ᐱᓕᐱᒥᐅᓄᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓅᓯᑦᓯᐊᒥᒃ ᐃᓕᓮᓃᑦ

¹ ᑍᒤᒻᒪᑦ ᐅᒃᐱᕐᑑᖃᑎᒃᑲ, ᓇᒡᓕᒋᕙᑦᓯ ᐅᖓᒋᓪᓗᓯᓗ, ᐃᓕᑦᓯᓐᓄᑦ ᖁᕕᐊᓱᒃᑎᑕᐅᓯᒪᕗᖓ ᐅᐱᒋᒻᒪᕆᒃᐸᑦᓯᓗ, ᑍᒫᒃ ᓱᖁᓯᕐᑍᓕᒋᑦᓯ ᐃᓅᓯᑦᓯᓐᓂ ᐊᑕᓂᕐᒥ, ᓇᒡᓕᒋᔭᒃᑳ.

² ᐃᐅᑎᐊᓗ ᓯᓐᑍᑭᓗ ᐊᒃᓱᕈᕐᓗᖓ ᕿᓄᕕᒋᕙᑦᓯᒃ, ᐊᖏᖃᑎᒌᖁᓪᓗᓯᒃ ᐊᑕᓂᕐᒥ.

³ ᐃᕝᕕᓪᓗᑦᑕᐅᖅ ᑲᔪᓯᑦᓯᐊᕐᑐᒥᒃ ᐱᓇᓱᐊᖃᑎᒐ, ᕿᓄᕕᒋᕙᒋᑦ ᑖᒃᑯᐊᒃ ᐊᕐᓈᒃ ᐃᑲᔪᕐᑕᐅᖁᓪᓗᒋᒃ, ᐊᒃᓱᕈᒻᒪᕆᒃᓗᑎᒃ ᐱᓇᓱᐊᖃᑎᒋᓯᒪᒐᒃᑭᒃ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᓯᐊᒻᒪᕐᑎᑦᓯᖃᑎᒋᓪᓗᒋᒃ, ᒃᓕᒥᓐᑎ ᐃᓚᒋᓪᓗᒍ ᐊᓯᖏᓪᓗ ᐱᓇᓱᐊᖃᑎᒃᑲ ᐃᓚᒋᓪᓗᒋᑦ, ᐊᑎᖏᑦ ᑎᑎᕋᕐᓯᒪᔪᑦ ᐃᓅᓯᕾᓐᓇᕈᒫᕐᑐᑦ ᐊᑎᖃᕐᕕᖓᓐᓂ.

⁴ ᖁᕕᐊᓱᑦᓮᓐᓇᕆᑦᓯ ᐊᑕᓂᕐᒥ; ᐅᖃᒃᑲᓐᓂᕐᐳᖓ ᖁᕕᐊᓱᒋᑦᓯ.

⁵ ᐃᓅᖃᑎᓕᒫᑦᓯᓐᓄᑦ ᓂᑲᒍᓱᖕᓂᓯ ᖃᐅᔨᔭᐅᓕ. ᐊᑕᓂᖅ ᖃᓂᒻᒪᑦ.

⁶ ᓱᓇᒥᒡᓘᓐᓃᑦ ᐃᓱᒪᔮᕈᑎᖃᕐᓂᐊᕋᓯ, ᑐᒃᓯᐊᕐᓗᓯᓕ ᒎᑎᒧᑦ ᓴᖅᑭᑎᑦᓯᓕᕆᑦᓯ ᐱᔭᕆᐊᖃᕐᑕᑦᓯᓐᓂᒃ, ᕿᓄᕕᒋᓕᕌᖓᑦᓯᐅᒃ ᖁᔭᓕᓂᖃᖃᑦᑕᕆᑦᓯ ᐆᒻᒪᑎᑦᓯᒍᑦ.

⁷ ᒎᑎᐅᑉ ᓮᒻᒪᕐᑎᑦᓯᓂᖓᑕ, ᑐᑭᓯᔭᐅᔪᓐᓇᕐᑐᓂᑦ ᐊᖏᓂᕐᓴᐅᔫᑉ, ᐆᒻᒪᑎᓯ ᐃᓱᒪᓯᓗ ᓴᐳᑎᓯᒪᓂᐊᕐᐰᑦ ᙭ᔅᑑᓯ ᔩᓱᓯᒥ.

