Yoane 8 - Ecorit Aŋejuk 2003

Aŋotte enne Inefuni Oroto

¹ [Tania, otturoroi nyia aati 'daŋ ihaŋitek hosi, buo Yesu odok adoŋe Olifet.

² Nyia motie berien, acaharu nyia Yesu itua Haji Emojit enne ittokon, buo aati arriai ette ifuanna jihonyi, ette inyi itoŋo, ette ittiyenio isi.

³ Iyaŋunie nyia ettiyanak ifahita iko Farisei obo naŋotte ninyia oburani oroto, ette itawojihina ihosiere waati 'daŋ,

⁴ ette jiaran jio Yesu, “Hettiyanani, oburani aŋotte ana luŋa oroto.

⁵ Ati ojiori efahita huno Mose jio, oŋida iruoŋi inyi ta amoruoi many oyeri. Ijio iyye anyio?”

⁶ Ikenuni nyia isi eram ana italohuniere Yesu, oŋida isi etisiak inyi. Ati irrafa nyia Yesu ifau, ette igigioro ta afialai honyi.

⁷ Ati ninyia adulori isi efiyo inyi, ette inyi itabisana ahuan honyi, ette jiaran jihosi, “Ijiara obo tehiji hatai ollo hobeŋ 'to iyyau itter eruoŋio aŋotte ania ta amoruo.”

⁸ Attati inyi inyiak irrafa afau, ette inyiak igigioro ifau ta afialai honyi.

⁹ Ninyia itaniŋuni isi ekiana ana, ette ahouti hosi itterio aleten addi, buo hullomuk 'daŋ ababo ette ijifana, ette Yesu irasa diya hama iko aŋotte ania onno owotia ihosiere honyi.

¹⁰ Odioto nyia Yesu ahide, ette jiaran jihonyi, “Haniye, tahiai isi? Abeŋ tulo oŋotok jihoi epali?”

¹¹ Itarraŋ nyia inyi ojio, “Lettok, abeŋ tulo.” Buo Yesu ette jiaran jihonyi jio, “Hode, abeŋ buo fe ni aŋotok jihoi epali, ati hènyiak iyyauna.”]

Ara Yesu Afaŋan ono Aati hutta Fau

¹² Inyiak nyia Yesu ikiana jio Farisei jiojio, “Ani afaŋan ono aati hutta fau. Lia, elle ijifatio 'to nani, obeŋ adi adaha idumele, ati owon adi inyi iko afaŋan ono nesu.”

¹³ Attati Farisei jiaran jihonyi jio, “Iyye hama ira asuut hoi; tania, obeŋi erre hunne ikiana iyye arai ahode.”

¹⁴ Itarraŋ nyia Yesu jio, “Duadi bu ara ni asuut hoŋ hama, arai erre hunne ekiana ni ahode nyio, amijak ni attu ni tai buo fe alo ajia. Ati itimoti itai attu ni tai, buo fe alo ajia.

¹⁵ Iŋociete itai eram ihuo aati, ati habeŋ ni aŋot eram obo atulo.

¹⁶ Ara duadi bu aŋot ni eram obo atulo, aŋot duo fe ni onno obis. Nyio, obiaŋara nani aŋocio hama, ati eŋocio hohoi arabotie iko lia, linyia ifahu 'to nani.

¹⁷ Ojiori efahita hatai jio, elle ikianai asuuti arrihai etuk abotie, ara eram hosi nyia hode.

¹⁸ Ara ni asuut hoŋ, buo fe Monye linyia ifahu 'to nani ara asuut hoŋ.”

¹⁹ Attati isi ifiyo inyi jiojio, “Tali buo Monyohoi lia?” Itarraŋ nyia Yesu isi jio, “Itimoti itai nani iko Monyoŋ. Elle imijana duo itai nani, imijana duo buo fe itai Monyoŋ.”

²⁰ Ikiana nyia Yesu erre hunia to ninyia ittiyeniere inyi itua Haji Emojit enne ittokon; to ninyia itoŋori inyi iger senuhi huno esiorita. Ati obeŋ nyia tulo inefu inyi nyio, hobeŋ nyia asaa honyi ottuba.

