ᐱᓕᐱᒥᐅᓄᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

᙭ᔅᑑᓯᐅᑉ ᒥᑭᓕᑎᕐᓂᖓ ᐊᖏᔪᕈᕐᑎᑕᐅᓂᖓᓗ

¹ ᙭ᔅᑑᓯᒥ ᐱᕙᓪᓕᕐᑎᑕᐅᔪᖃᕐᐸᑦ, ᓇᒡᓕᖕᓂᖓᓄᑦ ᓮᒻᒪᕐᑎᑕᐅᒍᑦᓯ, ᐊᓂᕐᓂᖓᓄᓪᓗ ᐃᓚᒌᑦᓯᐊᓕᕐᑎᑕᐅᒍᑦᓯ ᐃᓕᑦᓯᓐᓄᑦ, ᐱᑦᓯᐊᕐᓂᖃᓕᕐᓗᓯᓗ ᐃᓚᑦᓱᒍᓱᖕᓂᖃᓕᕈᑦᓯ ᐃᓅᖃᑎᑦᓯᓐᓄᑦ,

² ᖁᕕᐊᓱᖕᓂᕋ ᐃᓗᐃᑦᑐᓐᖑᕐᑎᑦᓯᐊᓚᐅᕐᓯᐅᒃ ᐃᓱᒪᖃᖃᑎᒌᖕᓂᑦᓯᓐᓄᑦ, ᓇᒡᓕᖕᓂᑦᓯᓐᓄᓪᓗ, ᐊᑕᐅᓯᐅᖃᑎᒌᑦᓯᐊᕐᓂᑦᓯᓐᓄᓪᓗ ᐃᓱᒪᑦᓯᒍᑦ.

³ ᐱᓇᓱᐊᕐᓂᐊᕋᓯ ᓇᖕᒥᓂᕐᓯᐅᕐᓂᕐᒥᒃ ᐅᕝᕙᓗ ᐊᔪᖏᓐᓂᕐᓴᐅᓇᓱᒋᓂᕐᒥᒃ, ᐱᐅᔪᕆᖏᓐᓂᕐᒧᓪᓕ ᐃᓅᖃᑎᑦᓯ ᐃᓕᑦᓯᓐᓂᑦ ᐱᐅᓂᕐᓴᐅᓂᖏᓐᓂᒃ ᐃᓱᒪᖃᕆᑦᓯ.

⁴ ᐃᓕᑦᓯᓕ ᐊᑐᓂᑦ ᖁᕕᐊᒋᔭᑐᐊᑦᓯᓐᓂᒃ ᕿᓂᕐᓂᐊᕋᓯ, ᐊᓯᑦᓯᓕ ᖁᕕᐊᒋᔭᖏᓐᓂᒃᑕᐅᖅ ᐃᓱᒪᖃᕆᑦᓯ.

⁵ ᐃᓱᒪᖃᕆᑦᓯ, ᔩᓱᓯ ᙭ᔅᑑᓯᐅᑉ ᐃᓱᒪᖃᕐᓂᖓᑐᑦ.

⁶ ᑖᓐᓇ ᒎᑎᑐᑦ ᑍᒤᒃᑲᓗᐊᕋᒥ, ᒎᑎᒥᒃ ᐊᑦᔨᖃᕋᓱᓚᐅᓐᖏᓚᖅ ᓂᕐᑐᕐᓇᐅᑎᖃᕋᓱᐊᕋᓂᓘᓐᓃᑦ.

⁷ ᐃᓱᒪᕐᓱᑦᓯᐊᕐᓗᓂᓕ ᐱᔪᒪᔭᒥᓂᒃ ᓴᒃᑯᐃᓚᐅᕐᐳᖅ, ᐱᔨᑐᐃᓐᓇᕐᑎᑐᑦ ᑍᒤᓕᕐᓗᓂ, ᐃᓄᑐᐃᓐᓇᕐᑐᓪᓗ ᑍᒤᓕᓚᐅᕐᐳᖅ ᐃᓄᑐᐃᓐᓇᕐᑎᑐᓪᓗ ᑕᑯᒃᓴᐅᓂᖃᓕᕐᓗᓂ.

⁸ ᐃᒻᒥᓂᒃ ᒥᑭᒡᓕᑎᓚᐅᕐᐳᖅ, ᓈᓚᑦᓯᐊᖏᓐᓇᓚᐅᕐᐳᖅ ᑐᖁᒧᑦ ᐊᒡᓛᑦ ᑎᑭᓪᓗᓂ, ᑐᖁᒧᑦ ᓴᓐᓂᖓᔪᓕᖕᒥ ᐊᒡᓛᑦ.

