DANIELI 3 - EBAIBO INZIENUKHU

Nebukadinesa alaka abandu bosi okhwekayakaya esiniini sietsahabu

¹ Omuruchi Nebukadinesa yalaka mbu esiniini sietsahabu silombwe. Oburambi bwasio bwokhutsia ikulu bwali etsimiita amakhumi kabili natsine natsitaru ne, obuchiikha bwasio bwali etsimiita tsitaru, nalaka mbu sisinjisibwe musipaapi sia Dura mulukongo lwa Babulonia.

² Ma Nebukadinesa nalanga abemelibe bosi okhwitsa halala. Nabo bali Abaami, abakafuna, abakhongo babasikari, abachetsiyi bomuruchi, ababiikhi bamapesa, abayaali, abakhalachi bemise nende abemeli bandi bosi abetsingongo. Balangwa okhutsia khumulukha kwokhusaayila esiniini esiomuruchi Nebukadinesa yali nasinjisisie.

³ Olwabemeli bosi bali nibetsele halala nibasinjiiye imbeli wesiniini tsana khulwo khusisaayila,

⁴ omurumwa womuruchi yakhupa omunwa nalanjisia mbu, “Kano niko akamulachilisibwa okhukhola, inywe abandu bamahanga, abetsinzibulo nende ababuli ol'lolomo.

⁵ Olwa muhul'la amayoosi kolwika, lilele, litungu, esilili, limuka nende amayoosi akobukhana obweimbila yosi, mwiname hasi khulwa okhwekayakaya esiniini sietsahabu, esiomuruchi Nebukadinesa yasinjisiisie nimusiekayakaya.

⁶ Ne omundu wosi orakhasinamila narasiekayakaya tawe, alafuubwa mus'sambilo esiomul'lo okwatukhanga.”

⁷ Kho olwa bahul'la amayoosi tsana, abandu bamahanga, abetsinzibulo nende ababuli ol'lolomo benama hasi nibekayakaya esiniini esietsahabu esiomuruchi Nebukadinesa yali nasinjisiisie.

Abalina ba Danieli bataru bayaalwa khulwe esikala marwi

⁸ Olwene yilwo, nilwo olwa Abababulonia bandi beetsa nibayaala Abayahudi.

⁹ Babool'la omuruchi Nebukadinesa mbu, “Omuruchi omenye inziayo!

¹⁰ Ibe omuruchi wabeye okhuhaana lilako noboola mbu abandu bosi abahul'la amayoosi kolwika, lilele, esilili, litungu, limuka nobukhana obweimbila yosi, bename bosi nibekayakaya esiniini sietsahabu,

¹¹ ne omundu wosi orasinamila narasiekayakaya tawe, afuubwe mus'sambilo esiomul'lo.

¹² Kho baliho Abayahudi bandi abawaraho okhusinjil'la amang'ana kolukongo lwa Babulonia, nabo ni Shaduraka, Meshaka, nende Abedineko abaralondanga lilako tawe. Sibekayakayanga abanyasayebo kata okhwinamila esiniini sietsahabu esiasinjisisie tawe.”

¹³ Khulwe yako omuruchi yatiilwa noburima obukali ma nalaka mbu Shaduraka, Meshaka, nende Abedineko baleerwe imbeliwe. Kho abandu yabo nibaleerwa imbeli womuruchi.

¹⁴ Nebukadinesa nabareeba mbu, “Nitooto mbu ibe Shaduraka, Meshaka, na Abedineko simwekayakayanga abanyasaye banje kata okhwinamile esiniini esietsahabu esiandasinjisisie tawe?

¹⁵ N'nondi mwerechekhe. Nimuhul'la amayoosi akolwika, lilele, esilili, litungu, limuka, nobukhana obweimbila yosi, mwiname hasi nimwekayakaya esiniini esiandalombele. Ne nimuba nimureenama tawe, mulafubwa bwangu musisambilo esiomul'lo. Kho ninyasaye sina owitsa okhumuhonia okhurula m'makhono kanje?”

¹⁶ Shaduraka, Meshaka, nende Abedineko nibakalusia omuruchi nibamubool'la mbu, “E Omwami Nebukadinesa, sikhwitsa okhwesoola khwing'ana yili imbeliwo tawe.”