⁸ ᑭᖑᓪᓕᕐᐹᒥᓪᓕ ᐅᒃᐱᕐᑑᖃᑎᒃᑲ, ᓱᓇᑐᐃᓐᓇᖅ ᓱᓕᔫᒃᐸᑦ, ᐅᐱᓐᓇᕐᐸᑦ, ᓈᒻᒪᓈᑦᓯᐊᕐᓂᐅᒃᐸᑦ, ᐃᑦᔪᕐᓁᑉᐸᑦ, ᓇᒡᓕᖕᓇᕐᐸᑦ, ᐱᑦᓯᐊᕐᓂᐅᒃᐸᑦ, ᓈᒻᒪᓈᕐᓯᒪᑦᓯᐊᕐᓂᖃᕐᐸᓪᓗ, ᓂᕐᑐᕐᓇᕐᑐᖃᕐᐸᓪᓗ, ᑕᒪᒃᑯᐊ ᐃᓱᒪᒃᓴᕐᓯᐅᕈᑎᒋᓯᒋᒃ.

⁹ ᐃᓕᓐᓂᐊᓚᐅᕐᑕᓯ ᐃᓕᓚᐅᕐᑕᐅᓯᓗ ᑐᓴᓚᐅᕐᑕᓯᓗ ᑕᑯᓚᐅᕐᑕᓯᓗ ᐅᕙᓐᓂᑦ ᐱᓂᐊᕐᓂᒃᑯᑦ, ᑕᒪᒃᑯᐊ ᐱᓇᓱᐊᕐᓯᒋᒃ; ᒎᑎᐅᓪᓗ ᓮᒻᒪᕐᑎᑦᓯᔫᑉ ᑕᕝᕙ ᐃᓚᒋᓂᐊᕐᐹᓯ.

ᖁᔭᓕᓂᖅ ᑐᓂᕐᕈᑕᐅᔪᓄᑦ

¹⁰ ᐊᖏᔪᒥᒃ ᖁᕕᐊᓱᒃᐳᖓ ᐊᑕᓂᕐᒥ ᓱᓕ ᐃᖅᑲᐅᒪᒐᑦᓯᓐᖓ ᐅᕙᓐᓂᒡᓗ ᐃᑲᔪᕈᒪᓂᓯ ᓴᖅᑭᑎᓐᓇᑦᓯᐅᒃ; ᐅᕙᓐᓂᒡᓕ ᐃᑲᔪᕈᒤᓐᓇᓚᐅᕋᓗᐊᕐᑐᓯ, ᐱᕕᒃᓴᖃᓚᐅᓐᖏᓚᓯᓕ.

¹¹ ᑕᒪᑐᒥᖓ ᐅᖃᓐᖏᓚᖓ ᖁᔭᓈᕐᑕᐅᓇᓱᒋᓂᕐᒧᑦ; ᑐᑭᓯᓯᒪᒐᒪ ᖃᖓᓕᒫᖅ ᖃᓄᐃᑦᑐᒦᒃᑲᓗᐊᕈᒪ ᐱᒋᔭᓐᓂᒃ ᓈᒻᒪᒃᓴᕆᐊᖃᕐᓂᓐᓂᒃ.

¹² ᐊᔪᕐᓴᕐᓂᕐᒥᒃ ᖃᐅᔨᓯᒪᕗᖓ, ᐱᖃᓗᐊᕐᓂᕐᒥᒡᓗ ᖃᐅᔨᓯᒪᒋᕗᖓ; ᐱᔭᕐᓂᖏᑦᑐᒃᑯᑦ ᖃᐅᔨᓯᒪᒐᒪ ᓇᓂᑐᐃᓐᓈᕋᓗᐊᕈᒪ ᖃᖓᓕᒫᖅ ᓈᒻᒪᒃᓴᕆᐊᖃᕐᓂᓐᓂᒃ ᐊᕿᐊᑦᑐᓱᒃᑯᒪᓘᓐᓃᑦ ᑳᒃᑲᓗᐊᕈᒪᓘᓐᓃᑦ, ᐱᖃᓗᐊᕈᒪᓘᓐᓃᑦ ᐊᔪᕐᓴᕈᒪᓘᓐᓃᑦ.

¹³ ᓱᓇᓕᒫᓂᒃ ᐱᔪᓐᓇᕐᐳᖓ ᙭ᔅᑑᓯᒥ ᐱᔪᓐᓇᕐᑎᑦᓯᔨᓐᓂ.

¹⁴ ᐱᐅᔪᒥᒡᓕ ᐱᓇᓱᐊᓚᐅᕐᐳᓯ ᐅᖁᒤᑦᑐᒦᑎᓪᓗᖓ ᐃᑲᔪᓚᐅᕋᑦᓯᓐᖓ.

