Yoane 4 - Ecorit Aŋejuk 2003

Yesu iko Aŋotte a Samaritanani

¹ Itaniŋuni nyia Farisei jio italuaju Yesu lejifak honyi, buo fe itifuotu isi batisimo agalihini hulo Yoane. (

² Hode, obeŋ nyia luŋa Yesu itifuotok obo atulo batisimo, ati lejifak honyi nyia hulle itifuocie 'to.)

³ Ninyia itaniŋu Yesu erre hunia, ette inyi leten addi to Yudea, ette icaharu Galilea.

⁴ Olo nyia inyi totto fau Samaria.

⁵ Afany nyia inyi Sikar, abore gala Samaria onno onyiha 'to iger mana ninyia isiarak Yakobo jio lonyi honyi Yosefu.

⁶ Owon nyia ahirri Yakobo diya. Ania, ninyia afuto Yesu adaha, ette inyi iyiri iger ahirri ania. Ara nyia ihuo akil fanni.

⁷ Attati obo aŋotte a Samaritanani ittuna iwohoro aari, ette Yesu jiaran jihonyi jio, “Hadi omuk aari amat ni.” (

⁸ Ofuoi nyia lejifak Yesu inyiaŋuno aŋiyo totua bore gala.)

⁹ Buo aŋotte ania ette itarraŋ jio, “Ira iyye a Yudeitanani buo ni a Samaritanani. Aŋai ti imojo iyye aari jihoŋ?” (Obeŋi nyia Yudei iko Samaria itoŋoi onno oyyu.)

¹⁰ Itarraŋ nyia Yesu ojio, “Elle imijak duo iyye esiorio ono Hollum iko atulo ollo omojo 'to alia aari jihoi, ŋaduo iyye ifiyo latulo alia oŋida isiarak jihoi aari hunne iyaŋunie 'to nesu.”

¹¹ Buo aŋotte ania ette itarraŋ ojio, “Lettok, obeŋ obo ewohit jihoi iwohuniere aari, buo fe ahirri ana owudo; inyurak 'tadi iyye aari hunne iyaŋunie 'to nesu hua ajia?

¹² Igalik ati iyye hohonyi hohoi Yakobo, linyia isiarak 'to jihohoi ahirri ana, buo fe amatatio dini; inyi iko lonyirok honyi buo anyanya honyi?”

¹³ Itarraŋ nyia Yesu ojio, “Inyiak adi lia, alla amat 'to aari huna, ibuoto.

¹⁴ Ati lia, alla amat 'to aari hunna alo ni isiarana, obeŋ adi inyi inyiak ibuoto. Arai adi aari hunne esiarak ni jihonyi olotilik enne isiarak 'to jihonyi aari huno nesu hunne iyaŋunie 'to jihonyi nesu onno osio 'to 'tulaŋ.”

¹⁵ Attati aŋotte ania itarraŋ ojio, “Lettok, isiarak jihoŋ aari hua! Oŋida nani abeŋ enyiak ibuoto buo fe abeŋ attu dini iwohori aari.”

¹⁶ Buo Yesu ette iramana inyi jio, “Ilo iloŋunie habi hoi, ocohuniete ikonyi dini.”

¹⁷ Buo aŋotte ania ette itarraŋ ojio, “Obeŋ nani 'le.” Buo Yesu ette jiaran jihonyi, “Ibis iyye ijiari obeŋ iyye 'le.

¹⁸ Ayamai nyia aliawa miyet iyye, ati obiaŋara habi hoi elle itoŋoti 'to alia ikoye. Ibis iyye ijiari ihuo nyia.”

¹⁹ Ette aŋotte ania jiaran jihonyi, “Lettok, amijak ni ira iyye a hekianani Hollum.

²⁰ Omojotie nyia hohonyiok hohoi jio adoŋe ana, ati ijiatta itai Yudei jio, ijiara luŋa aati 'daŋ ofuoi imojo Yerusalem.”

²¹ Attati Yesu jiaran jihonyi, “Haniye, iruho eram hoŋ. Ottu adi asaa onno obiaŋarik aati omojorik Monye jio adoŋe ana kuyya Yerusalem.

²² Itimoti itai Samaria jio imojoti itai jio ŋai, buo hohoi Yudei emijak emojo hohoi jio ŋai; nyio, ottu etalahuno tottolo waati Yudei.

²³ Ati ottu adi asaa, alum inyi luŋa, enne itahabuyerek aati Monye ta aduaran ono Oloholio Hollum ihuo anna arari inyi luŋa. Omojoi adi isi inyi ta namojo ahode anna awak inyi.

²⁴ Hollum inyi Oloholio, buo hia hullo omojotie 'to inyi ihuo ara inyi luŋa, omojoi isi jihonyi ta agolon ono Oloholio honyi.”

²⁵ Attati aŋotte ania jiaran jihonyi, “Amijak ni jio ottu adi Olonyimoto, ollo ottu 'to itahutana hohoi erre 'daŋ.”

²⁶ Buo Yesu ette itarraŋ inyi ojio, “Nani inyi. Nani elle ekiana 'to olo jihoi.”

²⁷ Teya teya, ocohunie nyia lejifak Yesu, ette illilliha ta arumana hosi Yesu ikiana iko aŋotte ania. Ati obeŋ nyia obo jihosi ifiyo aŋotte ania jio, “Iwak iyye anyio?” kuyya ifiyo Yesu jio, “Anyio enne ikiana iyye iko aŋotte ania?”

