ᐱᓕᐱᒥᐅᓄᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᓇᓗᓁᕐᓯᑦᔪᑎᖏᑦ

¹ ᐸᐅᓗᓯᒥᑦ ᑎᒧᑎᒥᓪᓗ, ᔩᓱᓯ ᙭ᔅᑑᓯᐅᑉ ᐱᔨᖏᖕᓂᑦ, ᐃᑦᔪᕐᓁᑎᑕᐅᓯᒪᔪᓕᒫᓄᑦ ᐱᓕᐰᒦᑦᑐᓄᑦ ᔩᓱᓯ ᙭ᔅᑑᓯᒥ ᐃᓚᒌᖕᓂᖃᕐᑐᓄᑦ, ᐅᒃᐱᕐᑑᖃᑎᒌᓄᑦ ᓯᕗᓕᕐᑎᐅᔪᓄᑦ ᐃᑲᔪᕐᑎᓄᓪᓗ:

² ᒎᑎᐅᑉ ᐊᑖᑕᑦᑕ ᐊᑕᓂᑦᑕᓗ ᔩᓱᓯᐅᑉ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᖃᓄᐃᖏᑦᓯᐊᕐᑎᑦᓯᓂᖓᑕᓗ ᐃᓚᒋᓕᓯ.

ᐸᐅᓗᓯᐅᑉ ᑐᒃᓯᐅᑦᔨᓂᖓ ᑎᑎᕋᕐᕕᒋᔭᒥᓄᑦ

³ ᑍᒪᓐᖓᑦ ᐃᖅᑲᐅᒪᓕᕌᖓᑦᓯ ᒎᑎᒐ ᖁᔭᒋᖃᑦᑕᕐᐸᕋ,

⁴ ᑍᒪᓐᖓᓪᓗ ᑐᒃᓯᐅᑎᓕᕌᖓᑦᓯ, ᑐᒃᓯᐊᖃᑦᑕᕐᐳᖓ ᖁᕕᐊᓱᑦᓯᐊᕐᓗᖓ.

⁵ ᐃᑲᔪᒻᒪᕆᒃᓯᒪᒐᑦᓯᓐᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐱᓇᓱᐊᕐᑎᓪᓗᖓ ᑍᒪᓐᖓᑦ ᐱᒋᐊᓕᕋᑖᕐᓂᓐᓂᑦ ᒫᓐᓇᒧᑦ ᑎᑭᓪᓗᒍ.

⁶ ᖁᓚᖏᑦᓯᐊᕐᐳᖓᓗ, ᒎᑎ ᑖᓐᓇ ᐃᓗᑦᓯᓐᓂ ᐱᐅᔪᒥᒃ ᐱᒋᐊᕐᑎᑦᓯᓯᒪᔪᖅ, ᑲᔪᓯᑎᑦᓯᓂᐊᕐᒪᑦ ᐱᔭᕇᕐᕕᒃᓴᒧᑦ ᔩᓱᓯ ᙭ᔅᑑᓯᐅᑉ ᐅᓪᓗᖓ ᑎᑭᓪᓗᒍ.

⁷ ᑍᒪᓐᖓᑦ ᐃᓱᒪᒥᐅᑕᕇᓐᓇᕋᑦᓯ ᑍᒤᒻᒪᑦ ᐃᓕᑦᓯᓐᓂᒃ ᑍᒫᒃ ᐃᓱᒪᒋᔭᖃᕐᑐᒃᓴᐅᒐᒪ, ᑍᒪᓐᖓᑦ ᑲᑐᑦᔨᖃᑎᒌᓐᓇᓚᐅᕋᑦᓯᓐᖓ ᐱᕕᒃᓴᖃᕐᑎᑕᐅᓂᕆᔭᓐᓂᒃ ᒎᑎᒧᑦ, ᐅᕙᓂ ᑎᒍᔭᐅᓯᒪᕕᖕᒦᒃᑲᓗᐊᕐᑎᓪᓗᖓ ᑎᒍᔭᐅᓯᒪᑎᓐᓇᖓᓘᓐᓃᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᐅᓯᖃᕐᑎᓪᓗᖓ. ᐋᖅᑭᒃᓯᓇᓱᐊᕐᑎᓪᓗᖓᓗ ᐊᐅᓚᖏᑦᓯᐊᕐᑐᒥᒃ.

⁸ ᒎᑎᐅᑉ ᖃᐅᔨᒪᕚᖓ ᐅᖃᕐᑎᓪᓗᖓ ᓱᓕᑦᓯᐊᕐᓂᓐᓂᒃ, ᐃᓕᑦᓯᓐᓂᒃ ᓇᒡᓕᒍᓱᓪᓚᕆᖕᓂᕋ ᔩᓱᓯ ᙭ᔅᑑᓯᒥᑦ ᐱᖕᒪᑦ.

