Yoane 17 - Ecorit Aŋejuk 2003

Omojo Yesu te Eram ono Lejifak Honyi

¹ Ninyia atuhok Yesu ekiana erre huna, ette inyi ibonno ahide idou, ette jiaran, “Monye attuba asaa, isiarak akuatan jio Lonyi hoi, oŋida buo fe Lonyi hoi isiarak akuatan jihoi.

² Nyio, isiarak nyia iyye inyi agolon ilohittohori jio aati hutta fau 'daŋ jio, oŋida inyi isiarak nesu 'tulaŋ, jio hia hulle isiarak iyye jihonyi.

³ Nesu 'tulaŋ, inyi anna ara 'to amijana iyye, Hollum elle ira 'to hama hode, iko amijana Yesu Kristo, linyia ifahu iyye.

⁴ Etaleyehi ni akuatan hoi ifau. Atuhok ni egiama ninyia isiarak iyye jihoŋ.

⁵ Ihuania Monye, itakuata nani to hosiere hoi, ihuo ninyia itakuaciere iyye nani, hèbeŋ iyye iyyeu afau!

⁶ “Etahutak ni afure hoi jio aati fau hunyia isio iyye jihoŋ. Arai nyia isi a hulo hoi, buo iyye ette isiarana jihoŋ. Ogottierek isi ekiana hoi;

⁷ buo ihuania, omijani isi jio, iyye luŋa isio jihoŋ erre 'daŋ hunne efuotu ni.

⁸ Eramak ni isi ekiana ninyia iramak iyye jihoŋ. Amijani isi jiojio attu ni hode jihoi, buo fe iruhi jiojio iyye luŋa ifahu nani.

⁹ “Amojo ni tesi. Abeŋ ni amojo ta aati fau 'daŋ, ati amojo ni to hia hinyia isiarak iyye jihoŋ, nyio, arai isi a hulo hoi.

¹⁰ Arai asaŋ hoŋ 'daŋ ahunohoi, buo fe hunohoi arai ahunoŋ. Itahutani akuatan hoŋ tesi.

¹¹ Ihuania, attu ni jihoi, abeŋ ni enyiak iwanan ifau, ati owoni isi ifau. Monye, Ololibo, ogottiere isi onno oyyu ta agolon ono afure hoi, afure ninyia isiarak iyye jihoŋ jio, oŋida isi arasai inoso abotie ihuo enne erari iyye ikoŋ.

¹² Ninyia hawon ni ikosi, agottiere nyia ni isi onno oyyu ta aduaran ono afure hoi, afure ninyia isiarak iyye jihoŋ. Agottiere nyia ni isi onno oyyu. Obeŋ nyia obo jihosi olitohi arari fe lia, linyia olo 'to ilitohina, itasiruniere ekiana otto buk Hollum.

¹³ Ihuania, attu ni jihoi, ati eramak ni erre huna jio aati hutta fau, oŋida bati namuno hoŋ ifut hiny itajia hosi.

¹⁴ Eramak ni jihosi ekiana hoi, ati oliwarik aati hutta fau isi, nyio, obeŋi isi arai a hulo afau ana, ihuo anna abiaŋari ni arari a holo nafau ana.

¹⁵ Abeŋ ni ajio iyai isi addi ta fau tene. Ati ajio ni jihoi ihuma imijio isi onno oyyu jio Olorroho.

¹⁶ Obeŋi isi arai a hulo afau ana, ihuo anna abiaŋari ni arari a holo afau ana.

¹⁷ Te nelahode, igelu isi a hulo hoi. Ara ekiana hoi elahode.

¹⁸ Efak ni isi jio aati hutta fau, ihuo ninyia ifahuniere iyye nani jio aati afau ana.

¹⁹ Tesi, esio ni ahuan hoŋ jihoi jiojio, oŋida buo fe isi luŋa isiori ahuattek hosi jihoi.

²⁰ “Abeŋ ni amojo tesi hama. Amojo buo fe ni to hia hulle iruhi 'to jihoŋ te ekiana hosi.

²¹ Amojo ni jio, oŋida bati isi arasai inoso abotie. Monye! Ijiara bati isi inosonie ikohoi, ihuo enne enosori ni jihoi buo fe iyye jihoŋ. Ijiara bati isi arasai inoso abotie, oŋida bati aati iruhi jio, iyye nyia ifahu nani.

²² Esio ni jihosi akuatan ninyia isiarak iyye jihoŋ, oŋida bati isi arasai inoso arabotie ihuo enne enosori iyye ikoŋ.

²³ Ajiaran ania jio, enosonio ni ikosi buo fe iyye inoso ikoŋ jio, oŋida bati isi inosoi luŋa arabotie. Oŋida bati aati hutta fau omijani jio, iyye nyia ifahu nani, buo fe jio obuor ataji hoi isi ihuo onno obuarari inyi nani.

²⁴ “Monye! Awak ni hia hunyia isiarak iyye jihoŋ itoŋoi ikoŋ jio amaji anna awanari ni, oŋida isi igonyuni akuatan hoŋ. Akuatan ninyia isiarak iyye jihoŋ ta abuaran taji hoi nani many hèbeŋ iyye iyyeu afau.

²⁵ Monye, Ollo Obis 'to! Otimoi aati hutta fau iyye, ati amijak ni iyye, buo fe lejifak hulo omijani jio, iyye nyia ifahu nani.

²⁶ Etahutak ni iyye jihosi. Adulo adi ni ehanio ihuo nyia jio, oŋida bati abuaran taji hoi nani, owon jihosi, buo fe oŋida bati ni awon jihosi.”