Yoane 2 - Ecorit Aŋejuk 2003

Ayama otto Kana

¹ Ihalu oŋitek hunihoi owon nyia ayama ibore gala Kana atta fau Galilea. Owon nyia honye Yesu diya.

² Iloŋuni nyia buo fe Yesu iko lejifak honyi jio ayama ania.

³ Ninyia iwosoni aati afino, ette honye Yesu jiaran jihonyi, “Abeŋ afino jihosi.”

⁴ Ati itarraŋ nyia Yesu inyi ojio, “Aii, iyaŋ, nyio ittigemio iyye ani? Hobeŋ asaa hoŋ ottuba.”

⁵ Attati honyonyi iramana egiamak jio, “Ihanata erre 'daŋ hunne iramak inyi jihatai.”

⁶ Osioi nyia amocio hari ille diya, hunne ihanierek ehumita Yudei huno etaliborio. Iyaru nyia amoti hari abotie ajoloni atomuana arrihai kuyya atomuana hunihoi;

⁷ ette Yesu iramana egiamak jio, “Itufutana aari jio amocio hunia.” Otto isi itufutana amocio hunia 'daŋ hiny hiny.

⁸ Attati inyi iramana isi jio, “Ihuania, owohuna omuk aari jio amocio hunia, isiatta jio abusuti olo agari.” Ania, ette isi iwohoro aari jihonyi,

⁹ hunyia ayitoi 'to afino, buo abusuti lia ette iniŋ. Ati, otimo nyia inyi iyaŋunie afino ania tai, (ati omijani nyia egiamak hunyia owohunie 'to aari.) Ania, ette labusuti alia iloŋuna layamani,

¹⁰ ette jiaran jihonyi, “Itterie esiorio afino enne ilaman 'to bebe ahosiere; buo elle ehumi eloŋot imat, attati isiarana afino onno obeŋ 'to ilaman bebe. Nyioti idehi iyye afino enne ilaman 'to many iko ihuania!”

¹¹ Ihan nyia Yesu eduarit etteri ania ibore gala Kana otto Galilea. Tania, italeyehi nyia inyi akuatan honyi buo lejifak honyi ette iruk jihonyi.

¹² Ihalu erre hunia, olo nyia Yesu Kapernaum, inyi iko honyonyi buo illarak honyi iko lejifak honyi, ette isi itoŋo diya omuk oŋitek kai.

Aleten Yesu Ihaji Emojit enne Ittokon

¹³ Iliahai nyia luŋa oŋitek huno neyom ono Allaŋan; ania, ette Yesu leten Yerusalem.

¹⁴ Buo diya, orumak nyia inyi aati apocok itua Haji Emojit enne ittokon itinyiaŋie esuŋ, akioro, iko amami buo attobok robiyaa ottoboi arobiyaa imasik hosi.

¹⁵ Ania, ette inyi ififiruna allioto hofi, ette ifuhara isi 'daŋ addi iko anyanya hosi totua Haji Emojit enne ittokon, ette buo fe itidelliara atteremejahien huno etattobok robiyaa, ette itisarrahina agurusi hosi abilat;

¹⁶ ette ihum iramana etinyiaŋak mami jiojio, “Iyatti asaŋ hunia tene addi! Hèhanana Aaji Monyoŋ asuk!”

¹⁷ Attati lejifak honyi igiluna jio ojio Abuk Hollum jio, “Hollum, omuno atua hoŋ Aaji hoi bebe, ihuo onno ojio attoho ani!”

¹⁸ Attati elettaha Yudei ifiyo inyi jio, “Anyio eduarit enne iremik iyye ihan, itahutaniere hohoi jio osiru jihoi ihaniere erre hunia?”

¹⁹ Itarraŋ nyia Yesu isi jio, “Itatturoto Aaji Emojit enne ittokon ania buo ihalu oŋitek hunihoi, enyiak adi ni iduhonia.”

²⁰ Buo isi ette itarraŋ ojio, “Iyaru nyia aduho ono Aaji emojit enne ittokon ana aŋasi atomuana aŋuan helle, aŋai ti iremik iyye iduhonia inyi to oŋitek hunihoi ijiai?”

²¹ Ati to ninyia ikianari Yesu eram ono Aaji Emojit enne ittokon, ikiana nyia inyi te eram huan honyi.

²² Ania, ninyia itubuhuni Yesu toye, ette lejifak honyi igiluna jio ikiana nyia inyi eram ania, ette isi iruk erre hunne igioroni iko erre hunyia ikiana Yesu.

Amijana Yesu erre hutto Tajia Waati 'Daŋ

²³ Ninyia howon Yesu Yerusalem to oŋitek huno neyom ono Allaŋan, iruhi nyia aati arriai jihonyi ninyia igonyuni isi eduariti hunyia ihan inyi.

²⁴ Ati obeŋ nyia Yesu iruk eruk hosi, nyio omijak nyia inyi erre hutto tajia hosi 'daŋ.

²⁵ Obeŋ nyia inyi inyiak iwahan obo atulo oŋida iramak inyi obo ariŋ, nyio omijak nyia inyi erre hutto tajia hosi 'daŋ.