⁹ ᑐᒃᓯᐅᑎᕙᑦᓯᓗ ᓇᒡᓕᒍᓱᖕᓂᓯ ᑍᒪᓐᖓᑦ ᐊᖏᒡᓕᕙᓪᓕᐊᖏᓐᓇᖁᓪᓗᒍ, ᖃᐅᔨᕙᓪᓕᐊᖁᓪᓗᓯᓗ ᓱᓕᔪᒥᒃ ᑐᑭᓯᑦᓯᐊᖁᓪᓗᓯᓗ ᖃᓄᐃᓕᐅᕆᐊᖃᕐᓂᕐᒥᒃ,

¹⁰ ᖃᐅᔨᑦᓯᐊᕈᓐᓇᖁᓪᓗᓯ ᓱᓇ ᐱᐅᓂᕐᐹᖑᖕᒪᖔᑦ, ᑕᕝᕙ ᐸᓯᔭᒃᓴᐅᓂᐊᓐᖏᓚᓯ ᓴᓗᒤᑦᑐᓂᑦ ᐸᓯᔭᒃᓴᐅᓂᕐᒥᓪᓗ ᙭ᔅᑑᓯᐅᑉ ᐅᓪᓗᖓᑕ ᓇᓪᓕᐅᓐᓂᒃᓴᖓᓂ.

¹¹ ᐃᓅᓯᓯᓗ ᐃᓗᒻᒥᕐᑕᐅᓂᐊᕐᐳᖅ ᓇᓛᒎᕐᓂᐅᑉ ᐱᕈᕐᑎᑕᖏᓐᓂᒃ ᔩᓱᓯ ᙭ᔅᑑᓯᒃᑯᑦ ᓴᖅᑭᑦᑐᓂᒃ, ᒎᑎ ᓂᕐᑐᕐᑕᐅᖁᓪᓗᒍ ᐱᓐᓇᕐᓇᕐᓯᑎᑕᐅᖁᓪᓗᒍᓗ.

᙭ᔅᑑᓯᒥ ᐃᓅᓯᖃᕐᓂᖅ

¹² ᐅᒃᐱᕐᑑᖃᑎᒃᑲ, ᖃᐅᔨᒪᖁᕙᑦᓯ, ᐃᓅᓯᓐᓂ ᖃᓄᐃᓕᐅᕐᑕᐅᓯᒪᓂᕆᔭᒃᑲ ᐱᕙᓪᓕᕐᑎᑦᓯᓯᒪᖕᒪᑕ ᐅᖃᐅᓰᑦ ᑐᓴᕈᒥᓇᕐᑐᑦ ᐱᕙᓪᓕᐊᑦᔪᑎᒃᓴᖏᓐᓄᑦ.

¹³ ᑕᒪᑐᒨᓇ ᐊᖓᔪᖅᑳᕐᔪᐊᒃᑯᕕᐅᑉ ᖃᐅᔨᓴᕐᑎᖏᑦ ᐊᓯᖏᓪᓗ ᑕᕝᕙᓃᑦᑐᑦ ᓇᔪᕐᑕᓐᓂ ᖃᐅᔨᒪᓕᕐᐳᑦ ᑎᒍᔭᐅᓯᒪᕕᖕᒦᓚᕿᒐᒪ ᙭ᔅᑑᓯᒧᑦ ᐱᔨᒋᔭᐅᓂᕋ ᑭᓯᐊᓂ ᐱᑦᔪᑎᒋᓪᓗᒍ;

¹⁴ ᑎᒍᔭᐅᓯᒪᕕᖕᒦᓐᓂᓐᓄᓪᓗ ᐅᒃᐱᕐᑑᖃᑎᕗᑦ ᖁᓚᕈᓐᓃᕐᑎᑕᐅᑲᓐᓂᕐᐳᑦ ᐊᑕᓂᕐᒥᒃ, ᒎᑎᐅᑉ ᐅᖃᐅᓯᕆᔭᐅᖁᔭᖓᓂᒃ ᐅᖃᓪᓚᖁᓪᓗᒋᑦ ᓯᕗᕋᖏᓪᓗᑎᒃ.

¹⁵ ᐃᓚᖏᓪᓕ ᙭ᔅᑑᓯᒥᒃ ᐊᔪᕆᕐᑐᐃᑦᔪᑎᖃᕐᐳᑦ ᓵᓐᖓᔭᑐᐊᖑᔪᒪᓂᕐᒧᑦ ᐊᑭᕋᕐᑐᕈᒪᓂᕐᒧᓪᓗ, ᐃᓚᖏᑕᓕ ᙭ᔅᑑᓯ ᐊᔪᕆᕐᑐᐃᑦᔪᑎᒋᕚᑦ ᐱᐅᔪᒥᒃ ᐃᓱᒪᖃᕐᑎᑕᐅᑦᓯᐊᕐᓗᑎᒃ.

