DANIELI 2 - EBAIBO INZIENUKHU

Lilooro lia Nebukadinesa

¹ Nebukadinesa yaloora lilooro m'muhika kwakhabili kwoburuchibwe. Lilooro yilio liamuhendia omwoyo okhusila ma kata siyaali onyala okhukona tsindoolo tawe.

² Kho yarumania abafumu, abalakuli, abaroobi, nende abebitsohela beetse okhumwinoosia esifune sieliloorolie. Olwa beetsa ma nibasinjila imbeli womuruchi,

³ omuruchi yababool'la mbu, “Nyakhananga mumakani khukelilooro liandali okhuloora. Ndakhenya okhumanya esifune sialio.”

⁴ Nabo nibakalusia omuruchi mul'limi lwa Aramaiki nibaboola mbu, “E Omwami omenye inziayo, khubool'le lilooro lilio tsana nefwe khwiitsa okhukhwinoosia esifune sialio.”

⁵ Omuruchi nabakalusia naboola mbu, “Mal'le okhukhalaka mumwoyo mbu okhwola mumbool'le akandali okhuloora ma khandi mumbool'le esifune siako. Muraambool'la, nzie okhulaka mbu mutonywe mubitonye netsinyumba tsienywe tsisambwe.

⁶ Ne nimuba nimumbool'la akandoor're nende esifune sielilooro tsana, nzia okhumuhelesia esihanwa nende oluyali olukhongo. Khe luno mbool'le akandali okhuloora nende esifune sielilooro tsana.”

⁷ Nabo nibakalusia omuruchi nibaboola mbu, “Ibe omuruchi nooba nokhubool'la akawaloor're, nefwe khulakhubool'la esifune siako.”

⁸ Omuruchi nakalusia mbu, “Singa ndaali okhuboola, manyile obulahi mbu, muteemanga okhwemeeta inyinga, sichila mumanyile mbu mal'le okhukhalaka mumwoyo kwanje

⁹ okhumuhelesia esinyasio esitelwa nimuba nimurambool'la lilooro lianje. Mwali okhuhuchilisania halala okhutsilil'la okhumbool'la obubehi sichila mupaalanga mbu fwana akandali okhulaka keetsa okhukalukhana. Kho mbool'le akandabeye okhuloora ma nilwo olwa nzia okhumanya mbu munyala okhumbool'la esifune siako.”

¹⁰ Abachetsiyi yabo nibakalusia omuruchi nibaboola mbu, “Abulaho omundu wosi khusibala siosi owakhanyala okhukhubool'la ibe omwami akawenyanga okhumanya. Abulaho omuruchi wosi nohomba omukhongo kata owetsingufu okhusila owareebakhwo omufumu wosi nende omuroobi wosi kata omulakuli ling'ana ol'la elioreebele yili.

¹¹ Ake ibe omuruchi oreebanga okhol'lwe namatinyu kata sialiho onyala okhukakalusia tawe, nibarali abanyasaye bonyene, ne sibamenyanga mubandu tawe.”

¹² Khulwe yako, omuruchi yatiilwa noburima obukali ma nalaka mbu abachetsiyi bomuruchi bosi abali mu Babulonia beerwe.

¹³ Kho lilako liahanwa mbu abachetsiyi bosi beerwe, Danieli nabasie nibalimwo.

Nyasaye yamanyia Danieli esifune sielilooro

¹⁴ Ma Danieli natsia khu Arioku, omwemeli wabasikari, abalindanga omuruchi, owali naheywe lilako okhwira abachetsiyi bomuruchi. Yarumikhila amang'ana kobuchesi nende oburechelefu

¹⁵ okhureeba Arioku esifune esichil'le omuruchi nahaana lilako lilulu mbwo. Ma Arioku namanyia Danieli akali nikekhol'le.

¹⁶ Danieli natsia bwangu khumuruchi ma nareeba obweyangu buhela kho abe onyala okhubool'la omuruchi esifune sieliloorolie.

¹⁷ Ma Danieli nakalukha ingo okhubool'la Hanania, Mishaeli, nende Asaria akali nikekholekhele.

¹⁸ Yababool'la basaaye khu Nyasaye womwikulu abahe tsimbabasi, khandi bamureebe abenoosie esifune sielilooro yilio kho balekhe okhwira halala nabachetsiyi bandi ba Babulonia.

