فیلیپیان 4 - کتاب مقدس به زبان گیلکی - گویش شرقی

¹ پس، می برأرؤن، کی شمره دوست دانم و شیمئه دئن ئبه مشتاقم، أی کی شمه می شادی و می سر تاجین، ای عزیزؤن، ایطو خداوند مئن قایم بیسین.

پند، تشویق و دعا

² افودیه اجی خواهش کونم و سینتیخی جی خواهش کونم کی خداوند مئن همرأی ببون.

³ بله، وفادار همکار، تأجی ئم خأنم کی ای دوتته بانو کمک بوکونی، اوشون که اکلیمنتس همرأ و می بقیه همکارون همرأ که اوشون نوم حیات دفتر مئن بنویشته هننأ؛ می دوشادوش انجیل کار مئن زحمت بکشئن.

⁴ همیشک خداوند مئن شاد ببین؛ هندئه گونم: شاد ببین.

⁵ بدأ همه بینن شمه آدمای باملاحظه ای ایسین. خداوند نزدیک ایسأ.

⁶ هیچی به نگرؤن نبین، بلکه هر چی مئن دعا و تمنا همرأ، و شکر گودن همأ، شیمئه خواسته ئانه خدا به بوگؤین.

⁷ خدا صلح و سلامتی، کی هرته فهم اجی جؤرتر دره، شیمئه دیلون و فیکرونه مسیح عیسی مئن محافظت کؤنه.

⁸ سرأخره، ای برأرون، هرچی کی راسته، هرچی کی حرمت دانه، هرچی کی دوروسته، هرچی کی پاکه، هرچی کی دوست‌داشتنی و هرچی کی قابل پرستش ایسه، اگر عالی ایسه و اگر پرستش ارزشه دانه، اون باره فیکر بوکونین.

⁹ او چی کی مأجی باموته دأنین و بدست بأردین، بشتؤسه دأنین و می مئن بدئه دأنین، اوشونه انجوم بدین، و خدا صلح و سلامتی شیمئه همرأ ایسنه.

خدا تدارک دئن

¹⁰ خداوند مئن خیلی خوشحالم که الون دومرته مئبه نگرون بوبؤین. راس راسه شمه می فیکر دبین، ولی فرصت ندأشتین.

¹¹ اینه احتیاج اجی گوته‌دننئم، چون باموته دأنم که هر وضع مئن قانع ببوم.

¹² مو هم دؤنم محتاج بؤن چوطوره، هم دؤنم فراوؤنی نعمت مئن زیندگی گودن چوطوره. هرته وضع و حال مئن، زیندگی رازه، سیری و گوشنگی و احتیاج و محتاجئه یاد بیتم.

¹³ هر کارئه تینم گودن، بواسیطه او کی مأ قوت هدئنه.

¹⁴ با ای حال، لطف بودین کی می زحمات مئن شریکأبؤین.

¹⁵ شمه نی، ای فیلیپئن، بأقأیده دؤنین کی انجیل کار بنا جی، بأزون کی مقدونیه اجی بوشؤم، هیچ کلیسایی جوز شمه، دخل و خرج مئن می همرا شریکأنوبؤ.

¹⁶ حتی او زمت کی تسالونیکی شهر مئن ایسأبوم، شمه می احتیاجات ئبه کمک سرأدأین و هندئه سرأدأین.

¹⁷ نه ای کی پیشکش دومبال دبوم، بلکی یکته ثمر دومبال درم کی شیمئه اعتباره خدای ورجه زیاداکونه.

¹⁸ شیمئه کمکون کامیل می دست برسئه و می احتیاج اجی ویشتر دأنم. ایسه کی شیمئه سرأدأ کومکه اپافرودیتوس اجی هیتم، حیسابی تأمینم. شیمئه پیشکش، خوشبو عطر و قابیل قبول قوربؤنی ایسه کی خدا راضی کونه.

¹⁹ و می خدا، شیمئه همه ته احتیاجونه طبق خوشه پورجلال دولت مسیح عیسی مئن رفع کونه.

²⁰ امئه خدا و آسمونی پئر ئبه تا همیشک و تا ابد جلال دبون. آمین.

آخرته سلامون

²¹ همه ته مقدسینه مسیح عیسی مئن سلام برسؤنین. برأرونی کی می همأ ایسأن، شمره سلام گونن.

²² ائره همه ته مقدسین شیمئبه سلام رسؤنئنن، بخصوص اوشونی کی قیصر خؤنه اهل شی ایسن.

²³ خداوند عیسی مسیح فیض، شیمئه روح همرأ دبون. آمین.