¹⁶ ᑖᒃᑯᐊᓕ ᑍᒤᓕᐅᕐᐳᑦ ᓇᒡᓕᖕᓂᕐᒧᑦ, ᖃᐅᔨᒪᒐᒥᒃ ᒎᑎᐅᑉ ᑎᓕᓯᒪᖕᒪᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᓪᓚᖁᓪᓗᖓ.

¹⁷ ᐃᓚᖏᑕᓕ ᙭ᔅᑑᓯ ᐊᔪᕆᕐᑐᐃᑦᔪᑎᒋᕚᑦ ᓱᓕᓪᓚᕆᒐᑎᒃ, ᓇᖕᒥᓂᕐᓯᐅᕐᓂᕐᒧᑦ ᐱᑦᔪᑎᖃᕐᓗᑎᒃ, ᐅᕙᓐᓂᒃ ᐅᖁᒤᒃᓴᕐᑎᑦᓯᒃᑲᓐᓂᕈᒪᓪᓗᑎᒃ ᑎᒍᔭᐅᓯᒪᕕᖕᒦᑎᓪᓗᖓ.

¹⁸ ᖃᓄᐃᓐᖏᓚᕐᓕ ᑕᒪᓐᓇ ᖁᕕᐊᓲᑎᒋᑐᐃᓐᓇᕐᐸᕋ ᙭ᔅᑑᓯ ᐅᖃᐅᓯᕆᔭᐅᖕᒪᑦ ᖃᓄᑐᐃᓐᓇᓕᒫᖅ ᐱᕕᖃᕐᓂᓕᒫᖓᒍᑦ, ᓈᒻᒪᓈᖏᑦᑑᒐᓗᐊᓄᑦ ᓈᒻᒪᓈᕐᑐᓄᓪᓗ; ᓱᓕᓕ ᖁᕕᐊᓱᑐᐃᓐᓇᕐᓂᐊᕐᐳᖓ.

¹⁹ ᖃᐅᔨᒪᒐᒪ, ᑐᒃᓯᐅᑦᔨᓂᑦᓯᓐᓄᑦ ᐃᑲᔪᕐᓂᑦᓯᓐᓄᓪᓗ ᔩᓱᓯ ᙭ᔅᑑᓯᐅᑉ ᐊᓂᕐᓂᖓᓂᑦ ᐱᔪᒧᑦ ᐊᓂᑎᑕᐅᓂᐊᕋᒪ.

²⁰ ᐱᔪᒪᓂᕐᐹᕆᔭᕋᓕ ᓂᕆᐅᒋᓪᓗᒍᓗ ᐱᔭᕆᐊᖃᕐᑕᓐᓂᒃ ᑲᔪᓯᔪᒪᓪᓗᖓ ᑲᓐᖑᓲᑎᒃᓴᖃᕈᒪᓇᖓ, ᓴᐱᖏᑦᓯᐊᕐᓂᖃᕈᒪᓪᓗᖓ ᒫᓐᓇᒥᑦ ᑍᒪᓐᖓᓕᒫᖅ ᐃᓅᓯᕋ ᙭ᔅᑑᓯᐅᑉ ᓂᕐᑐᕐᑕᐅᑦᔪᑎᒃᓴᖓᓄᑦ ᑐᕌᖓᖁᓪᓗᒍ, ᐃᓅᒐᓗᐊᕈᒪ ᑐᖁᒐᓗᐊᕈᒪᓘᓐᓃᑦ.

²¹ ᐃᓅᒍᒪ ᙭ᔅᑑᓯᒧᑦ ᐃᓅᕗᖓ, ᑐᖁᒍᒪᓗ ᐱᕙᓪᓕᕈᑎᒃᓴᕆᕙᕋ.

²² ᐅᕙᓂᓕ ᑎᒥᒃᑯᑦ ᐃᓅᑯᑖᖕᓂᐊᕈᒪ, ᐊᑐᕐᓇᕐᑐᓂᒃ ᐱᓇᓱᐊᕈᒪᕗᖓ. ᑍᒤᓐᓂᐊᕈᒪᓕ ᓇᓪᓕᐊᓐᓂᒃ ᓂᕈᐊᕋᔭᕐᒪᖔᕐᒪ ᐅᕙᓐᓄᑦ ᓇᓗᓇᕐᐳᖅ.