²⁸ Attati aŋotte ania idiaharu atobok hari honyi, ette icaharu attua bore gala, ette iramana aati hutta abore gala ania jio,

²⁹ “Ifuanna imijata atulo elle iramak 'to olo jihoŋ erre 'daŋ hunne ehan ni. Inyi 'tadi Olonyimoto?”

³⁰ Ania, ette isi ifuanna to bore gala, ette ifuatan jio Yesu.

³¹ Jio asaa nyia, attanai nyia lejifak Yesu jiojio, “Hettiyanani, oŋiye!”

³² Ati itarraŋ nyia inyi ojio, “Owon aŋiria anna aŋiyo ni; itimoti itai inyi.”

³³ Ania, ette lejifak ifiyo ahuattek hosi jio, “Iyaŋuno duo attadi obo atulo aŋiyo jihonyi?”

³⁴ Buo Yesu ette jiaran jihosi, “Aŋiyo hoŋ, inyi ehanio hirre hunna awak Hollum iko ituhoniere egiama ninyia isiarak inyi jihoŋ.

³⁵ Obeŋ soho ekeni hatai eberien ojio jio, ‘Ihalu omuk ayafajin aŋuan, owon adi adioŋo?’ Ati eramak ni itai jio, ihumata imi amatta hatai; adori isi luŋa idioŋori!

³⁶ Ifuotu adioŋoni edumiti honyi, ette ittuttubana amat huno nesu onno osio 'to 'tulaŋ; oŋida ayani hinyomo iko adioŋoni omunoi arabotie.

³⁷ Itasiruno tibuo ekeni eberien onno ojio 'to jio, ‘Oyehi obo, buo lobo odeŋu.’

³⁸ Efak duo ni itai idioŋori amana ninyia ibiaŋata itai igiamati diya. Omuk aati hama nyia igiamai diya, buo itai tibuo inyauna emai hosi.”

³⁹ Iruhi nyia aati Samaria arriai hutta abore gala ania jio Yesu ta ajiaran aŋotte ania jio, “Iramak Yesu nani erre 'daŋ hunne ehan ni.”

⁴⁰ Ninyia afuonni aati Samaria jio Yesu, attanai nyia isi inyi oŋida itoŋo ikosi; ania, ette inyi itoŋo ikosi oŋitek arrihai.

⁴¹ Buo te ekenita Yesu, inyiahi nyia aati arriai iruk jihonyi.

⁴² Attati isi jiaran jio aŋotte nyia jio, “Ihuania, eruk hohoi, ati obiaŋara te eram ninyia iramak iyye hohoi. Eruk hohoi nyio, etaniŋu hohoi ekenita honyi buo fe emijak jio ara inyi luŋa a Hetalahani olo afau ana.”

Itaŋida Yesu Lonyi obo Elettok

⁴³ Ninyia atuk Yesu oŋitek arrihai teya, ette icaharu Galilea.

⁴⁴ Ati ikiana nyia Yesu ta ahuan honyi jio, “Obeŋi aati abaŋi ekianani Hollum otto miji hosi.”

⁴⁵ Ania, ninyia lafany Yesu Galilea, ottoi aati ifuotuna inyi, nyio igonyuni nyia isi erre 'daŋ hunyia ihan inyi Yerusalem to oloŋ ono neyom ono Allaŋan; nyio ofuoi nyia buo fe isi jio neyom nyia.

⁴⁶ Attati Yesu inyiak icaharu Kana otto Galilea, amaji ninyia iloiciere inyi aari afino. Owon nyia obo elettok gala Kapernaum, linyia oŋuai lonyi honyi.

⁴⁷ Ninyia itaniŋu inyi jio attu Yesu to Yudea ifau Galilea, ette inyi leten jihonyi, ette ittana inyi oŋida olo Kapernaum, itaŋidariere lonyi honyi linyia imohita 'to.

⁴⁸ Attati Yesu jiaran jihonyi, “Ittalihoto itai iruk arari fe elle igonyuna itai eduariti iko ellillihita.”

⁴⁹ Buo elettok alia ette itarraŋ ojio, “Lettok, waŋ efuo hobeŋ lonyi hoŋ oye.”

⁵⁰ Itarraŋ nyia Yesu inyi ojio, “Ilo, isu adi lonyi hoi.” Ette latulo alia iruk ekiana Yesu ania, ette leten.

⁵¹ Ninyia hadaha inyi ihiji ikoi, oruaŋanie inyi iko egiamak honyi hunyia iramani 'to inyi jio, “Alo lonyi hoi iŋidari!”

⁵² Attati inyi ifiyo isi jio ŋole baya iyyak aŋuai lonyi honyi, buo isi ette itarraŋ ojio, “Idehi anahan huan nyia inyi ŋole ŋole, ta asaa abotie otto otoriai.”

⁵³ Attati monye leto alia igiluna jio, inyi ania asaa ninyia ojiari Yesu jihonyi jio, “Isu adi lonyi hoi.” Ania, ette inyi iko aati haŋ honyi 'daŋ iruk jio Yesu.

⁵⁴ Eduarit etarrihi nyia ania ninyia ihan Yesu ninyia attu inyi to Yudea ifau Galilea.