Yoane 16 - Ecorit Aŋejuk 2003

¹ “Eramak ni itai erre hunia jio, oŋida itai ibiaŋata idehina eruk hatai.

² Ifuhari adi aati itai addi ta hasik Imojiti. Hode, ofuonni adi oŋitek hunne igigilorik attok hatai jio ehanio isi erre hunna awak Hollum.

³ Ihanie adi aati erre huna jihatai, nyio, hobeŋi isi omijana Monye kuyya nani.

⁴ Ati eramak ni itai erre hunia, nyio, alla attu asaa onno ofuarik ihaniere isi, oŋida bati itai ifuanna igiluna jio eramak nyia ni isi jihatai. “Abeŋ nyia ni eramak jihatai erre hunia many tetteri, nyio, hawon nyia ni ikatai.

Egiama ono Loholio Olibo

⁵ Ati ihuania, acaharu ni jio lia linyia ifahu 'to nani; ati hobeŋ obo jihatai ifiyo nani jio, ‘Ilo iyye ajia?’

⁶ Ihuania, ifut ejiriŋa jihatai, nyio, eramak ni erre hunia jihatai.

⁷ Hode hode, eramak ni itai, iyyak adi jihatai alla alo ni addi, nyio, alla abeŋ ni alo addi, obeŋ adi aluahani ottu jihatai. Buo alla alo ni, efahu adi ni inyi jihatai.

⁸ Alla attu aluahani alia, ottu adi inyi itahutana jio aati hutta fau jio, ipali egigilita hosi te eram ono eyyata iko ono abisan ihosiere Hollum, buo ono aŋocio hiram.

⁹ Ipali egigilita hosi te eram ono eyyata, nyio, ihari isi eruk jihoŋ.

¹⁰ Ipali buo fe egigilita hosi te eram ono abisan ihosiere Hollum, nyio, alo atibuo ni jio Monyoŋ; ibiaŋata adi itai iduloro igonyutta nani.

¹¹ Ipali buo fe isi te eram ono aŋocio hiram, nyio, aŋoti eram ono elettok afau ana.

¹² “Holuaji erre hunna awak ni iramana jihatai, ati oddiŋi isi bebe itajia hatai.

¹³ Ati alla attu Oloholio elle italeyehi 'to elahode ono Hollum, ottu adi inyi itahutaru itai jio erre 'daŋ huno nelahode. Obeŋ adi inyi ottu ikiana erre te elohittok ottononyi. Ikiana adi inyi erre hunne itaniŋu inyi, buo fe iramak jihatai erre hunno ofuoi 'to iduoŋ.

¹⁴ Iyaŋuno adi inyi akuatan jihoŋ, nyio, omuhu adi inyi ekenita hoŋ, ette iramana jihatai.

¹⁵ Arai asaŋ huttono Monyoŋ 'daŋ a hunoŋ, inyi anna ajiari ni jio omuharu adi Oloholio jihatai ekenita hunne eramak ni jihonyi.

Nejiriŋa iko Namuno

¹⁶ “Obo kai, ibiaŋata adi itai inyiahata igonyuna nani, buo ihalu kai igonyuna adi itai nani.”

¹⁷ Attati omuk hulo lejifak honyi ikiana isi hama jiojio, “Ikiana inyi anyio, onno ojiari inyi jio, ‘Obo kai, ibiaŋata adi itai igonyuna nani, buo fe ihalu kai igonyuna adi itai nani;’ buo fe ojio jio, ‘ebeŋ adi egonyu inyi, nyio, alo inyi jio Monye?’

¹⁸ Ojio awoyo hiram ono ‘Ihalu kai’ anyio? Etimo ikiana inyi anyio!”

¹⁹ Omijak nyia Yesu jio awahi nyia isi ifiyo inyi, ania, ette inyi jiaran jihosi jio, “Nyio ifiyete itai ahuattek hatai ta ajiaran hoŋ jio, ‘Obo, kai, ibiaŋata adi itai igonyuna nani, buo ihalu kai, igonyuna adi itai nani’?

²⁰ Hode hode, eramak ni itai jio, iyyooti adi itai buo fe iloliati, buo aati hutta fau omunoi. Ijiriŋati adi itai, ati oyito adi ejiriŋa hatai amuno.

²¹ Alla ahuanya aŋotte; ihawwa inyi, nyio, afany asaa ono nadiaha jihonyi. Buo elle isiuno eto, ette inyi iguoro nadiaha neduo owon 'to jihonyi, ette imuno, nyio, isihi inyi eto jio aati hutta fau.

²² Ara buo fe inyi ihuo nyia jihatai. Ihawwati itai ihuania, ati attu adi ni inyiak imijaru itai, oŋida atajia hatai omunoi bebe. Obeŋ adi tulo oremik iduhara addi amuno ania jihatai.

²³ “Jio oloŋ nyia, ibiaŋata adi itai imojoti obo ariŋ jihoŋ. Hode hode, eramak ni itai jio, elle imojoti itai obo ariŋ jio Monye ta afure hoŋ, isiarak adi inyi jihatai.

²⁴ Many iko ahana hèbiaŋata itai imojoti obo ariŋ ta afure hoŋ. Omojoti, buo isiori adi jihatai jio, oŋida bati amuno hatai ottuba.

Itattur Yesu Egoliti hutta Fau

²⁵ “Eramak ni jihatai erre hunia te etarriamata; ati ofuonni adi oŋitek hunna abiaŋari adi ni ekianari te etarriamata. Ati eramak adi ni jihatai sar sar eram ono Monye.

²⁶ Jio oloŋ nyia, imojoti adi itai erre jihonyi ta afure hoŋ. Ati abeŋ adi ni enyiak ifiyo inyi tetai,

²⁷ nyio, itabuor Monye, ta ahuan honyi, ataji honyi jihatai. Obuor ataji honyi itai, nyio, obuori atajia hatai ani buo fe iruhoto jio attu nyia ni jio Hollum.

²⁸ Attu nyia ni jio Monye, ette ni ittuna ifau dini; buo ihuania, ediaharu ni afau ana, acaharu ni jio Monye.”

²⁹ Attati lejifak honyi jiaran jihonyi jio, “Ihuania, ibeŋ iyye inyiak ikiana te etarriamata, ikiana iyye sar sar.

³⁰ Ihuania, emijak tibuo hohoi jio, imijak iyye erre 'daŋ. Abeŋ adi tulo inyiak ifiyo iyye omuk efita. Eruk hohoi jio, ittu iyye jio Hollum.”

³¹ Itarraŋ nyia Yesu isi jiojio, “Iruhoto itai ihuania?

³² Ottu adi oloŋ, afany inyi luŋa, enne itatturonierek itai 'daŋ ababo ihaŋitek hatai. Idiahatti adi itai ani hama, ati abeŋ adi ni arasa ani hama nyio, owon Monye ikoŋ.

³³ Eramak nyia ni erre hunia jihatai jio, oŋida iwanata iko nelik tajia te enoso hatai ikoŋ. Irumana adi itai ettigemita jio afau ana. Ati itagoloto atajia! Nyio, etattur ni egoliti huno afau ana!”