ᐱᓕᐱᒥᐅᓄᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᓇᓛᒎᕐᓂᖅ ᓱᓕᔪᖅ

¹ ᑭᖑᓪᓕᕐᐹᒥᒡᓕ ᐅᒃᐱᕐᑑᖃᑎᒃᑲ, ᖁᕕᐊᓱᒋᑦᓯ ᐊᑕᓂᕐᒥ. ᑎᑎᕋᐅᓯᕆᓚᐅᕐᑕᓐᓂᒃ ᑖᒃᑯᓂᖓᑦᓮᓐᓇᖅ ᑎᑎᕋᕋᓗᐊᕈᒪ ᖃᓄᐃᒃᓴᓐᖏᓚᖓ, ᓴᐳᑎᔭᐅᑦᔪᑎᒋᒃᑲᓐᓂᕐᓂᐊᕋᑦᓯᐅᒃ.

² ᓯᓔᕐᕆᔭᐅᑦᑍᓕᒋᑦᓯ ᕿᒻᒥᓄᑦ, ᓯᓔᕐᕆᔭᐅᑦᑍᓕᒋᑦᓯ ᐱᐅᖏᑦᑐᒥᒃ ᐱᓇᓱᐊᕐᑐᓄᑦ, ᓯᓔᕐᕆᔭᐅᑦᑍᓕᒋᑦᓯ ᑎᒥᐅᑉ ᐃᓚᖓᓂᒃ ᓇᑲᑎᕆᔨᓄᑦ.

³ ᐅᕙᒍᑦ ᓱᓕᔪᒥᒃ ᑭᐱᔭᐅᓯᒪᕗᒍᑦ, ᒎᑎᒥᒃ ᐱᔨᑦᓯᕐᑐᒍᑦ ᐊᓂᕐᓂᒃᑯᑦ, ᖁᕕᐊᓲᑎᖃᕐᓗᑕᓗ ᔩᓱᓯ ᙭ᔅᑑᓯᒥ, ᑎᒥᐅᑉ ᐱᐅᓯᖓᓂᒃ ᑕᑎᖃᕐᒥᓇᑕ.

⁴ ᐅᕙᖓᑦᑕᐅᖅ ᓇᖕᒥᓂᖅ ᑕᒪᒃᑯᓂᖓ ᑕᑎᖃᕈᓐᓇᕋᓗᐊᕐᒥᔪᖓ. ᑎᒥᒃᑯᑦ ᐱᐅᓯᕆᔭᐅᔪᓂᒃ ᑕᑎᖃᕈᓐᓇᕋᓱᒋᔪᖃᕐᐸᑦ, ᐱᖃᓗᐊᕋᔭᕐᐳᖓ ᐊᒡᓛᑦ;

⁵ ᓯᑕᒪᐅᔪᕐᑐᓂᒃ ᐅᓪᓗᖃᓕᕐᑎᓪᓗᖓ ᑭᐱᔭᐅᓐᓂᕋᒪ, ᐃᓅᓕᕐᓂᒃᑯᑦ ᐃᓴᕆᐊᓕᐅᔪᖓ, ᐱᓐᔭᒥᓂᒧᑦ ᑭᖑᕚᖑᓪᓗᖓ, ᐄᑉᕉᓪᓚᕆᐅᔪᖓ ᐊᐅᒃᑯᑦ; ᔫᑎᑦ ᐱᖁᔭᖏᓐᓂᒃ ᒪᓕᖕᓂᒃᑯᑦ ᐹᕆᓯᐅᔪᖓ.

⁶ ᔫᑎᑦ ᐱᐅᓯᖏᓐᓂᒃ ᐊᓐᓂᕈᓱᖕᓂᕐᒧᑦ ᐅᒃᐱᕐᑑᖃᑎᒌᓂᒃ ᐊᑭᕋᕐᑐᓚᐅᕐᑐᖓ, ᐱᖁᔧᑦ ᓇᓛᒎᕐᓂᕅᓂᖏᑎᒍᑦ ᐸᓯᔭᒃᓴᐅᓚᐅᓐᖏᓚᖓ.

⁷ ᑕᒪᒃᑯᐊᓕᒫᓪᓕ ᐊᔪᖏᑦᔪᑎᒋᓇᓱᓚᐅᕐᑕᒃᑲ ᒫᓐᓇ ᐊᑑᑎᒃᓴᖃᕈᓐᓃᕐᐳᑦ ᙭ᔅᑑᓯ ᐱᓪᓗᒍ.