⁹ ᑍᒤᒻᒪᑦ ᒎᑎᐅᑉ ᖁᑦᓯᖕᓂᕐᐹᒧᑦ ᓲᖑᓂᕐᐹᒧᐊᕐᑎᓚᐅᕐᐹ ᐊᑎᕐᑖᕐᑎᓪᓗᓂᐅᒡᓗ ᐊᑎᕐᓂᑦ ᑕᒤᓐᓂᑦ ᐊᖏᓂᕐᐹᒥᒃ.

¹⁰ ᔩᓱᓯᐅᑉ ᐊᑎᖓᓂ ᓰᖅᑯᑦ ᑕᒪᕐᒥᒃ ᓰᖅᑯᕐᑐᒃᓴᐅᕗᑦ, ᕿᓚᖕᒦᑦᑐᑦ ᓄᓇᒦᑦᑐᓪᓗ ᓄᓇᐅᑉ ᐊᑖᓃᑦᑐᓪᓗ,

¹¹ ᐅᕾᓪᓗ ᑕᒪᕐᒥᒃ ᓇᓗᓁᔧᔪᒃᓴᐅᕗᑦ ᔩᓱᓯ ᙭ᔅᑑᓯᐅᑉ ᐊᑕᓂᐅᓂᖓᓂᒃ, ᒎᑎᐅᑉ ᐊᑖᑕᐅᑉ ᓂᕐᑐᕐᑕᐅᓂᒃᓴᖓᓄᑦ.

ᓯᓚᕐᔪᐊᕐᒥ ᐃᑯᒪᔪᑎᑐᑦ ᖃᐅᒪᖁᓪᓗᑕ

¹² ᑍᒤᒻᒪᑦ ᓇᒡᓕᒋᔭᒃᑲ, ᑍᒪᓐᖓᑦ ᓈᓚᑦᓯᐊᖃᑦᑕᓚᐅᕋᑦᓯᓐᖓ, ᐃᓕᑦᓯᓐᓄᑦ ᓇᔫᑎᑎᓪᓗᖓᑐᐃᓐᓇᐅᖏᑦᑐᖅ, ᐱᓗᐊᕐᑐᒥᒃᓕ ᐃᓕᑦᓯᓐᓃᖏᑎᓪᓗᖓ, ᐱᐅᓕᔭᐅᓂᒃᓴᓯ ᑍᒪᓐᓇ ᐱᓇᓱᐊᕐᓯᐅᒃ ᐃᓕᕋᓱᒡᓗᓯ ᓴᔪᒃᓗᓯᓗ;

¹³ ᒎᑎ ᐱᓇᓱᐊᕐᒪᑦ ᐃᓕᑦᓯᓐᓂ, ᐱᔪᒪᓂᖃᖁᓪᓗᓯ ᐱᓇᓱᐊᖁᓪᓗᓯᓗ ᑖᑦᓱᒪ ᓇᖕᒥᓂᖅ ᐊᑲᐅᒋᔭᖓᓂᒃ.

¹⁴ ᑕᒤᓐᓂᒃ ᐱᓇᓱᐊᕆᑦᓯ ᐅᖃᐅᓯᕐᓗᒐᓯ ᐂᕙᓇᓯᓗ,

¹⁵ ᐸᓯᔭᒃᓴᐅᖁᓇᓯ ᓴᓗᒪᑦᓯᐊᖁᓪᓗᓯᓗ, ᒎᑎᐅᑉ ᕿᑐᕐᖓᖏᑎᑐᑦ ᑕᕝᕙᓂ ᓯᓚᕐᔪᐊᕐᒥ ᐃᓅᑎᓪᓗᓯ ᑭᒡᓗᕐᒨᕐᑐᓂ ᐊᔪᕐᑐᓕᔪᓂᓗ, ᑖᒃᑯᐊ ᐊᑯᕐᖓᓐᓂ ᖃᐅᒪᓂᐅᔪᒃᓴᐅᒐᑦᓯ ᓄᓇᒥ ᓇᓂᕈᐊᑎᑐᑦ,