¹⁷ Ne nikaba nikali mbu khwitsa okhufuubwa m'mul'lo, Nyasaye wakhwekayakayanga aleetsa okhukhuhonia okhurula m'mul'lo yikwo. Ma khandi aleetsa khukhuhonia okhurula m'makhonoko, Omwami.

¹⁸ Ne kata narakhuhonia tawe, Omwami, khwenyanga omanye mbu sinakhwekayakaye abanyasayebo, kata okhwinamilakhwo esiniini sietsahabu esiawasinjisisie tawe.

Abalina ba Danieli bataru bakhalachilwa okhufwa

¹⁹ Nebukadinesa naba omululu khu Shaduraka, Meshaka nende Abedineko ma nakhuunia obwenibwe khulwe lirima. Ma nalaka mbu omul'lo okwes'sambilo kumeetwe hali khane nakhataru, okhuyomba okwakhasotso.

²⁰ Ne yalaka abasikari abetsingufu abomwihelie okhuboha Shaduraka, Meshaka, nende Abedineko, ma babafuube mus'sambilo esiomul'lo.

²¹ Kho abandu yabo nibabohwa, nibebiikhile etsikanzo tsiabwe, etsilong'u, etsikofia, nende tsingubo tsindi ma nibafuubwa m'mul'lo.

²² Lilako eliomuruchi liali lilulu okhusila, ne es'sambilo nasio siali nisihiiye p'pa, kho olumemo olwomul'lo lwera abasikari ababukula Shaduraka, Meshaka nende Abedineko okhubafuuba m'mul'lo.

²³ Abandu bataru yabo Shaduraka, Meshaka, nende Abedineko nibakwa m'mul'lo okwatukhanga nibabohelwe.

²⁴ Omuruchi Nebukadinesa nachenya, nasinjila matetekhana. Nareeba abakhulundu bomusekwe mbu, “Sikhufuubile abasaatsa bataru m'mul'lo nibabohelwe?” Nabo nibakalusia mbu, “Nitooto omwami.”

²⁵ Naye nakalusia mbu, “Ne ndolanga abandu bane, abarabohelwe. Bachendanga m'mul'lo hakari, ne sikubasambangakhwo tawe. Ne owakhane, afwananga om'malaika.”

Abandu bataru balakhuulwa ma nibabiikhwa khutsindebe tsieikulu

²⁶ Ma Nebukadinesa niyesuta ahembi khumuliango okwes'sambilo esiomul'lo okwatukhanga butinyu, nalanga mbu, “Shaduraka, Meshaka, nende Abedineko, abarumikhili ba Nyasaye owe Ikulu muno, rule mwitse hano!” Ne Shaduraka, Meshaka nende Abedineko nibarula m'mul'lo.

²⁷ Ma abaami, abakafuna, abakhongo babasikari, nende abemeli bandi bosi nibebunjikha halala okhulola abandu bataru yabo. Omul'lo sikwaali nikubasambilekhwo tawe, kata liswi liemirwe chiabwe, netsingubo, sibiayiakhwo kata okhuhunya omul'lo tawe.

²⁸ Nebukadinesa naboola mbu, “Nyasaye wa Shaduraka, Meshaka nende Abedineko yetsoomibwe. Yarumile om'malaikawe okhuhonia abarumikhilibe yaba abamusubila. Basuula amalako kanje, nibara obulamu bwabwe musibi musilenje siokhwinamila, nokhwekayakaya nyasaye undi wosi narali Nyasaye wabwe yenyene.

²⁹ “Kho luno mbaananga lilako mbu: Omundu wosi owelihanga liosi, nohomba owolwibulolwosi, nohomba owol'lolomo lwosi, owakhal'lomakhwo ling'ana liosi liibi khu Nyasaye wa Shaduraka, Meshaka nende Abedineko, alatonywa mubitonye ne inyumbaye elasambwa, sichila abulaho omunyasaye undi wosi onyala okhuhonia abandu singa Nyasaye wabwe tawe.”

³⁰ Ma Omuruchi nahelesia Shaduraka, Meshaka nende Abedineko tsindebe tsieikulu mulukongo lwa Babulonia.