Zabbuli 3 - Endagaano Enkadde n’Endagaano Empya

Zabbuli 3

Zabbuli ya Dawudi bwe yadduka mutabani we Abusaalomu.

¹ Ayi Mukama, abalabe bange nga beeyongedde obungi! Abanfubutukiddeko okunnumba nga bangi!

² Bangi abanjogerako nti, “Katonda tagenda kumununula.”

³ Naye ggwe, Ayi Mukama, ggwe ngabo yange enkuuma; ggwe kitiibwa kyange, era gw’onzizaamu amaanyi.

⁴ Nkoowoola Mukama n’eddoboozi ery’omwanguka, n’annyanukula ng’asinziira ku lusozi lwe olutukuvu.

⁵ Ngalamira ne neebaka, era ne nzuukuka bulungi, kubanga Mukama ye ampanirira.

⁶ Siityenga enkumi n’enkumi z’abalabe bange abanneetoolodde, okunnumba.

⁷ Golokoka, Ayi Mukama, ondokole Ayi Katonda wange okube abalabe bange bonna omenye oluba lw’abakola ebibi.

⁸ Obulokozi buva gy’oli, Ayi Mukama. Emikisa gyo gibeerenga ku bantu bo.