⁸ ᑕᒪᒃᑯᐊᑑᖏᑦᑐᕐᓕ; ᐊᓯᓕᒫᖏᓕᑦᑕᐅᖅ ᐊᑑᑎᒃᓴᖃᕈᓐᓃᕐᐳᑦ ᐱᐅᓂᕐᓴᒻᒪᕆᐊᓗᖕᒥᒃ ᑕᑯᓯᒪᓕᕐᑎᓪᓗᖓ ᑐᑭᓯᓕᕐᑎᓪᓗᖓᓗ ᔩᓱᓯ ᙭ᔅᑑᓯᒥᒃ ᐊᑕᓂᕆᔭᓐᓂᒃ. ᑖᓐᓇᓗ ᐱᓪᓗᒍ ᑕᒪᕐᒥᒃ ᐃᒋᓯᒪᕙᒃᑲ; ᑕᒪᕐᒥᒡᓗ ᐃᒋᑕᒃᓴᑎᑐᑦ ᐃᓱᒪᒋᕙᒃᑲ, ᐱᓯᒪᓂᕐᓴᐅᖁᓪᓗᖓ ᙭ᔅᑑᓯᒥ

⁹ ᑖᑦᓱᒥᖓᓗ ᐃᓅᖃᑎᖃᑦᓯᐊᕈᓐᓇᖁᓪᓗᖓ, ᐅᕙᓐᓂᑦ ᐱᔪᒥᒃ ᐱᖁᔭᓂᒃ ᒪᓕᖕᓂᒃᑯᑦ ᓇᓛᒎᓐᓂᖃᕋᓱᐊᖁᓇᖓ, ᓇᓛᒎᕐᓂᕐᒥᒡᓕ ᐱᑎᑕᐅᕗᖓ ᐅᒃᐱᕐᓂᑯᑦ ᙭ᔅᑑᓯᒥ, ᑕᒪᓐᓇ ᓇᓛᒎᕐᓂᖅ ᒎᑎᒥᑦ ᐱᔪᖅ ᑐᓐᖓᕕᖃᕐᒪᑦ ᐅᒃᐱᕐᓂᒥᒃ;

¹⁰ ᙭ᔅᑑᓯ ᖃᐅᔨᑦᓯᐊᕈᒪᕙᕋ ᒪᑭᓐᓂᖓᑕ ᐱᔪᓐᓇᕐᓂᖓ, ᐊᒃᓱᕈᕐᑎᑕᐅᓂᖓᓗ ᐃᓚᖏᐅᑎᕕᒋᔪᒪᕙᕋ, ᑐᖁᓂᖓᓗ ᐊᑦᔨᒋᔪᒪᓪᓗᒍ,

¹¹ ᐊᔪᕐᓇᖏᑉᐸᑦ ᒪᑭᑎᑕᐅᔪᓐᓇᕈᒪᓪᓗᖓ ᑐᖁᒥᑦ ᐃᓅᓯᕐᒧᑦ.

ᐅᐸᒐᒃᓴᒧᑦ ᑲᔪᓯᑦᓯᐊᕋᓱᐊᕐᓂᖅ

¹² ᑕᒪᑐᒥᖓ ᐱᔭᕇᕐᓯᒪᓂᕋᕐᓗᖓ ᐅᖃᓐᖏᓚᖓ ᐅᕝᕙᓗ ᓈᒻᒪᒃᓯᔭᕇᕐᓂᕋᕐᓗᖓᓘᓐᓃᑦ; ᐱᓇᓱᐊᕐᐸᕋᓕ ᓵᓚᖃᐅᑎᒃᓴᖅ ᐱᑖᕆᔪᒪᓪᓗᒍ, ᔩᓱᓯ ᙭ᔅᑑᓯᐅᑉ ᓵᓚᖃᕈᑎᔭᕇᕐᓯᒪᖕᒪᖓ ᐱᑖᕆᓪᓗᓂᖓ ᓇᖕᒥᓂᖅ.

¹³ ᐅᒃᐱᕐᑑᖃᑎᒃᑲ, ᐃᓱᒪᓐᖏᓚᖓ ᑎᒍᓯᔭᕇᕐᓯᒪᔪᕆᓗᖓ; ᐅᓇ ᑕᕝᕙ ᐊᑕᐅᓯᖅ ᐱᓇᓱᐊᕐᑕᕋ, ᑐᓄᓐᓃᑦᑐᑦ ᐳᐃᒍᕐᐸᒃᑲ ᓯᕗᓂᓐᓃᑦᑐᓪᓗ ᐊᒃᓱᕈᕐᓗᖓ ᓯᕗᒧᐊᒍᑎᒋᓇᓱᐊᕐᐸᒃᑲ,

¹⁴ ᓯᕗᒧᐊᑦᓯᐊᕋᓱᐊᕐᐳᖓ ᓵᓚᖃᐅᑎᒃᓴᖅ ᐱᕕᐊᕐᓇᕐᑐᕐᔪᐊᖅ ᐱᑖᕆᔪᒪᓪᓗᒍ ᑕᒪᓐᓇ ᒎᑎᐅᑉ ᕾᖁᔨᑦᔪᑎᒋᖕᒪᒍ ᔩᓱᓯ ᙭ᔅᑑᓯᒥ.