¹⁹ Ma obutukhu bwene yibwo libisulo tsana liabisul'lwa Danieli mukhubisula ma Danieli niyetsoomia Nyasaye womwikulu

²⁰ naboola mbu, “Nyasaye yetsoomibwe khulwe inziayo, sichila nomuchesi khandi nowobunyali.

²¹ Akalukhanianga tsinyinga nende amatukhu; yemekhanga abaruchi khandi nabahiniaho. Niye ohaananga obuchesi, nende obumanyilisi.

²² Abisulanga amang'ana akali muusi nende akebisa, Amanyanga akali musiilima, ne obulafu bwamubotokhana.

²³ E Nyasaye owabakuka banje, khwitsoominjia nikhuhelesia oluyali. Niwe owambelesia obuchesi nende tsingufu. Ne luno ungalusisie amasaayo kanje, khandi ukhumanyisie akakhunyala okhubool'la omuruchi.”

Danieli yaboola akomuruchi yaloora nende esifune siako

²⁴ Kho Danieli natsia khu Arioku owomuruchi yali nalakile yeere abachetsiyi bomuruchi. Yamubool'la mbu, “Umbile imbeli womuruchi, nase nzia okhumubuul'la esifune esieliloorolie. Oreera abachetsiyi ba Babulonia tawe.”

²⁵ Ma Arioku nahila Danieli imbeli womuruchi Nebukadinesa bwangu namubool'la mbu, “Nyooye mulala khubandu abatisibwa okhurula Ebuyahudi, onyala okhukhubuul'la ibe omuruchi esifune sielilooro.”

²⁶ Omuruchi nareeba Danieli (oweliiralie lindi liali Beliteshasa) mbu, “Onyala okhumbuul'la lilooro eliandaloora nende esifune sialio?”

²⁷ Danieli nakalusia omuruchi naboola mbu, “Omwami wanje, abulaho omundu omuchesi, kata omulakuli, omufumu, kata owebitsohela onyala okhukhubuul'la ibe omuruchi akelibisulo elioreebele tawe.

²⁸ Nebutswa aliho Nyasaye mwikulu, obisulanga akamabiswi. Ne niye owakhumanyisie ibe Nebukadinesa akakhekhole m'matukhu aketsanga. Luno nyenya okhukhubool'la lilooro, akawaluutsi mumabisulo noli mundoolo.

²⁹ “Kali mbu, olwe ibe omuruchi, wali nokonanga wali okhuloora amang'ana aketsa okhwekhola olunyuma. Ne Nyasaye obisulanga akamabiswi yakhumanyisie akeetsanga okhwekhola.

³⁰ Nebutswa libisulo lino libisuuywe khu ise tawe sichila ndi omuchesi okhuyomba omundu undi wosi, habula mbu ibe omuruchi omanyibwe esifune esieliloorolio nende amapaalo aketsele khuibe.

³¹ “Ibe omwami, mumalooroko waluutsi esifwanani esikhongo nisisinjiiye imbeliwo. Siali esietsingufu khandi esing'inang'inu ne okhulolekha khwasio nikhuba okhwokhuriisia.

³² Omurwe kwasio kwali okwetsahabu isiyikhu; esilifu siasio namakhono kasio biali ebiefetsa. Inda yasio namarango kasio nabio nibiba ebiomukasa.

³³ Emiluku chiasio chiali echiesibia ne tsindubar'ro tsiasio elubeka l'lala tsiali etsiesibia nelubeka undi nitsiba etsielitoyi.

³⁴ Olwa wali nosihenganga, lichina liabukha okhurula khusikulu omukhono kwomundu nikuralitil'lekhwo tawe. Liakhupaka esifwanani tsana khutsindubar'ro tsiesibia nende etsielitoyi ma nilisitubula.

³⁵ Nonoho esibia, litoyi, omukasa, efetsa, netsahabu biosi halala nibitubukha ma nibifwana omukhuutsi okuli halutse munyinga yom'basu. Omuyeka kwabipulusia biosi sila okhulekhakhwo esindu siosi. Nebutswa lichina eliakhupaaka esifwanani tsana liakwa esikulu esikhongo ma nilimaala esibala siosi.

