YOELI 2 - EBAIBO INZIENUKHU

Tsisiche singa lichetsiyio khwitukhu liokhwitsakhwo MWAMI

¹ Khupe olwika musikulu sia Sayuni; khupe liyoka musikulu sianje yisio esitsienukhu; mutechele inywe abandu ba Yuda; sichila litukhu lio MWAMI lili ahembi okhwitsa.

² Liakhabe litukhu liesiilima nende lifumbi; litukhu liamalumbesi nende esiilima esimwamu ti. Omukanda omukali kwetsisiche kwitsanga singa esiilima sifuunikhanga ebikulu, khusili okhubakhwo nende akafwana yaka, khandi sikakhabekhwoho olundi tawe.

³ Tsisiche yitsi, tsilitsanga ebiraakwa biosi singa omul'lo. Imbeli watsio emikunda chifwana singa omukunda kwa Edeni, ne inyuma watsio nesitsiimi butswa; sibulaho esiatsiralitsanga tawe.

⁴ Tsifwana singa etsisululi, khandi tsilukhanga singa etsisululi tsielihe.

⁵ Olwa tsilukhilanga khubutenje bwebikulu, tsikhupanga liyoka singa amakaari kobulwani, khandi tsikhupanga liyoka singa amayoosi ketsikhwi etsihitsanga m'mul'lo. Tsiepangile singa abasikari belihe aberechekhele okhulwana.

⁶ Olwa tsiesundanga ahembi, buli mundu ahambwa noburi obukali; ne buli mundu afwilil'la m'moni.

⁷ Tsiseeranga singa abasikari, tsininanga khumasisi singa abalwani belihe; Tsiosi tsitsilil'langa okhuchenda nitsitsia hambeli oburekotola kotola khunjila tawe.

⁸ Kata sitsietuyanangakhwo tawe; tsipulukhanga ne sibulaho esinyala okhutsikal'la tawe, ne sialiho onyala okhutsikal'la tawe.

⁹ Tsilukhanga bwangu okhuseera litaala, tsiilukhilanga ikulu khumasisi, tsininanga ikulu khutsinyumba, ma tsinjil'langa mumadilisa singa abeebi.

¹⁰ Esibala sirenganga nitsili ahembi okhwola, likulu litechelanga; eliuba nomwesi biilima t'ti, ne tsinyininyini natsio tsilekha okhwakha.

¹¹ OMWAMI alakanga abasikaribe nomwoyo omukali. Emikanda chiabasikari echimuhul'langa neminji khandi etsiobunyali. Mako obwe litukhu lio MWAMI liakhabe eliokhuriisia! Niwina owakhahonokokhe mulio?

Abandu babool'lwa bekalukhanie nokhweyama tsimbi

¹² OMWAMI aboolanga mbu, “Ne kata luno mweyame mubwatooto ma mukalukhe khu ise, nokhuhonga okhulia, nokhulakaya, nende okhwekhuula.

¹³ Lekhe emioyo chienywe chiesikokele tsimanyie esibeela, okhurandula tsingubo khwonyene sikhuhel'le tawe.” Kalukhile OMWAMI Nyasaye wenywe. Nowesirenda khandi nowe tsimbabasi tsinyinji, sahambwanga nelirima bwangu tawe, khandi waitsula nobuyanzi oburalilu, wayerechekha okhubeela tsimbabasi tawe okhusaalisia.

¹⁴ Haundi OMWAMI Nyasaye wenywe yakhakalukhania amakani kaake, ma amulaamile tsikhabi tsiokhunyoola ebiakhulia ebinji. Nilwo olwa munyala okhumuhanila emisango chiobuswache nende echiewaini.

¹⁵ Khupe olwika mu Sayuni; mweele litukhu liokhuhonga okhulia, mulache libukaana lioluyali.

¹⁶ Bunjelesie abandu halala, mubarechekhe khulwe libukaana litsienukhu, muleeremwo abakhulundu; bunjelesie abaana, kata nende abatoro. Kata abeeha balekhe tsinyumba tsiabwe betse.