¹⁶ ᐊᑕᕕᒋᑦᓯᐊᕐᓗᒍ ᐅᖃᐅᓯᖅ ᐃᓅᑦᔪᑕᐅᔪᖅ, ᑕᕝᕙ ᙭ᔅᑑᓯᐅᑉ ᐅᓪᓗᒃᓴᖓᓂ ᖁᕕᐊᓱᒍᑎᒃᓴᖃᕋᔭᕐᐳᖓ ᐅᓪᓚᐅᑎᔪᓂ ᓵᓚᐅᔪᑎᑐᑦ ᑍᒤᑦᑑᖏᓐᓂᓐᓄᑦ ᐅᕝᕙᓗ ᐊᒃᓱᕈᕐᓗᖓ ᐱᓇᓱᐊᓚᐅᕐᓂᕐᒪ ᑕᒪᐅᖕᒊᓐᓈᕐᓯᒪᖏᓐᓂᖓᓄᑦ.

¹⁷ ᐊᐅᒐᓕ ᑯᕕᓂᐊᕐᐸᓪᓘᓐᓃᑦ ᑐᓂᕐᕈᓯᕐᕕᖕᒥ ᑐᓂᕐᕈᑕᐅᔪᑎᑐᑦ ᐅᒃᐱᕐᓂᑦᓯᓐᓄᑦ, ᖁᕕᐊᓱᒃᑲᔭᕐᐳᖓ ᐃᓘᓐᓇᓯᓗ ᖁᕕᐊᓱᖃᑎᒋᓗᓯ.

¹⁸ ᐃᓕᑦᓯᑦᑕᐅᖅ ᖁᕕᐊᓲᑎᒋᔭᒃᓴᕆᕙᓯ ᖁᕕᐊᓱᖃᑎᒋᔭᒃᓴᕆᕙᑦᓯᓐᖓᓗ.

ᑎᒧᑎᓗ ᐃᐸᐳᕈᑍᑕᓯᓗ

¹⁹ ᐊᑕᓂᖅ ᔩᓱᓯ ᐱᖁᔨᒃᐸᑦ ᑎᒧᑎ ᒫᓐᓇᐸᓗᒃᑯᑦ ᐃᓕᑦᓯᓐᓄᑦ ᑎᓕᔪᒪᒐᓗᐊᕐᐸᕋ, ᐃᓕᑦᓯᓐᓂᒃ ᑐᓴᕈᒪ ᐱᕙᓪᓕᕐᑎᑕᐅᖁᓪᓗᖓ.

²⁰ ᑖᓐᓇ ᐃᓱᒪᖃᑎᑐᐊᕆᒐᒃᑯ, ᐃᑲᔪᕐᑕᐅᔭᕆᐊᖃᕐᓂᑦᓯᓐᓂᒃ ᐃᒃᐱᒍᓱᓪᓚᕆᖕᒪᑦ ᐅᕙᑦᑐᑦ.

²¹ ᐊᓯᖏᓪᓕ ᓇᖕᒥᓂᖅ ᐱᔭᕆᐊᖃᕐᑕᒥᖕᓂᒃ ᑭᓯᐊᓂ ᐃᓱᒪᖃᕐᒪᑕ, ᔩᓱᓯ ᙭ᔅᑑᓯᐅᑉ ᐱᖏᑦ ᐃᓱᒪᒋᓇᒋᑦ.

²² ᐃᓕᑦᓯᑦᑕᐅᖅ ᓇᖕᒥᓂᖅ ᖃᐅᔨᒪᒐᑦᓯᐅᒃ ᑎᒧᑎ ᓇᖕᒥᓂᖅ ᓴᖅᑭᑎᑦᓯᓯᒪᖕᒪᑦ ᐊᑐᕐᑕᐅᔪᓐᓇᕐᓂᕐᒥᓂᒃ, ᑎᒧᑎᓗ ᐅᕙᒍᒃ, ᓲᕐᓗ ᐃᕐᓂᕆᓪᓗᒍ ᐊᑖᑕᒋᔭᐅᔮᕐᓗᖓᓗ ᑖᑦᓱᒧᖓ ᐱᓇᓱᐊᖃᑎᒌᒃᓯᒪᒐᓐᓄᒃ ᐅᖃᐅᓰᑦ ᑐᓴᕈᒥᓇᕐᑐᑦ ᐱᓪᓗᒋᑦ.

