mana kodo amo wegai joko wegai tai.

Me Wedaba Peku Watija Kotuu

⁷ Tijake Jesus ma etope-taido ma iteida uwija ke me wedaba eepei, Galilea ka ma, Judea ka ma,

⁸ Jerusalim ka ma, Idumea ka ma, Jarden onee auwaato ka ma, Sur ma Sidon makijo ka ma. Me wedaba okaija dou beu agijo kei tei tita kodo juwijake okaapa mei.

⁹ Okai etope-taido mijo koma ena naapomakai etii, me ka tipi tipi te ete-tijake.

¹⁰ Didi me wedaba beu jaawijake kouja, didi jago bagee okaapa tipi tipi etai, ewinikidoune tijake.

¹¹ Enija maija Jesus edojake, okai jumaapa mijouga kai; okei emeeme teete mana, „Aki ki Ugatame Joka,” etii.

¹² Okai maida make mana ugo te uwikume-tijake bida peu etimakai.

Etope-tai Wija ma Gaati Ewitokita

¹³ Tijake Jesus dimiida patikijake ide egata bagee manaatijake okaapa mei.

¹⁴ Okai me ida wija ma gaati ewitoki-motii; okai ma enaimo to-tijake, daana mana wude-tijake ebadikumiine.

¹⁵ Enija jaemigimake-tijake bida boko jaduwajawii.

¹⁶ Me ida wija ma gaati kede boko duwajawita kede ke, Simon kidi, kii ke okai Peterus eebatita kidi,

¹⁷ daana Zabdi joka Jakub ma, kenekame Jahja ma; okejai Buanergis eebatita, me manaida awi-toojogo, gekamugu dani bagee.

¹⁸ Andereas ma, Pilipus ma, Bartolomius ma, Matius ma, Tomas ma, Alpius jokame Jakub ma, Tadius ma, Kanani ka me Simon ma,

¹⁹ Judas Iskariot ma, Jesus eekegajawita me kidi.

Akaije Akaate Uguwo te Tomake

²⁰ Okai owaapa wadoujo kijake me wedaba okaapa kotuu timakai, tijake okei nai ma peu.

²¹ Jesus ma imee bagee kou mana kodo juwijake, te kei tai etiine uwii, me ka wegai, „Okai enijaanija” wegaigai kouja.

²² Kapogeije epi bagee maija Jerusalim makijoopa make mejake kei teete mana, „Okai duba Baalzebul awidoke tijake enija ukauto kodaa okai enijaido jaemigimakeegi kou ko,” wegai.

²³ Tijake Jesus meido utoma manaa-tijake ena dani awe-tai mana eteete mana, „Kawe dani tijake Teege ka Teege jaemigimakija?

²⁴ Kou danite jakimakita makijo akaato akaije ti-toojogo, kou makijo kodo te tomake.

²⁵ Daana me uguwoona akaato akaije ti-toojogo, kou uguwo te tomake.

²⁶ Daana Teege akaato akaije tijake dimi akawude ti-toojogo enaa te tomake, kodeja kou ko momogiida kodo.

²⁷ Me idaana ka bida jago me ka owaa wadoujo te kimake, edepedeido jamo-motiine tijake, kodeja bida jago me buda egadimai tiga tijake to, okaija agijo jamo-motii.

Rohulkudus Eduwai

²⁸ Beu maa kou ani kitii, me jokaaneido ka peu awita tuma tumaija ipa ejaikija; daana okeija akaduwa tai manaido maija.

²⁹ Okai kou kodeja meija Rohulkudus eduwapi, okai ipa te ejaikijake kii kidi imo to togoo; kodeja peu awita kodo imo to togoo.”

³⁰ Kou dani tijake Jesus wo etita, okeija ka etii ko, okai enija jago etita kouja.

Jesus Ukame ma Kenekaane ma

³¹ Jesus ukame ma kenekaane ma mejake juwouda toojogo. Me idaana mana nijaetei etijake ebadikumii.

³² Me wedaba okai watija animaki-toojogo. Me wija wido ka eteete mana, „Edododou, akuukai ma aki kenekaane ma juwouda make kaubaate,” etii.

³³ Tijake Jesus wo eteete mana, „Meime noukai ko, daana ani keneka ke?” etii.

³⁴ Tijake okai watija bagee Jesus edoumigijake eteete mana, „Edowei, noukai ma ani kenekaane ma.

³⁵ Meija Ugatameja gata dimi kei tipi ko, okai kii ke ani keneka ma, ani paneka ma, noukai ma,” etii.