Ittallihoto Itai Ifuatan jio Amaji anna Alari Ni

²¹ Inyiak Yesu jiaran jihosi jio, “Alo adi ni addi. Ittifiati adi itai nani; ati iyeti adi itai iko eyyata hatai. Ittallihoto adi itai ifuatan jio amaji anna alari ni.”

²² Attati elettaha Yudei ifiyo jio, “Olo 'tadi inyi ittohoro ahuan honyi to onno ojiari inyi jio, ‘Ittallihoto itai ifuatan jio amaji anna alari ni?’ ”

²³ Itarraŋ nyia Yesu isi ojio, “Itai aati hulo afau ana, ati attu ni tedou. Irata itai a hulo afau ana, ati abeŋ ni ara a holo afau ana.

²⁴ Inyi noduo eramaniere ni itai jio, iyeti adi itai iko neyyata hatai. Iyeti adi itai iko neyyata hatai elle ibiaŋata itai iruhoto jio, ani luŋa inyi.”

²⁵ Buo isi ette ifiyo inyi ojio, “Iyye ŋai?” Buo Yesu ette itarraŋ ojio, “Eramak nyia ni itai many tetteri.

²⁶ Oluaji erre hunna ajio ni ekiana tetai iko epalita hunna ajio ni aŋotok jihatai. Ati obis lia, linyia ifahu 'to nani, buo fe ni eramak jio aati hutta fau erre hunne etayiru ni jihonyi.”

²⁷ Obeŋi nyia isi omijani jio ikiana nyia Yesu jihosi te eram Monye.

²⁸ Ania, ette Yesu jiaran jihosi jio, “Elle ikafana itai Lonyi Tulo ihide, ifuanna adi imijana jio, ‘Ani Luŋa inyi.’ Ifuanna adi buo fe imijana jio, abeŋ ni ehanio obo ariŋ ta ahou hoŋ, ati ekiana ni erre hunne iramak Monyoŋ jihoŋ.

²⁹ Lia, elle ifahu 'to ani, ewon inyi ikoŋ. Hobeŋ inyi obusak ani hama nyio, ehanio ni motie motie erre hunne itamunoye 'to inyi.”

³⁰ Ninyia iken inyi erre hunia, ette aati arriai hunyia itaniŋie 'to inyi iruk jihonyi.

Ohohi Adi Nelahode Itai

³¹ Attati Yesu ikiana jio aati hunyia iruhi 'to jihonyi jio, “Elle iduloro itai itayirio ekiana hoŋ, irata adi itai luŋa a hejifak hoŋ.

³² Imijana adi itai nelahode. Ohohi adi nelahode itai.”

³³ Buo isi ette itarraŋ jio, “Era hohoi to woyo Abramo. Hèbeŋ buo fe hohoi epito jio obo atulo. Nyio ijio iyye jihohoi jio, ‘Ohohini adi itai?’ ”

³⁴ Itarraŋ nyia Yesu isi jiojio, “Hode hode, eramak ni itai jio: Ara atulo elle iyyau 'to apit olo eyyau.

³⁵ Obeŋ apit ara atulo attahaŋ 'tulaŋ, ati arasa leto arahan atulo haŋ 'tulaŋ.

³⁶ Tania, alla ahohi Lonyi iyye, ihohino iyye luŋa.

³⁷ Amijak ni jio irata itai to woyo Abramo. Ati iwahata itai ittohoro ani te ehara hatai ettiyenio hoŋ.

³⁸ Ekiana ni erre hunne itahutak Monyoŋ nani, buo itai ihaniete erre hunyia iramani itai monyie hatai.”

³⁹ Itarraŋi nyia isi inyi ojio, “Ara Abramo monye hohoi.” Buo Yesu ette itarraŋ ojio, “Elle irata duo itai luŋa aduri Abramo, ihaniete duo itai erre hunyia ihanio Abramo.

⁴⁰ Ati iwahata itai ittohoro ani. Nani atulo elle eramak 'to jihatai nelahode enne etaniŋu ni jio Hollum. Obeŋ nyia Abramo ihanio ihuo nyia.