²³ ᑍᒤᒻᒪᑦ ᐃᓱᒪᖃᕐᐳᖓ ᑖᓐᓇ ᑎᓕᔪᒪᓪᓗᒍ ᑐᑭᓯᑦᓯᐊᑐᐊᕈᒪ ᖃᓄᐃᓕᖓᓂᐊᕐᒪᖔᕐᒪ;

²⁴ ᖁᓚᓐᖏᓚᖓᓕ ᐊᑕᓂᕐᒥ ᐅᕙᖓᑦᑕᐅᖅ ᐃᓕᑦᓯᓐᓄᐊᕈᓐᓇᕐᓂᐊᕋᒪ ᒫᓐᓇᐸᓗᒃᑯᑦ.

²⁵ ᐃᓱᒪᖃᕐᓯᒪᒋᕗᖓᓕ ᑎᓕᔭᕆᐊᖃᕋᓱᒋᓪᓗᒍ ᐅᒃᐱᕐᑑᖃᑎᕗᑦ ᐃᐸᐳᕈᑍᑕᓯ ᐱᓇᓱᐊᖃᑎᒐ ᐅᓇᑕᕐᑎᐅᖃᑎᒐᓗ, ᑖᓐᓇ ᐱᓇᓱᐊᕐᓯᒪᖕᒪᑦ ᑎᓕᔭᐅᓯᒪᓪᓗᓂ ᐃᓕᑦᓯᓐᓂᑦ ᐃᑲᔪᕐᑕᐅᖁᓪᓗᖓ.

²⁶ ᐃᓘᓐᓇᑦᓯᓐᓂᒃ ᑕᑯᔪᒪᓕᕐᓯᒪᖕᒪᑦ, ᖁᕕᐊᓱᖏᑦᔪᑎᖃᓚᐅᕐᐳᕐᓗ ᐃᓕᑦᓯᓐᓂᒃ ᑐᓴᐅᒪᓕᕐᓂᑦᓯᓐᓂᒃ ᑐᓴᕋᒥ ᖃᓂᒪᓚᐅᕐᓂᖓᓂᒃ.

²⁷ ᐃᓛᒃ ᖃᓂᒪᒻᒪᕆᓚᐅᕐᒪᑦ, ᑐᖁᑲᓴᒃᓗᓂ ᐊᒡᓛᑦ. ᒎᑎᐅᓪᓕ ᓂᑲᒋᓚᐅᕐᐹ, ᑖᓐᓇᑑᖏᑦᑐᕐᓕ ᐅᕙᖓᑦᑕᐅᖅ ᓂᑲᒋᓚᐅᕐᒪᖓ, ᕿᒃᓵᖕᓇᕐᑐᒦᓐᓂᕋ ᐃᓚᔭᐅᒋᐊᓪᓚᖁᓇᒍ ᕿᒃᓵᖕᓇᕐᑐᒧᑦ.

²⁸ ᑲᑦᓱᖕᒊᕆᐊᓪᓚᒃᐳᖓᓕ ᑎᓕᔪᒪᓪᓗᒍ ᐃᓕᑦᓯᓐᓄᑦ, ᖁᕕᐊᓱᖁᓪᓗᓯ ᑕᑯᓕᕐᒥᒍᑦᓯᐅᒃ, ᐃᓱᒪᔮᕐᓂᕋᓗ ᐃᑯᓪᓚᐅᒥᖁᓪᓗᒍ.

²⁹ ᑍᒤᒻᒪᑦ ᐃᓚᓕᐅᕐᓯᐅᒃ ᖁᕕᐊᓱᒻᒪᕆᒡᓗᓯ ᐊᑕᓂᕐᒥ; ᑍᒤᑦᑐᓪᓗ ᑖᑦᓱᑐᓇᖅ ᐅᐱᒋᑦᓯᐊᕐᓯᒋᒃ,

³⁰ ᐃᓛᒃ ᐃᓅᓯᕐᒥᓂᒃ ᐊᓐᓂᕈᓱᓚᐅᖏᒻᒪᑦ ᐊᒡᓛᑦ ᑐᖁᑲᓴᓚᐅᕐᐳᖅ; ᙭ᔅᑑᓯᐅᑉ ᐱᓂᐊᖁᔭᖏᑦ ᐱᑦᔪᑎᒋᓪᓗᒋᑦ, ᐃᓕᑦᓯᓐᓂᒃ ᐃᓇᖐᓗᓂ ᐅᕙᓐᓂᒃ ᐃᑲᔪᕈᒪᓪᓗᓂ.