²³ ᐅᖁᒤᒃᓴᕋᒪ ᑕᒪᑐᒥᖓ ᐊᕙᒻᒧᑦ ᓄᓱᐊᕐᑕᐅᓪᓗᖓ. ᙭ᔅᑑᓯ ᓇᔪᕈᒪᓪᓗᒍ ᐊᖏᔪᒥᒃ ᑲᔪᖏᕋᓗᐊᕐᐳᖓ, ᑕᒪᓐᓇ ᐱᐅᓂᕐᓴᒻᒪᕆᐊᓘᖕᒪᑦ;

²⁴ ᑭᓯᐊᓂᓕ ᐱᑦᔪᑎᒋᓪᓗᓯ ᐱᔭᕆᐊᖃᕐᓂᕐᓴᐅᕗᖅ ᑕᒫᓂ ᓄᓇᒥ ᐃᓅᒃᑲᓐᓂᕈᒪ.

²⁵ ᑕᒪᑐᒥᖓᓕ ᖁᓚᓐᖏᓚᖓ, ᓱᓕ ᐃᓅᒃᑲᓐᓂᕐᓂᐊᕋᒪ ᐃᓕᑦᓯᓐᓃᒃᑲᓐᓂᕈᓐᓇᖁᓪᓗᖓ, ᐱᕙᓪᓕᐊᑎᑕᐅᒃᑲᓐᓂᖁᓪᓗᓯᓗ ᐅᒃᐱᕐᓂᑦᓯᒍᑦ ᐃᓗᑦᓯᒍᓪᓗ ᖁᕕᐊᓱᖁᓪᓗᓯ,

²⁶ ᐃᓕᑦᓯᓐᓄᑦ ᐅᑎᕐᑎᑕᐅᖕᒥᒍᒪ, ᐅᕙᒃᑯᑦ ᓂᕐᑐᐃᒃᑲᓐᓂᖁᓪᓗᓯ ᔩᓱᓯ ᙭ᔅᑑᓯᒥᒃ.

²⁷ ᒫᓐᓇᓕ ᐱᔭᕆᐊᖃᕐᓂᕐᐹᖑᕗᖅ ᐃᓅᓯᓯ ᒪᓕᑦᓯᐊᖁᓪᓗᒍ ᙭ᔅᑑᓯᐅᑉ ᐅᖃᐅᓯᖏᑕ ᐊᑐᕐᑕᐅᖁᔭᖏᓐᓂᒃ, ᐃᓕᑦᓯᓐᓄᑦ ᑎᑭᑦᓱᓐᓇᕈᒪ ᑕᑯᓗᓯ, ᐃᓕᑦᓯᓅᕈᓐᓇᖏᒃᑲᓗᐊᕈᒪᓘᓐᓃᑦ, ᑐᓴᕈᓐᓇᖁᓪᓗᖓ ᑲᔪᓯᑦᓯᐊᕐᓂᑦᓯᓐᓂᒃ ᐊᑕᐅᓯᐅᑦᓯᐊᕐᓂᑦᓯᓐᓂᒡᓗ ᐆᒻᒪᑎᑦᓯᒍᑦ, ᐃᓱᒪᑦᓯᒍᓪᓗ ᐊᒃᓱᕉᑎᖃᓪᓚᕆᖕᓂᑦᓯᓐᓂᒃ ᑲᑐᑦᔨᑦᓯᐊᕐᓗᓯ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᒃᐱᕈᓱᑦᓯᐊᕐᓂᕐᒧᑦ.

²⁸ ᐊᑭᕋᕐᑐᕐᑎᑦᓯᓐᓂᒃ ᓯᕘᕋᓂᐊᕋᓯ ᖃᓄᓕᒫᖅ. ᑕᒪᓐᓇ ᓇᓗᓁᒃᑯᑕᐅᖕᒪᑦ ᐊᓯᕈᕐᑕᐅᓛᕐᓂᖏᓐᓄᑦ, ᐃᓕᑦᓯᓕ ᐱᐅᓕᔭᐅᖁᓪᓗᓯ, ᑕᒪᓐᓇᓗ ᒎᑎᒥᑦ ᐱᕗᖅ.

²⁹ ᙭ᔅᑑᓯᒥᒃ ᐱᔨᑦᓯᕈᓐᓇᕐᑎᑕᐅᒐᑦᓯ ᐅᒃᐱᕐᕕᒋᑐᐃᓐᓇᕐᓗᒎᖏᑦᑐᖅ ᐊᒃᓱᕈᕐᑎᑕᐅᑦᔪᑎᒋᓗᒍᓕᑦᑕᐅᖅ.

³⁰ ᓵᓚᐅᑦᑍᓕᔭᕆᐊᖃᕐᐳᓯ ᓲᕐᓗ ᐅᕙᓐᓂᒃ ᑕᑯᓚᐅᕋᑦᓯ ᓵᓚᐅᓚᐅᖏᓐᓇᒪ ᑐᓴᐅᒪᒐᑦᓯᓗ ᓱᓕ ᑍᒤᓕᐅᕐᑕᐅᒐᒪ ᐅᖃᐅᓰᑦ ᑐᓴᕈᒥᓇᕐᑐᑦ ᐱᓪᓗᒋᑦ.