¹⁵ ᐃᓕᑦᓯ ᐱᓕᐱᒥᐅᖑᔪᓯ ᓇᖕᒥᓂᖅ ᖃᐅᔨᒪᑦᓯᐊᕐᐳᓯ ᐅᖃᐅᓰᑦ ᑐᓴᕈᒥᓇᕐᑐᑦ ᐅᖃᐅᓯᐅᓕᓵᕐᑎᓪᓗᒋᑦ, ᒫᓯᑑᓂᐊᒥᑦ ᐊᐅᓪᓚᓚᐅᕋᒪ, ᐅᒃᐱᕐᑑᖃᑎᒌᓂᑦ ᐃᑲᔪᕐᑐᑐᐊᖑᓚᐅᕐᐳᓯ ᐅᕙᓐᓂᒃ; ᑐᓂᓯᓂᑦᓯᒍᑦ ᐃᓚᓕᐅᕐᓯᓂᑦᓯᒍᓪᓗ;

¹⁶ ᐊᑕᐅᓯᐊᕋᓯ ᐊᒡᓛᑦ ᑎᓴᓗᓁᑲᒦᑎᓪᓗᖓ ᐃᑲᔪᖃᑦᑕᓚᐅᕐᐸᑦᓯᓐᖓ ᐃᑲᔪᕐᑕᐅᔭᕆᐊᖃᓕᕐᑎᓪᓗᖓ.

¹⁷ ᑐᓂᓯᕕᐅᔪᒪᓗᖓ ᐱᓐᖏᓚᖓ; ᐊᑭᓕᕐᑕᐅᓂᒃᓴᓯᓕ ᐱᓂᐊᕐᓂᕕᓂᑦᓯᓐᓄᑦ ᑕᒪᓐᓇ ᐱᔪᒪᕙᕋ.

¹⁸ ᒫᓐᓇ ᑕᒤᓐᓂᒃ ᑭᓐᖒᒪᔭᖃᕈᓐᓃᕐᐳᖓ, ᐱᖃᓗᐊᕐᓗᖓ ᐊᒡᓛᑦ; ᐃᐸᐳᕈᑍᑕᓯᐅᑉ ᓇᒃᓴᕐᕕᒋᖕᒪᖓ ᑐᔫᑎᑦᓯᓐᓂᒃ, ᑕᒪᒃᑯᐊ ᑎᐱᑦᓯᐊᕆᒃᓴᐅᑎᑎᑐᑦ ᑐᓂᕐᕈᑕᐅᔪᑎᑐᑦ ᑍᒤᑉᐳᑦ ᒎᑎᒧᑦ, ᑐᓂᕐᕈᑎᒃᓴᖅ ᓈᒻᒪᒋᔭᐅᔪᖅ ᒎᑎᒧᓪᓗ ᖁᕕᐊᒋᔭᐅᔪᖅ.

¹⁹ ᒎᑎᒪᓗ ᑐᓂᓯᕕᒋᓂᐊᕐᐹᓯ ᑭᓐᖒᒪᒋᔭᓕᒫᑦᓯᓐᓂᒃ ᐊᔪᕐᓴᓐᖏᕐᑐᔪᐊᖑᓂᕐᒥᓂᑦ ᐱᓐᓇᕐᓇᕐᑐᕐᔪᐊᒥᑦ ᙭ᔅᑑᓯ ᔩᓱᓯᒥ.

²⁰ ᒎᑎᕗᑦ ᐊᑖᑕᕗᓪᓗ ᓂᕐᑐᕐᑕᐅᓕ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒥᓐ.

ᑕᕝᕙᐅᕗᑏᕈᑏᑦ ᒎᑎᐅᑉ ᐃᓄᖁᑎᖏᓐᓄᑦ

²¹ ᑕᕝᕙᐅᕗᑏᕐᐸᒃᑲ ᐃᑦᔪᕐᓁᑎᑕᐅᓯᒪᔪᓕᒫᑦ ᙭ᔅᑑᓯ ᔩᓱᓯᒥ. ᓇᔪᕐᑎᒋᔭᒪ ᐅᒃᐱᕐᑑᖃᑎᒌᑦ ᑕᕝᕙᐅᕗᑏᕐᐹᓯ.

²² ᐃᑦᔪᕐᓁᑎᑕᐅᓯᒪᔪᓕᒫᑦ ᑕᕝᕙᓃᑦᑐᑦ ᑕᕝᕙᐅᕗᑏᕐᐹᓯ, ᐱᓗᐊᕐᓗᑎᒡᓕ ᓰᓴᕆᐅᑉ ᐃᒡᓗᒥᐅᖃᑎᖏᑦ.

²³ ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐃᓚᒋᓕᒋᑦ ᐊᓂᕐᓂᓯ. ᐋᒥᓐ.