³⁶ “Kho, lino nilio eliali lilooro tsana. Ne luno nyenyanga okhukhubool'la ibe omwami esifune sialio.

³⁷ Ibe omwami oli omuruchi okhuyomba abaruchi bandi bosi. Nyasaye womwikulu wakhwemekha okhuba omuruchi omukhongo ma wakhuhelesia tsingufu, obunyali nende oluyali.

³⁸ Nyasaye wakhukhola omuruchi musibala mwosi ahabandu bamenyanga, khandi wakhukhola omwami khutsinyama tsiomubulimo, nokhumanyonyi kokhwikulu. Niwe omurwe okwetsahabu owawaluutsi.

³⁹ Inyumawo, oburuchi bundi bwakhabeho, oburali obukhongo singa obubwo tawe. Inyuma wobwene yibwo, obundi obwakhataru bwakhabeho obuli obwomukasa. Bwakharuke esibala siosi.

⁴⁰ Ma nilwo olwa khwakhabeho nende oburuchi bwakhane obwetsingufu singa esibia esiarakanga nende okhutubula buli sindu siosi. Singa butswa obwesibia siarakanga buli esindu, nimbwo oburuchi bwene yibwo bwakharake nibutubula oburuchi obundi bwosi obwaranjil'la.

⁴¹ Khandi wali okhulola ebilenje nende ebino, ebiali elubeka ebiesibia nelubeka undi biali ebielitoyi. Yako kamanyianga mbu oburuchi yibwo bwakabukhane. Bwakhabeemwo esindu esietsingufu singa etsiesibia, sichila esibia siatsokanibwa nende litoyi.

⁴² Ne singa ebino biebilenje biali ebiesibia elubeka undi, nelitoyi elubeka, kho oburuchi tsana bwakhabe obwetsingufu elubeka l'lala ne nibubula tsingufu elubeka luno.

⁴³ Khandi wali okhulola esibia nisitsokanibwe nelitoyi. Yako kamanyianga mbu abaruchi boburuchi yibwo bwakhahambanie abandu khulwo okhuteesania. Nebutswa sibakhahambane halala tawe, singa obwesibia sirakhanyala okhutsokanibwa nelitoyi tawe.

⁴⁴ Ne m'matukhu kabaruchi yabo, Nyasaye womwikulu yakhareho oburuchi oburakhahweho tawe. Sibwakhalekwe nabandu bandi tawe, nebutswa bwakhamume oburuchi bundi yibwo bwosi ma bwakhahindile inziayo.

⁴⁵ Wali okhulola singa obwelichina liali okhwabukha okhurula khusikulu, omukhono kwomundu nikuralitil'lekhwo tawe. Khandi walola singa obwaliaraka esifwanani tsana esialombwa khu sibia, omukasa, litoyi, efetsa, nende khutsahabu. Nyasaye omukhongo amanyinjia ibe omuruchi amang'ana akakhekhole mumatukhu ketsanga. Mal'le okhukhubool'la akawali okhuloora ma khuribuliye esifune siako siatooto.”

Omuruchi yahelesia Danieli esihanwa

⁴⁶ Ma omuruchi Nebukadinesa namwinamila Danieli nalaka mbu Danieli aleer'rwe ebihanwa khandi akhol'lwe omusango.

⁴⁷ Omuruchi nabool'la Danieli mbu, “Tooto mwene, Nyasaye wenywe ni Nyasaye omukhongo mubanyasaye bosi, ye nomwami khubaruchi bosi, khandi niye obisulanga amabiso. Manyile yaka sichila ibe unyaliiywe okhwinoosia libisulo yili.”

⁴⁸ Omuruchi nahelesia Danieli indebe ingali muburuchibwe khandi nomuhelesia ebihanwa ebinji ebioluyali. Namwemekha okhusinjil'la olukongo lwa Babulonia khandi namukhola omwemeli wabachetsiyi bomuruchi bosi.

⁴⁹ Danieli yal'loma nomuruchi ma omuruchi neyemekha Shaduraka, Meshaka nende Abedineko okhuba abasinjil'li bamang'ana kolukongo lwa Babulonia. Nebutswa Danieli yasikala hango homuruchi.