⁴¹ Ihaniete itai erre hunyia ihanio monyie hatai.” Itarraŋi isi inyi ojio, “Hollum hama ara monye hohoi luŋa, buo fe hohoi era aduri honyi hode.”

⁴² Itarraŋ nyia Yesu isi ojio, “Alla ara duo Hollum amonyatai luŋa, obuori duo atajia hatai nani nyio, attu ni jio Hollum, ihuania awon ni ikatai dini. Abeŋ nyia ni attu ta nahou hoŋ, ati inyi nyia ifahu nani.

⁴³ Ibiaŋata itai imijana erre hunne ekiana ni; nyio, oŋuŋusia ekiana hoŋ itajia hatai.

⁴⁴ Irata itai aduri Sittan, monyatai. Imunoti itai ehanio hirre hunne ihanio inyi. Ara nyia inyi a hattohoni many tetteri, buo fe obeŋ awak nelahode nyio, obeŋ nelahode jihonyi. Alla agesem inyi, itasiru inyi arahan honyi ologesem nyio, ara inyi ologesem buo fe amonye olo agesemi 'daŋ.

⁴⁵ Ati ibiaŋata itai iruhoto erre hoŋ nyio, ekiana ni nelahode.

⁴⁶ Ŋai jihatai ollo oremik 'to itahutana jio eyyau ni? Elle ekiana ni nelahode, nyioti ihara itai erre hoŋ?

⁴⁷ Itaniŋio lia, ollo ottu 'to jio Hollum ekenita Hollum. Ati ibiaŋata itai itaniŋiete ekenita Hollum nyio, ibiaŋata itai irata a hulo Hollum.”

Yesu iko Abramo

⁴⁸ Attati Yudei ifiyo Yesu jiojio, “Ebeŋ duo soho hohoi ettenu noduo ejiari hohoi jio, iyye a Samaritanani, buo fe iwon iko aminiaŋati?”

⁴⁹ Itarraŋ Yesu isi ojio, “Obeŋ obo aminiaŋati jihoŋ. Abaŋ ni Monyoŋ, ati ibiaŋata itai ibaŋata nani.

⁵⁰ Abeŋ ni attifia olohuo ono ahuan hoŋ, ati owon lia, alla awak 'to oŋida itahuye nani, oŋot adi inyi eram ania onno obis.

⁵¹ Hode hode, eramak ni itai jio: Obeŋ adi atulo ollo oniŋio 'to ettiyenita hoŋ, ojio aye 'tuŋ.”

⁵² Attati isi jiaran jihonyi jio, “Emijak tibuo hohoi luŋa jio, owon aminiaŋati jihoye! Aye nyia Abramo, buo fe ayei nyia ekianak Hollum; ati ijio iyye jio, obeŋ adi atulo ollo oniŋio 'to ettiyenio hoi, ojio aye 'tuŋ.

⁵³ Igalik ati iyye Monye hohoi Abramo linyia aye 'to? Ayei nyia buo fe ekianak Hollum. Igigilo iyye jio, iyye ŋai?”

⁵⁴ Itarraŋ nyia Yesu isi ojio, “Elle itahuoro duo ni ahuan hoŋ, ara duo fe etahuyo hoŋ asai. Ati Monyoŋ, elle ijiatta itai Hollum hatai, inyi nani itahuyo.

⁵⁵ Itimoti itai inyi, ati amijak ni inyi. Alla ajio ni jio atimo ni inyi, ette buo fe ni igesemi ihuo itai. Ati amijak ni inyi buo fe agottiere ekiana honyi.

⁵⁶ Omuno nyia monyatai Abramo igonyuniere oloŋ anna attuniere ni, ninyia igonyu inyi, ette inyi imuno.”

⁵⁷ Buo isi ette jiaran jihonyi jio, “Hobeŋi ikoddaŋ aŋasi hoi arai atomuana miyet, aŋai ati igonyu iyye Abramo?”

⁵⁸ Itarraŋ nyia Yesu isi jio, “Hode hode, eramak ni itai jio, awon nyia ni hobeŋi isiuni Abramo.”

⁵⁹ Tania, attati isi ihuruna amoruoi iruoŋiere inyi, buo Yesu ette idimana ahuan honyi ette leten addi totua Haji emojit enne ittokon.