فیلیپیان 3 - کتاب مقدس به زبان گیلکی - گویش شرقی

صالح بؤن، مسیح ایمؤن رای مئن

¹ سرأخره، أی می برأرون، خداوند مئن شاد ببین! تموم ایشونی کی شیمئبه نیویشته درم مئبه زحمت نئه؛ بلکی شیمئه امنیت واسی ایسه.

² او سکؤن اجی دوری بوکونین، او گوناهکارون اجی دوری بوکونین، اوشون اجی کی ختنه گودن ئبه، جسمه بینن، دوری بوکونین.

³ چونکی ختنه‌بوبؤرؤن امه ایسیم کی خدا روح همرا پرستش کؤنیم، و مسیح عیسی مئن فخر کونیم و امئه تکیه جسم سر نئه -

⁴ هرچند مو خودم دلیل دأنم که جسمه تکیه بوکونم. اگه کسی فیکر کونه کی جسم سر تکیه گودن ئبه دلیل دأنه، مو ویشتر دلیل دأنم:

⁵ هشتمی روز مئن ختنه‌ بؤن، ایسراییل مردوم اجی، بنیامین طائفه اجی، عیبرؤنی زأک، عیبرؤنی پئر مأر أجی؛ طبق شریعت، فریسی؛

⁶ طبق غیرت ، کلیسا آزاررسؤن؛ طبق صالح بؤن کی شریعت اجی هنه، بی عیب.

⁷ اما هر چی کی مئه نفع دأشت، اونه مسیح خاطیری ضرر بودونسم.

⁸ راس راسه، مو همه چئه این واسئه کی می خداوند مسیح عیسی شناختن، همه چی جی جؤرتر دره، ضرر دؤنم. اون خاطیری همه چئه چیکأدأم و ایشونه هیطو اشغال مورسون دونم. تا می نفع مسیح ببون

⁹ و اون مئن بیاته ببوم، نه می صالحی همرأ کی شریعت اجی أنه، بلکه او صالحی همرأ کی ایمؤن به مسیح را یأجی بدست أنه، او صالحی کی خدا یأجی ایسه و طبق ایمؤنه.

¹⁰ تا مسیح و اون زینده وابؤن قودرته بشناسم و اون عذابون مئن سهم بدارم، و اون مرگ مئن، اون موسون ببوم،

¹¹ تا هرجور کی بوبو، بمرده ئان اجی زینده وابؤنه بدست بأرم.

تقلا گودن، هدفه فأرسئن ئبه

¹² نه ای کی تا الؤن ایشؤنه فأرسئه دأنم یا کامیل بوبؤم، بلکی مأ جلو تؤدئنم تا اونه به دست بأرم چونکی مسیح عیسی مأ خوشئبه بدست بأرده.

¹³ برأرون، گمؤن ندأنم که مو حلئه اونه به دست بأرده بی؛ اما یکته کار کؤنم: او چئه کی پس دره یاداکونم و او چی به کی پیش دره تقلا بوکونم،

¹⁴ هدفه فأرسئن ئبه تقلا کؤنم، تا او جایزهَ به دست بأرم کی خدا اون وأسی مأ مسیح عیسی مئن، جؤر سمت دوخؤنده دأنه.

¹⁵ امئه مئن اوشونی کی پیله آدمن، خأ ایجور فیکر بوکونن؛ و اگر هرچی مئن یکجور د فیکر کؤنین، اینم نی خدا شیمئبه آشکاراکؤنه.

¹⁶ امه هخأن هر او چی کی بدست باردیم، عین هو کردکار بدأریم.

¹⁷ ای برأرون، مأجی سرمشق بگیرین و شیمئه نیگا اوشون سر هننأبی که عین او چی که امرأجی سراغ دأنین، کردکار دأنن.

¹⁸ چونکی مو چندین دفأ اوشؤن باره شمره بوته دأنم و حتی ایسه نی می أرسؤن همرأ گونم، خیلئن، مسیح صلیب دوشمنون مورسون کردکار دأنن.

¹⁹ اوشون عاقیبت هلاکته. اوشون خدا اوشون شوکؤمه و شرم آور چیزونه گولاز کونن، اوشون زمینی چیزون باره فیکر کونن.

²⁰ حال ای که امه آسمؤن شی ایسیم و خداوند عیسی مسیح رافا ایسأیم کی یکته نجات‌دهنده مورسون هنه.

²¹ او که امئه پست تنه دگردؤنئنه تا اون جلال بیته تن مورسون ببیم، او قدرت همأ که اونه قوت دئنه تا همه چئه خو فرمؤنبر چاکونه.