¹⁵ ᑕᒪᑦᑕ ᐊᓂᕐᓂᒃᑯᑦ ᐱᕈᕇᕐᓯᒪᔪᒍᑦ ᑍᒫᒃ ᐊᑦᔨᒌᒃᑐᒥᒃ ᐃᓱᒪᖃᕆᐊᖃᕐᐳᒍᑦ; ᐊᑦᔨᒋᓐᖏᑕᖓᓂᒡᓕ ᐃᓱᒪᖃᕈᑦᓯ, ᑕᒪᓐᓇ ᒎᑎᐅᑉ ᓴᖅᑭᑎᓐᓂᐊᕐᐹ ᐃᓕᑦᓯᓐᓄᑦ.

¹⁶ ᑍᒤᒻᒪᑦ ᑲᔪᓯᓕᕐᑕ ᓱᓕᔪᑦ ᐃᓕᓐᓂᐊᕐᓯᒪᔭᕗᑦ ᒪᓕᒡᓗᒋᑦ.

¹⁷ ᐅᒃᐱᕐᑑᖃᑎᒃᑲ ᒪᓕᓚᐅᕐᓯᓐᖓ, ᒪᓕᒐᒃᓴᑦᓯᐊᒥᒃ ᐋᖅᑮᓯᒪᒐᑦᑕ ᐃᓕᑦᓯᓐᓄᑦ ᑍᒤᒻᒪᑦ ᒪᓕᒃᑐᑦ ᑕᒪᑐᒥᖓ ᑲᒪᒋᑦᓯᐊᕐᓯᐅᒃ.

¹⁸ ᑕᒪᑐᒥᖓ ᐅᓄᕐᑐᐃᕐᓱᕐᓗᖓ ᐅᖃᐅᑎᖃᑦᑕᓚᐅᕐᐸᑦᓯ, ᒫᓐᓇᓕ ᐅᖃᐅᓯᕆᒃᑲᓐᓂᕐᐸᕋ ᖁᕝᕕᐅᕐᓗᖓ, ᐅᓄᕐᒪᑕ ᐃᓅᓯᕐᒥᒍᑦ ᐊᑭᕋᕐᑐᕐᑐᑦ ᙭ᔅᑑᓯᐅᑉ ᓴᓐᓂᖓᔪᓕᖕᒥ ᑐᖁᓂᖓᓂᒃ.

¹⁹ ᑖᒃᑯᐊᓕ ᐃᓱᖃᕈᒫᕐᐳᑦ ᐊᓯᕈᕐᑕᐅᓂᕐᒥᒃ, ᐊᕿᐊᕈᕐᒥᖕᓂᒃ ᒎᑎᖃᕐᒪᑕ, ᖁᕕᐊᓲᑎᖃᕐᓗᑎᒡᓗ ᑲᓐᖑᓲᑎᒃᓴᐅᔪᓂᒃ, ᓄᓇᐅᓪᓗ ᐱᖏᓂᒃ ᐃᓱᒪᑐᐊᖃᕐᓗᑎᒃ ᐃᓅᓪᓗᑎᒃ.

²⁰ ᐅᕙᒍᓪᓕ ᓄᓇᒋᔭᕗᑦ ᕿᓚᖕᒦᑉᐳᖅ, ᑕᑉᐹᓐᖓᓪᓗ ᕿᓚᓈᕐᓗᑕ ᐅᑕᖅᑭᕙᕗᑦ ᐱᐅᓕᔨ, ᔩᓱᓯ ᙭ᔅᑑᓯ ᐊᑕᓂᕗᑦ.

²¹ ᑖᑦᓱᒪ ᑎᒥᕗᑦ ᓴᓐᖐᑦᑐᖅ ᐊᓯᑦᔨᕈᒫᕐᐹ ᑎᒥᒥᓄᑦ ᐱᕕᐊᕐᓇᕐᑐᕐᔪᐊᒧᑦ ᐊᑦᔨᐅᓕᕐᑎᓪᓗᒍ, ᐱᔪᓐᓇᕐᓂᕐᒥᒡᓗ ᑖᑦᓱᒥᖓ ᐊᑐᕐᓗᓂ ᑕᒪᕐᒥᒃ ᐊᑕᓂᐅᕕᒋᓕᕈᒫᕐᐰᑦ.