¹⁷ Hakari holusambwa nende obwinjil'lo bwe Hekalu, abesaalisi abafulukhan'nanga OMWAMI, balakaye nende okhusaaya nibaboola mbu, “E OMWAMI beela abandu baabo tsimbabasi, oralekha abandu betsimbia tsindi bakhuchaaye nende okhutsekhel'la nibareeba, ‘Nyasaye wefwe ali hena?’ ”

Nyasaye akalusia obunolu mumikunda

¹⁸ Ma OMWAMI nahendel'la esibala sisie; khandi naba netsimbabasi khubandube.

¹⁹ OMWAMI nakalusia nabool'la abandube mbu, “Luno nzia okhumuha obuswache, nende ewaini nende amafura komuseituni ma sibulaho esianamutakhe Abandu betsimbia tsindi sinabamucheaye tawe.

²⁰ Nambinie omukanda kwetsisiche okwarula esinyolu mwinywe, ma nakhunge tsisiche okhutsia musitsiimi. Tsisiche tsiemelanga tsilakhungwa okhutsia Munyanza Yechumbi, ne etsisikalanga inyuma tsilakhungwa okhutsia Munyanza ya Hakari. Emibili chiachio chilahunya obukundi obubi. Ndakhatsimume khulwe yako aka tsiamukhol'la.

²¹ “Muraria tawe inywe emikunda, nebutswa mube nobuyanzi nende obusangali, khulwamang'ana amakhongo ako MWAMI amukholeye kosi.

²² Inywe tsinyama tsiomubulimo, muraria tawe; sichila obwayilo bulimwo obunyasi; emisaala chiamanga ebiamo, kata emikhuyu nemisabibu chiamanga amatunde.

²³ “Inywe abandu ba Sayuni, sangale, mube nobuyanzi khuko MWAMI Nyasaye wenywe amukholeye; umuheye ifula yerotso ehela, ifula yesubwe nayo ikwiye mubwinji; ne ifula sechweyele tawe.

²⁴ Olutse nalwitsulemwo obuswache; ebinu biletsulamwo ewaini nende amafura komuseituni.

²⁵ Ndakhamukalusisie biosi ebiamwakosia mumihika chietsisiche tsialia ebiraakwa bienywe. Nise owali okhumurumila omukanda kwetsisiche.

²⁶ Mwakhabe nebilibwa ebinji, ma mwakhekure. Mwakhafumie OMWAMI Nyasaye wenywe khulwokhumukhol'la akokhuchenya yaka. Abandu banje sibakhachaaywekhwo khandi tawe.

²⁷ Nilwo olwa mwakhamanye ndi halala n'nenywe, khandi mbu ise nise OMWAMI Nyasaye wenywe; sialiho oundi tawe. Abandu banje sibakhachaaywekhwo khandi tawe.”

Litukhu lio MWAMI

²⁸ “Ma ndakhetsusie Omwoyo wanje mubandu bosi; abaana benywe abasiani nende bakhaana bakharibule amang'ana kanje, abakhulundu benywe bakhaloore amalooro, ne ababuukha benywe balilola amabisulo.

²⁹ Khandi mumatukhu kene yako, ndakhetsusie Omwoyo wanje mubakholi, abasaatsa nende abakhasi.

³⁰ “Ndimanyia ebiokhuhuka mwikulu nomusibala, nabio biakhabe amatsahi, nomul'lo, netsisiilo tsiomwosi.

³¹ Eliuba liakhakwe esiilima ne omwesi kwakhakwe amatsahi, litukhu lio MWAMI likali khandi eliokhurisia, nilisili okhwola.

³² Nebutswa abandu bosi abakhalakayile OMWAMI bakhahonibwe. Singa OMWAMI yaboola, ‘Abalala mu Yerusalemu bakhahonokokhe, yabo abe ise OMWAMI ndakhahule bakhahone.’ ”