فیلیپیان 1 - کتاب مقدس به زبان گیلکی - گویش شرقی

¹ پولس و تیموتائوس اجی، مسیح عیسی نوکرون، همه ته مقدسین ئبه مسیح عیسی مئن کی فیلیپی شهر مئن ایسان، ناظیرون و شماسون:

² فیض و صلح و سلامتی خدا طرف اجی، امئه پئر، و خداوند عیسی مسیح، شیمئبه بأ.

دعا و شکر گودن

³ هر زمت شمره یاد أبئنم، می خدا شکر کونم،

⁴ همیشک می همه ته دعائان مئن شمه همه ته ئبه ذوق همرأ دعا کونم،

⁵ او همکاری واسی کی مسیح انجیل مئن اولته روز اجی تا ایسه دانین.

⁶ و مو حتم دأنم او کس کی خورم کاره شیمئه مئن سرأگیته، اونه تا مسيح عیسی وگرسن روز به آخر رسؤنئنه.

⁷ مو ای حقه دانم کی شمه همه ته باره ایجور حس بدارم، چره کی می دیل مئن جا دأنین؛ چونکی شمه همه ته می همرأ خدا فیض مئن شریکین؛ هم می زیندون دکتن مئن و هم انجیل اجی دفاع گودن و اون حقیقته ثابیت گودن.

⁸ چون خدا می گواه کی چوطو او احساسات همأ کی مسیح عیسی جی سرچشمه گینه، شمه همه ته ئبه مشتاقم.

⁹ می دعا اینه کی شیمئه محبت ویشتر و ویشتر ببون، دونایی و فهم کامیل همرأ ببون،

¹⁰ تا بوتؤنین بهترینه قبولاکونین و مسیح روز مئن، پاک و بی عیب ببین،

¹¹ صالحی ثمره اجی پور ببین کی بواسیطه عیسی مسیح، خدا جلال و ستایش گودنه رسنه.

انجیل ترقی

¹² أی برأرؤن، خأنم بودؤنین که او چی کی می سر بمأ، در اصل انجیل ترقی باعیث بوبو،

¹³ اوجور کی سلطنتی کاخ همه ته نگهبؤنؤن ئبه و همه کس ئبه آشکارأبو کی مو مسیح خاطیری زیندون مئن درم؛

¹⁴ و می زیندون دکتن سبب بوبو کی برأرونِ ویشتری، خداوند مئن ایشون دیل قویتر ببون تا تمؤم جرأت همرأ، خدای کلؤمه بی ترس بوگؤن.

¹⁵ بعضئن حسودی و چوشم و همچوشمی سر مسیحه موعظه کونن، ولی بعضئن خورم نیت همأ ای کاره کونن.

¹⁶ ای دومی جرگه محبت سر ایطو کونن، چونکی دونن مو انجیل اجی دفاع گودن ئبه ائره بنأ بوبؤم.

¹⁷ اما او اولته جرگه چوشم و همچوشمی سر مسیحه موعظه کونن، نه خورم نیت همرأ، چون خیال کونن ای کار همرأ زیندؤن مئن ما عذاب دئنن.

¹⁸ پس چی؟ مهم اینه کی هر جور ایسه، مسیح اعلوم ببون، چی دوروست نیت همأ ببون، چی نادوروست نیت همأ! این واسی مو شادی کونم، بله، و شادی خان بوکونم.

¹⁹ چونکی دونم کی شیمئه دعائان همرأ و عیسی مسیح روح یاری اجی، ای می آزادابؤنه ختم بنه،

²⁰ هیطو کی ایشتیاق همرا رافا ایسام و امید دأنم کی هیچی مئن شرمنده نبنم، بلکی جرات کامل همرأ، ایسه نی همیشک مورسون، چی مرگ و چی زیندگی مئن، مسیح می تن مئن جلال گینه.

²¹ چونکی زیندگی گودن مئبه مسیحه، و مردن، سود.

²² اگه خأن می زیندگئه ای بدن مئن دومباله بدئم، ای مئبه یکته کار ایسه، پورثمر. با ای حال مننئم بوگؤم کؤکتهَ دؤجین کونم!

²³ ای دوته مئنی مو سخت جنگسه درم. چره کی نأجه دأنم ای دونیا یاجی بوشوم و مسیح همرأ بیسم، چونکی ای خیلی بهتره؛

²⁴ اما می دبؤن جسم مئن، شیمئبه واجیبتره.

²⁵ چونکی این اجی مطمئنم، دؤنم کی شيمئه ترقی و ذوق وأسی، ایمؤن مئن، زینده مؤنم و شمه همه ته همرأ ایدامه دئنم،

²⁶ تا وقتی دومرته شیمئه ور بام، شیمئه فخر مسیح عیسی مئن می وأسی ویشتر و ویشترأبون.

²⁷ فقط بوگذارین شیمئه طرز زیندگی، مسیح انجیل لایق ببون، اوجور کی چی بأم و شمره بينم و چی نأم، شمراجی بشتؤم کی یکته روح مئن پابرجاین و یک فیکر، بال به بال انجیل ایمون وأسی تقلا کؤنین،

²⁸ و هیچ چیز مئن اوشون اجی کی شیمئه ضید ایسن ترس ندأنین. ای اوشون ئبه یکته آشکار نشونه ایسه هلاکت ئبه، اما شیمئبه نجات نشونهَ، و ای خدا یاجی ایسه.

²⁹ چون ای ایفتخار شیمئه قسمت بوبو کی نه تنها مسيحه ایمون بأرین، بلکه اون واسی رنج نی بکشین.

³⁰ شیمئبه هم هو جنگی هننأ کی مأ اون مئن بدین و الؤن ایشتؤنین که هندئرأم اون همأ سر کله زئدرم.